Maske cuanto un hende studia, of e tin posicion halto, of e ta rico, y e tin poder, semper e mester keda habri pa coreccion, pasobra correcion ta bini di Dios, no ta existi un ser humano cu no por wordo coregi y disiplina.
Pobresa y berguensa lo bin riba esun cu ta neglisha instruccion , ma esun cu ta haci caso di coreccion lo wordo honra, ( Proverbionan 13;25)
Rumannan hasta si un hende wordo sorprendi den cualkier delito, boso cu ta spiritual, restora un hende asina den un spirito di mansedumbre, cada un wak su mes, pa boso tambe no wordo tenta.( Galationan 6:1).
Pa nos coregi y yuda un persona sali for di su error, no ta necesario tira cos na su cara, pero necesario ta haci e persona compronde cu su actitud, no ta di acuerdo cu e palabra di Dios, y esey ta hibe na pica y rebeldia contra Dios, y cu e tin di arepenti di su pica y drecha su relacion cu Dios.
Hopi hende ta kere cu ora nos zundra un persona , nos a coregi e persona, no lubida cu hopi hende ta kere cu nan no tin fout y cu nan tin rason pasobra e sistema di mundo ta duna nan razon, pesey semper un bon splicacion, lo yuda hende cu a cay , lanta ariba bek y biba pa Dios, pasobra tur hende por haci fout.
Ora e yiu prodigo ( Lucas 15:11-32) a bolbe cas bek, e tata no a tira nada na su casa, pero e a bise drenta paden, pasobra e yiu cu tabata morto a biba, den un palabra bisa e relacion entre Tata y yiu tin mas balor cu tur placa cu e mucha por a gasta.
Ora nos ta balora cos, placa, propiedad mas cu hende, nos no por reconcilia hende cu Dios, pasobra materialismo semper lo blokea amor y fraternidad.
Esun cu ta neglisha disiplina ta desprecia su mes alma, ma esun cu scucha, ta atkeri comprondemento.( Proverbionan 15:32).
Mientras cu un hende no ta acepta coreccion y disiplina, lo e sigi cana den scuridad, pasobra esey ta e evidencia di horea duro, evidencia di curason duro, y evidencia di capricho. Solamente Cristo Hesus por trece lus den scuridad.
Den nos tur su curason tin un lugar pa Cristo Hesus drenta y trece cambio y pas, pasobra nos curazon no ta traha pa rabia, odio, arogancia y orguyo.( Revelacion 3: 19+20).
Tur scritura ta inspira pa Dios, y ta util pa siñansa , pa reprendemento, pa coreccion, pa educa den husticia,pa e hende di Dios por ta perfecto, ekipa den tur bon obra.( 2 Timoteo 3:16+17).
E enemigo di nos alma cual ta e diabel, tin hopi hende ta trompica, bisando diariamente cu nan no ta perfecto, pesey nan a cay bek den droga, inmoralidad, etc, pero e Bijbel ta siña nos cu si nos obendece e palabra di Dios , nos lo yega na perfeccion den Cristo Hesus.
E spirito di rebeldia ta move riba henter mundo desviando hende for di e caminda di Dios, y e unico manera pa nos gana e bataya, ta ora nos somete nos mes completamente na Dios, y den esey nos por resisti e diabel y e lo huy for di nos.
Riba nos mes nos no por bringa e forsanan di scuridad pero den Cristo nos ta mas cu vencedor.
Ora nos ta acepta coreccion y disiplina di Señor nos ta haci nos mes disponibel pa wordo usa pa Su honra y Gloria, pasobra Señor ta disiplina esun cu E ta stima.
Coreccion y displina ta hiba nos na obedencia, pa nos por wordo bendiciona.
Sinceramente, Pastor Marcel Balootje.