Secretario General di MEP Endy Croes ta felicita henter Pueblo di Aruba cu e celebracion di Dia di Betico, e siman aki 25 di januari proximo. Ban sali y ban celebra. Danki Betico!
Ken ta Betico ?
Betico Croes a nace dia 25 di januari 1938 y si Betico tabata na bida e lo a cumpli 86 aña di edad e aña aki. Betico a bin di e pueblo humilde di Santa Cruz y ta yiu di defunto Panchico y Mimita. Betico tabata felizmente casa cu Glenda y tin 4 yiu, esta Gisette, Glenbert, Junior y Gleneline (Lalo). Nomber corecto di nos Libertador Betico Croes ta Gilberto François “Betico” Croes. Betico tabata gusta deporte y musica. No solamente Betico a dirigi koor di misa Inmaculada Concepcion na Santa Cruz, pero Betico tabata tin su propio grupo, esta Betico y su Grupo. Cu e grupo aki, Betico tabata pasa cas pa cas fin di aña tocando su acordeon y sonando e Dande. Despues cu Betico a fayece, e grupo a cambia di nomber y a bira Grupo di Betico. Betico a bay scol basico y a continua HBS na Sint Dominicus College. Betico a sigui su estudio na Hulanda na Hilversum y a bira maestro di scol. Betico a regresa Aruba y a traha na Sint Jozef School pa 6 aña, cual awendia tin e nomber di Colegio San Hose. Betico a sigui studia y a haal LO den Handelskennis y LO Spaans. Despues Betico a traha 2 aña na Colegio San Antonio na Santa Cruz di aña 1965 pa 1967.
Betico su amor pa Aruba:
Betico tabata tin un amor grandi pa Aruba y a dicidi di subi lista politico pa duna aporte na su pais di un otro forma. Na aña 1971, Betico a kibra cu AVP y 9 di februari 1971 a lanta su propio partido Movimiento Electoral di Pueblo (MEP). Su determinacion tabata pa saca Aruba for di constelacion Antiyano cu e momento ey tabata 6 isla. E isla mas grandi cu ta Curaçao tabata esun dominante. Betico a bringa y lucha pa nos Status Aparte. Un lucha incansabel di 15 aña prome cu Betico a logra. E lucha no tabata uno facil.
Algun parti di e lucha:
Den e luna di augustus di aña 1972, Betico a forma parti di delegacion di Reino pa bay Surinam. Betico a plantia bek e idea di Status Aparte, pero lamentablemente otro politiconan a bisa cu Betico no por papia den nomber di Aruba como cu MEP e tempo ey a saca 7 asiento den su prome salida. Betico a bisa nan: “Mi ta bay consulta cu mi pueblo y lo mi bolbe”. Dia 18 di maart 1973, Betico a organisa un manifestacion masal den Wilhemina Stadion, momento parlamentarionan Hulandes tabata na Aruba, cual a haci un impacto enorme.
Betico a unifica pueblo cu Himno y Bandera:
Den e proceso Betico a boga pa union pa asina henter e pueblo por sostene e lucha. Betico a forma un comision pa Aruba por haya su propio himno y bandera. Dia 18 di Maart 1976, nos bunita bandera a bay halto den Wilhemina stadion y nos himno Aruba dushi tera a resona. Esaki a crea un impacto di orguyo den nos Arubianonan, unda mas y mas hende cu un amor patria a acerca pa sostene e lucha di Status Aparte. Dia 25 di maart di aña 1977, a organisa un referendum pa pueblo mes por dicidi su futuro a traves di Bos di Pueblo, Ta Bos di Dios (Vox Populi, Vox Dei). Lamentablemente, AVP cu su lider nobo e tempo aya, Henny Eman a pidi tur hende pa NO bay vota y pa nan bay lama pasa dia cu famia. Henny Eman no a logra su intento pa boycotea e referendum. Pueblo a reacciona masalmente cu 82.5% di voto na fabor. Aprobando di e manera aki e lucha di Betico cu un sosten masal y incondicional.
Augustus scur na aña 1977:
Na aña 1977, MEP a obtene 5 di e total di 8 asientonan pa cu Parlamento di Antias durante eleccion. Lamentablemente, Gobierno Central a yuda pa PPA e tempo aya, a laga MEP for di gobierno. Esaki a trece cu ne un ola di manifesto cu a desemboca den augustus scur. Durante e manifestacion masal aki, WEB su servicio strategicamente a cay afor y Aruba a bay den un blackout total. Gobierno di turno e momento ey, a manda refuerso di Riot Comando di Curaçao pa purba trece trankilidad. Tironan a cay riba nos hendenan. Esaki ta forma parti di nos historia di Status Aparte. Riot Comando hasta a drenta cas di e mayornan di Betico na Santa Cruz na un manera inhusto. Sinembargo, esakinan no a frena of stop Betico pa sigui cu e lucha. Na aña 1978, Betico ta wordo encarcela pa 7 dia momento a haya un revolver bou di asiento di su auto, mientras nunca por a prueba cu e revolver ta di Betico. Hopi triki a wordo uza pa purba spanta Betico. Pueblo a compaña Betico, hib’e prison na Dakota e tempo aya. Betico su palabranan historico:” No tin lucha sin sacrificio y no tin sacrificio sin gloria!”.
Aruba ta logra Status Aparte:
Dia 12 di maart 1983 durante Conferencia di mesa redonda na Den Haag, Ruud Lubbers a expresa na final e palabranan historico: ”De Kogel is door de Kerk”. Akinan Betico y delegacion den nomber di Aruba a logra convence e Hulandesnan y Aruba a haya su Status Aparte entrante 1 di januari 1986, pues tabata tin 3 aña pa prepara esaki.
Betico ta wordo tira:
Dia 24 di april 1983, Betico yegando veld di Nadi Croes/Crismo Angela (veld di Winston antes) a wordo tira pa un agente policial Libier. E multitud presente y henter pueblo a bay for di control. E polisnan mester a bandona e sitio pa pueblo por a purba calma. A hiba Betico Merca y despues di varios operacion, Betico ta recupera y ta sigui cu e lucha. Finalmente, dia 31 di december 1985 rond 9 di anochi, 3 ora prome cu aña nobo, unda nos mester celebra e logro di Betico y su lucha, Betico ta accidenta, bay 11 luna den coma y ta fayece na Hulanda na un edad di 48 aña y nunca a biba pa mira su propio lucha wordo cristalisa.
Betico a laga logronan grandi atras:
Betico cu Status Aparte a logra pa Aruba tin su propio gobierno, parlamento, gobernador, procurador general, banco central, moneda, himno, bandera y ortografia. Pues, a laga un herencia valioso pa nos y manera Betico a bisa na su yegada for di Hulanda: “Laga locual nos a logra awe ta un clompi diamanta”. Dia cu nos Status Aparte mester wordo menasa atrobe, esaki ta significa guera. Danki Betico. Ban celebra Dia di Betico en grande y traspasa e bunita historia aki pa nos yiunan y nos futuro generacionnan.