Pa e nomber di Hesus tur rudia mester dobla di esnan cu ta den cielo, riba tera y bao di tera, y cu tur
lenga mester confesa cu Hesus Cristo ta Señor pa e gloria di Dios Tata.(Phil 2:10-11).
Saulo di Tarso un homber masha sabi tabata riba caminda pa Damasco pasobra e tabata den su
ignorancia y pa falta di conocemento e tabata bay contra e palabra di Dios, pero na caminda pa
Damasco , Hesus den tur su misericordia a aparace na Saulo, y e cu henter su grupo a cay for di cabay
door di un rayo fuerte di luz cu a dal den nan wowo , y eynan e cambio den bida di Saulo a cuminsa.
Awe nos tur sa, Dios a cambia su bida y e a comberti y ta wordo reconoci rond mundo como Apostol
Pablo.
Pero tin un palabra cu Hesus a bise : Ami ta Hesus , kende bo ta persigi, ta duro pa bo schop contra e
punta nan di hero.( Hechonan capitulo 9 vers 3 -5)
Awendia tin hopi hende cu no kier compronde cu ta duro pa bay contra e palabra di Dios, pasobra ta e
final ta conta, nos por ta con grandi cu nos ta awe y fuerte den nos mes forsa, cu apoyo mundial, pero
na final tur rudia mester dobla y tur lenga mester confesa cu Hesus Cristo ta Señor.
Si nos ta bringa un bataya contra hende, nos tur sa cu a base di strategia, arma, placa, spionahe,
sancion economico, cantidad di soldad tin e chens cu nos por gana e guerra.
Pero ora hende ta bay contra e Palabra di Dios cu ta Todopoderoso, nos mester haci hopi oracion,
pasobra ningun hende cu a lanta contra Dios y su Palabra a gana nan bataya .(Hechonan 12:21-23).
Esun cu mira su prohimo ta bay den un caminda robes y no adverti su prohimo,pa arepenti ,di berdad
no stima su prohimo, y e no ta stima Dios.
Den e buki di Proverbionan capitulo 11: 2 ta para scirbi: Ora cu orguyo bini, deshonor tambe ta bini,
ma sabiduria ta serca e humildenan.
Proverbionan capitulo 16:5 ta para scirbi: Kada hende cu ta orguyoso di curazon ta un abominacion pa
Señor, siguramente e lo no keda sin castigo.
Proverbionan capitulo 16 :18 ta para scirbi: Orguyo ta bin prome cu destruccion, y un spirito arogante
prome cu caida.
Ora hende ta orguyoso, y ta lanta contra e palabra di Dios, ta contra Dios e ta lucha, no ta importa
cuanto hende ta na bo banda, no ta importa cuanto apoyo, no ta importa cu ley di mundo ta para na bo
banda, pero corda solamente cu Dios ta doño di tur cos.
Proverbionan capitulo 8: 13 ta para scirbi: E temor di Señor ta pa odia maldad, orguyo, arogancia,y
mal caminda,y un boca perverso mi ta odia.
Orguyo ta aparta hende for di Dios, y trece rebeldia hunto cune, no ta importa ken ta pratica orguyo,
tur locual ta orguyo, y especialmente ora e ta contra Dios su palabra , e ta bira algo di arepenti y pidi
pordon y bini riba e caminda di Dios cual ta hiba na bida eterna.
Ora nos mira hende ta pratica orguyo, e mihor cos pa nos haci ta hopi oracion, y como mayor nos tin
di haci oracion pa nos yuinan, pasobra orguyo ta un engaño di satanas cual ta separa hende for di Dios.
Laga nos permanece den oracion.
