No ta nada staño cu hende den tur locual nan ta haci, nan kier mustra cu ta nan so a logra, esey ta un
señal di orguyo, demostrando cu ami por, of ami sa mihor, of mi ta kere den mi mes, y hopi otro
exprecion den cual hende no ta duna gratitud na Dios pa nan logronan.
Pero ta tempo pa nos tur para keto y duna danki na Dios, pa tur locual e a permiti nos haci y pa e bida cu
nos tin, pasobra sin Dios nos no por a logra nada.Pa falta di gradicimento na Dios nos no ta mira
crecemento, pa falta di respet na Dios y dune danki den tur cos, nos ta discuti, pasobra nos kier tene e
Gloria di Dios pa nos mes, pa hende wak nos y no mira esun cu ta doño di tur cos.
Den e buki di Numbernan Capitulo 20 vers 12 Dios a mustra cla con Moises y Aaron ta keda sin drenta
tera priminti , pa motibo di desobedencia, pa motibo no kere den Dios y Santifica Dios den bista di e
yuinan di Israel , y pa keda sin duna Gloria na Dios.
Mayornan mester duna danki na Dios pa tur locual Dios ta haci den nan hogar pa asina nan yuinan por
mira e grandesa di Dios, y sabi cu Mama y Papa a wordo bendiciona door di Dios ta pesey tin cuminda
den cas, y paña, pasobra or Mayornan tin trabao ta Dios a bendiciona e obra di nan man.
Santiago of Jacobo capitulo 1 vers 2-4 ta bisa: Considera esaki como puro goso, mi rumannan , ora boso
haña boso mes den diferente pruebanan, sabiendo cu e prueba di boso Fe ta produci perserverancia, y
laga perserveransia tin su resultado perfecto, pa boso por ta perfecto,y completo sin falta di nada.
Den tur prueba cu nos por pasa , laga nos ta agradecido na Dios, pasobra Dios ta pone esun cu e ta
stima na prueba y ta disiplina su yuinan, pa asina nan crece y duna gratitud na Dios den tur cos.
Den tur e prueba cu Job por a pasa , Job a permanece agradecido na Dios.
Salmo 107 vers 1 ta para scirbi : Duna gradicimento na Señor pasobra e ta bon, pasobra Su Misericordia
ta pa semper.
1 Thesalonisenses capitulo 5 vers 17 ta bisa , haci oracion sin stop. Sea agradecido den tur cos, pasobra
esaki ta boluntad di Dios pa boso den Cristo Hesus.
Y laga nos abstene di tur forma di maldad, pasobra maldad ta haci hende orguyoso, y ora hende ta
orguyoso nan ta aparta for di Dios, y palabra di Dios ta bisa cu orguyo ta bini prome cu caida.
Un Famia agradecido na Dios semper lo tin porta habri den Dios su presencia, y esaki ta bira notable, ora
nan mira cu nan plan y proyectonan ta wordo realisa, y hasta nan salud ta progresa rapidamente,
pasobra nan ta agradecido den tur cos.
E malbado no por cu hende agradecido, pasobra nan ta pone su cara na berguensa cada vez cu nan ta
alaba Dios.
Scirbi pa Pastor Marcel Balootje. TA TEMPO PA DUNA GRATITUD NA DIOS.
