Mi a lesa un komunikado di Cyrill Vrolijk i mi a keda ku yen di pregunta.
Porta Cyrill por siña mi komo yu di un humilde piskado ta kiko ta Bon Gobernashon.
Ora Diputado Clark Abraham a keda kondená pa KORTE dor di hues pa horta 20 mil dollar for di
nos hospital, lagando hendenan ku mester di kuido mediko pa lunanan largu tin ku drumi riba
matras sin klechi den friu i tur hende den e koalishon a keda boka ketu sin bisa nada riba e
esaki. Esei ta bon gobernashon?
Ora ku mi a puntrabo Cyrill den parke Tului, algun siman pasa dikon bo a benta Gobiernu abou
bo a bisami ku ta paso kosnan a kambia. Mi a puntrabo ta kiko a kambia bo a keda ketu ketu.
Ma bisabo ku ta uniko kos ku a kambia ta e sen di frakshon di 90 mil dollar ku bo ta haña awoki
via di bo kasa mes ku ta kobra e sen. Esei ta bon gobernashon?
Ora e koalishon aktual ta bira subi sen di Frakshon huntu ku nan amigu griffier for di total 200
mil dollar pa mas di 700 mil dollar pa anja sin ku esaki keda trata mes den un reunion publiko di
konseho insular pa pueblo por skucha kiko ta pasando. Esaki ta bon gobernashon?
Ora ta hinka den otro pa tur miembro di konseho insular i kolegio ehekutivo kuminsa bula
business class i haña un subida di kasi 100% di daggeld vergoeding sin ku esaki keda papia den
un reunion publiko, esaki ta bon gobernashon?
Ora tur proyekto ta pará, permit di konstrukshon no ta sali, opdracht pa drecha kayanan no ta
sali mas pero toch kolegio ehekutivo ta sigui traha part time na Boneiru i Part time na Oropa.
Esaki ta bon gobernashon?
Ora ekonomia ta den un kaida despues di hopi aña di kresementu i desaroyo pero bo no ta
tuma ningun akshon pa stimula ekonomia i e negoshante nan chikí lokal ta sufri i ta man na
kabes, esei ta bon gobernashon?
Ora bo ta bisa ku gobiernu di Boneiru ta den bati bankarota pero biahenan business class pa
hulanda no ta stop, bo no ke baha fractievergoedingen asta despues ku Hulanda a menasá
Boneiru ku medida. Esei ta bon gobernashon?
Ora diputada ta sali bati piskabon i akusá nan di mal maneho sin ningun base. Esei ta bon
gobernashon?
E lista di pregunta nan ta hopi mas largu pero nos ta lage te aki awe.
Nos ta spera di tende di Cyrill unda e la saka e kurashi pa defende un Gobiernu ku pa mi i pa
hopi hende den pueblo esaki ta esun di mas malu ku a yega di goberná den Boneiru su historia.
Segun Din Domacasse: Unda Cyrill Vrolijk a saka e kurashi ei?
