Secretario di Estado Alexandra van Huffelen di Relacionnan den Reino ta haci un bishita di trabao di 10 te 24 di februari na Corsou, Boneiro, Aruba, Sint Maarten, Sint Eustatius y Saba.
Durante e bishita pa cera conoci aki, e Secretario di Estado kier haña información tocante asuntonan cu ta importante pa e islanan manera siguridad di existencia, enseñansa, economia y cuido di naturalesa. Aparte di e encuentro- y consultanan oficial e kier topa particularmente tambe cu mas tanto habitante posiblel.
Pa e motibo ey tin un programa varia cu espacio pa encuentronan cu habitante- y empresarionan. Secretario di Estado van Huffelen: “Mi prome contactonan digital tabata masha agradabel. Mi ta ansioso pa tene combersacionnan personal y pa cera conoci ampliamente cu e parti Caribense di nos Reino.”
Corsou
Riba diahuebs 10 di februari e Secretario di Estado ta yega Corsou, unda e lo hiba combersacion cu Gobernador, Prome Minister, Conseho di Minister y Presidente di Parlamento. Tambe tin riba e programa un combersacion pa cera conoci cu e Comision di Reforma Nacional tocante e desaroyonan di mas aña. E Secretario di Estado ta realisa un bishita na e baraknan di stranheronan y ta bishita diferente bario riba e isla y ta topa cu habitante- y empresarionan eynan. Banda di esey tin un bishita na Plaza Bieu riba agenda. Ademas e ta ta bishita e Monumento di Tula y ta combersa eynan cu diferente persona riba pasado di sclavitud.
Boneiro
Riba diadomingo 13 di februari e Secretario di Estado ta biaha pa Boneiro. Aya e ta papia cu Representante di Reino interino, Gezaghebber, Colegio Ehecutivo y Conseho Insular. Tambe e tin un combersacion cu e Dialogo Central y e ta bishita Plenchi di Trabou y ta papia eynan cu personanan cu ta risibi sosten eynan. Riba diamars 15 di februari e Secrerario di Estado ta bishita diferente sitio y ta topa cu personanan cu ta trahando riba asuntonan manera energía sostenibel, e problematica di pobresa y construccion di bibienda social.
Aruba
Riba diamars 15 di februari e Secretario di Estado ta yega Aruba. Aki tin combersacionnan plania cu Gobernador, Promé Minister, Conseho di Minister y Presidente di Parlamento. Banda di esey e lo hiba combersacion cu director di Banco Central, representantenan di e sector turistico y mundo empresarial. Tambe lo tin encuentro cu personanan cu ta traha den cuido, tin un paseo artístico pa cera conoci cu artistanan, tin un bishita na fundación Casa Cuna riba agenda y tin un bishita na Parke Nacional Arikok. Banda di esey e Secretario di Estado ta papia hopi cu personanan cu pa medio di organisacionnan social ta traha pa Aruba.
Sint Maarten
Riba diahuebs 17 di februari e Secretario di Estado ta biaha di Aruba rumbo pa Sint Maarten, unda e ta papia cu Gobernador, Promé Minister, Conseho di Minister y Presidente di Parlamento, y cu representantenan di Organisacionnan No Gubernamental. Riba e mes dia aki, un bishita na Point Blanche ta riba e programa. Tambe tin consulta plania cu figuranan clave di e sector di turismo.Banda di esey e Secretario di Estado ta topa personanan cu a haña nan confronta cu problema despues di horcan Irma y tin un tour den cuadro di e reconstruccion. Tambe e ta presencia trabou di personal maskulino i femenino di Warda Costa.
Sint Eustatius
Riba diadomingo 20 di februari e delegacion ta biaha na final di dia rumbo pa Sint Eustatius, unda e Secretario di Estado ta papia cu entre otro e Comisario di Gobierno y e Comisario di Gobierno interino, miembronan di Conseho Insular, un empresario hoben y STENAPA, St Eustatius National Parks Foundation. E ta bishita entre otro Fort Oranje, e parke solar, un sitio di acogida di mucha y un proyecto di construccion di bibienda social, pa tende aya di habitantenan kiko nan ta haña importante.
Saba
Riba diamars 22 di februari e Secretario di Estado ta yega Saba, unda e ta combersa cu Gezaghebber, Colegio Ehecutivo y Conseho Insular. Riba e programa tin entre otro combersacionnan cu un empresario hoben y diferente habitante tocante bida diario. Durante un tour riba e isla e siguiente dia, e Secretario di Estado ta bishita entre otro proyectonan di reciclahe, un hydroponics farm, haf (incl. ferry) y un scol.