Recientemente a tuma nota di algun insinuacion encuanto prijsnan di cas y disponibilidad di vivienda pa comunidad local. Sr. Alberto Perret-Gentil, desaroyador renombra na Aruba y internacional, CEO di BlueAruba Rentals, ta indica cu pa por haci remarcanan obhetivo encuanto prijsnan di cas na Aruba mester separa e mercado di clase medio/halto di vivienda for di e mercado di vivienda accesibel. E motibo ta paso ambos tin elementonan diferente pues ta genera resultadonan diferente. No por mescla e dosnan aki cu otro.
Gastonan di construccion na Aruba semper tabata alrededor di 30-40% mas caro compara cu Merca pa diferente motibo. E motibo mas obvio ta e impuesto halto di importacion. Tambe mester tene na cuenta produccion laboral mas abou, monopolio/oligopolionan di cierto material y trabou di contratista y e tardansa di permisonan debi na e burocracia den nos sistema gubernamental.
E aumento cu mas ta subraya e efecto di costo halto di vivienda na Aruba ta principalmente debi na gastonan halto di construccion cu a aumenta cu 35% den e ultimo aña. Ainda mester sinti e efecto macro-economico di inflacion y un impuesto induci. Otro factornan ‘macro-environment’ ta ceramento di fabrica y wafnan pa motibo di Covid den 2020, y gueranan comercial pafo di Aruba cu tabata y/of ainda tin su efecto riba nos isla.
Den caso di e segmento di clase medio y halto di vivienda, prijsnan ainda ta ahustando na e dicho aumento aki, di cual ainda no a yega na unda e mester ta. E stranhero y localnan cu tin intencion di construi, ta na altura di esaki y por lo tanto ta probecha di e oportunidad temporario aki. Mester remarca cu den e mesun mercado medio y halto aki, tin poco inventario nobo di vivienda disponibel, y cu un demanda halto, teniendo na cuenta cu e aumento drastico di material di construccion, consecuentemente tin influencia riba e prijs di vivienda na Aruba. Mester keda obhetivo y realisa, cu prijsnan di viviendo lo sigui aumenta, y mas ainda awo cu leynen nobo di impuesto y inflacion.
Otro fenomeno cu ta tumando luga ta e tendencia di ‘Flexworking’ cu ta un factor contribuyente. Por tuma nota di hopi bishitante cu ta bin Aruba pa traha pa un termino di 3 luna, y ta haci uzo di casnan vacacional. Den nan tempo na Aruba, nan ta crea un pasion pa Aruba su cultura, hendenan, clima, y ta scoge Aruba como nan di dos cas. Esaki sin duda mester wak como un inversion den nos isla.
Limitacionnan di ROPV
E limitacionnan cu e ROPV ta impone encuanto casnan vacacional entre otro den Oranjestad, Seroe Colorado y San Nicolas, den Perret-Gentil su opinion ta un eror grandi. Si tuma Oranjestad por ehempel, cu tin mas di un decada cu ta anhela un renobacion y deseo pa wordo rebiba. Recientemente Minister Geoffrey Wever ta anuncia un proyecto pa rebiba Oranjestad, cu un vision di crea vivienda. Pero na mes momento tin un limitacion vigente di e ROPV unda den Oranjestad tin un maximo irrealistico di solamente 100 cas destina pa casnan vacacional. Perret-Gentil ta menciona: tin mas cu suficiente espacio disponibel pa cas di vivienda pa local, y unidadnan vacacional. Ambos mercado ta beneficia nos economia y por co-existi! Actualmente anochi den nos ciudad ta un ‘ghost town’. E ta un hecho, cu si no tin hende den nos cayanan di Oranjestad pa trece bida, cualkier plan di revitalisacion den centro di ciudad ta destina pa fracasa.
Sostenibilidad economico duradero
Ta importante pa subraya cu den centro di Ciudad tin espacio pa ambos mercado, como tanto vivienda accesibel, medio/halto pa local, y tambe vivienda cu proposito vacacional. E no ta un cuestion di sea e un of e otro, pero e ta e disponibilidad di yega na un balanse husto pa un sostenibilidad duradero pa nos isla. Si kier papia di rebiba Oranjestad, basa riba sostenibilidad economico duradero, mester studia tur aspecto, y no solamente wak for di unicamente un perspectiva. Ta di aplaudi cu Minister Geoffrey Wever a tuma e iniciativa pa haci un revision di e impacto economico di e industria di propiedad vacacional, regulaccionan y e efecto di e actual ROPV.
Otro aspectonan cu ta afecta e mercado di vivienda ta e moratorio imponi. Esaki ta restringui e oferta di unidadnan vacacional den tur e zonanan menciona anterior, di cual e demanda solamente lo keda subi y lo move eventualmente pa zonanan residencial. Teniendo na cuenta tur e aumentonan recien, ta aspectonan cu solamente ta agrega mas problema pa cu vivienda residencial y ta solamente haci prijsnan di vivienda mas caro.
Por lo tanto, por realisa cu e problema no ta cu hopi stranhero tin cas na Aruba, y cu tampoco cu e casnan di huur vacacional ta afecta mercado di viviendia. Esaki realmente tin un efecto insignificante.
Perret-Gentil ta remarca, cu esaki no kiemen cu no mester di regulacion. Al contrario, mester exigi permiso pa por establece un maximo di vivienda vacacional den cierto barionan residencial, implementa normanan mas estricto di molester di zonido, molester di parkeo y di sushi. Naturalmente tur vivienda vacacional mester cumpli cu impuesto di 12.5%
Sr. Alberto Perret-Gentil ta desaroyador di diferente condominio renombra na Aruba, CEO di BlueAruba Rentals y ta boga pa regulacion husto y obhetivo. Como co-fundador di ‘Vacation Rentals Professionals of Aruba’ (VRPA), hunto ta traha pa concientisa tur propetario di vacation rentals riba e importancia di eherce practicanan profesional pa cu e mercado specifico di Vacation Rental.
1 comment
[…] Source link […]