Secretario General di MEP: Mike Eman a grita cu e ta orguyoso di e MEGA DEBE

Lamentablemente pueblo mester cuminsa paga e mega debe di Mike Eman y AVP

Secretario General di MEP ta lamenta e echo cu Mike Eman den Parlamento di Aruba e tempo aya como Prome Minister a “grita” cu alegria cu e ta orguyoso di e debe cu AVP a orchestra. Alabes, den su propio palabranan: “E debe t’ey pa nos tur bay pag’e den futuro”. Asina Mike Eman y AVP a maneha placa di belasting di Pais Aruba, pues presta miyones sin vision pa complace algun amigo y financiadonan di partido AVP. Grita cu e ta contento y orguyoso y baha na awa bay lagando pueblo cu e Mega Debe, esta e debe gigantesco. Na Papiamento crioyo kisas e palabra “desgraciado” ta hopi nechi ainda pa Mike Eman. 

Mike Eman y AVP a presta 2200 miyon florin den e añanan di bonanza

Secretario General di MEP ta splica cu e debe di Mike Eman y AVP ta uno cu ta PROHIBI pa LUBIDA. Mientras cu MEP a laga e debe nacional na 43% na aña 2009, cual ta bou di e “nivel” di 50% cu segun IMF ta uno corecto y saludabel. Mike Eman y AVP a drenta gobernacion 31 di october 2009 manera cu ta final di mundo a yega y a MASACRA Pais Aruba su finansas publico. Den e prome aña di gobernacion di Mike Eman na aña 2010, a presta 188.6 MIYON florin pa cera su presupuesto. Na aña 2011 Mike a presta 325.2 MIYON florin pa cera su presupuesto. Na 2012 Mike Eman a aumenta e suma aki, prestando 443.2 MIYON florin. Na aña 2013 Mike Eman a bolbe presta 332.8 MIYON florin pa tapa e buraco di su propio presupuesto. Despues di esaki, Mike Eman a presta na aña 2014 405.8 MIYON florin y aki Hulanda a cay aden, unda cu Hulanda  a laga destrui e presupuesto aki y Gobernador no a firma esaki. Mike Eman a bay den welga di hamber y a splica cu e Hulandesnan a “verkracht” e. Pues, Mike Eman yamando e Hulandesnan pa verkrachters ta prohibi pa lubida. En bes di bay Hulanda bay negocia a scoge pa bay bati weya y bebe Ensure. Na aña 2015 Mike Eman a haya e ley di CAFT den su “body” pa purba mara su mannan, pero asina mes na 2015 Mike Eman a maniobra pa presta 184.6 MIYON florin riba cabes di cada ciudadano. Na 2016 Mike Eman y AVP a presta 177.3 MIYON florin pa cera su presupuesto. Na aña 2017 ainda Mike Eman y AVP a presta 137.3 MIYON florin pa cuadra e presupuestonan di AVP. Asina Mike Eman y AVP den 8 aña di gobernacion a presta un total di dos mil dos shen (2200) miyon florin solamente pa cera nan presupuestonan, en bes di a baha gasto of maneha na drechi. Tur esaki sin crisis of sin pandemia. E criminalnan manera Mike De Meza, Bermudez, Sevinger Avestruz,  Paul Croes di  IBIS, Arthur  Dowers, Alex Schwengle, Richard Arends, Juan David Irausquin, Michelle Hooyboer Winklaar, Parlamentario y ex-parlamentarionan manera Mervin Wyatt Ras, Marisol Tromp, Baba Herde, Marlon Sneek, Desiree Croes, Lorna Verlack, Jeffrey Kelly y tur demas cu 8 aña largo a grita “VOOR” pa aproba tur e presupuestonan na werki aki ta mesun pero mesun culpable cu Mike Eman. Boso NO TIN PORDON! Boso a kibra Aruba na werki y awe kier “play” cu por salba e pais aki? Donder op! Pueblo lo keda corda boso durante cada eleccion di boso echonan. 

GABINETE WEVER-CROES ll TA LOGRA 60 MIYON DI SURPLUS

Secretario General ta splica cu pa “mala” suerte a toca Gabinete Wever Croes l y ll pa drecha y sanea un CHAOS di Mike Eman y AVP y mester a reorganisa cu creatividad pa por cuminsa paga e factura di Mike Eman y AVP y asina cuminsa paga e debe cu Mike Eman ta orguyoso cu el a crea. Gabinete Wever Croes a sinti cu mester haci esaki paso ta inhusto pa pasa e recibo aki pa nos yiunan cu apenas a nace y cu nan tin e deber di por haya un Aruba, unda nan por biba y crece cu ta manehabel. Nos yiunan cada un a nace cu un debe di 60 mil florin riba nan cabes door di e maneho cu Mike Eman a hiba. “Mala” suerte Covid-19 a bati na porta di henter mundo, mas un guera entre Ukrania y Rusia cu a afecta e prijsnan rond mundo. A lora manga di camisa y ta trahando. Presupuesto 2023 ta cera un SURPLUS di 60 miyon. Ta momento pais Aruba tin SURPLUS e por cuminsa paga su debe. Pues, awo finalmente lo cuminsa paga e debe di Mike Eman y AVP. Pueblo mester ta consciente di e situacion real pa asina Mike Eman y AVP, kendenan a scoge pa brasa corupcion y manda Aruba failliet, nunca pero nunca mas por regresa den gobernacion. Dios spaar Aruba di e mafiosonan aki!

Comunicado Secretario General di MEP Mike Eman