Juan capitulo 14 vers 13+14 ta para scirbi, tur loke boso pidi den Mi nomber , esey lo Mi haci , pa e Tata wordo glorifica den e yiu , si boso pidi algo den Mi nomber lo Mi hacie.
Pa pidi algo na Dios , nos mester ta humilde, mester presenta dilanti di Dios cu un curazon sincero sin ningun clase di orguyo, y nos mester ta cana den boluntad di Dios.
Pasobra tur peticion ta mara na boluntad di Dios, pasobra for di e oracion Nos Tata , nos ta siña cu e boluntad di Dios lo sea haci na tera como na cielo.
Hesus ta bisa nos cu tur locual nos pidi den su nomber, E lo hacie, pa e Tata wordo glorifica den e yiu, pasobra Hesus semper a cana den obedencia na su Tata, no tabatin ningun momento di diferencia di opinion entre Hesus y su Tata, hasta Su Morto na cruz tabata den un obedencia completo.
Den Mateo Capitulo 21 vers 22 Hesus ta bisa: Tur loke boso pidi den oracion cu Fe boso lo ricibi.
Ta tempo pa Fe wordo aumenta den tur bida y den tur cas di Famia, pasobra sin fe ta imposibel agrada Dios. Den beibel nos ta mira cu hendenan tabata viaha distancia largo, pa bin pidi Hesus pa lanta un morto, of pa cura un persona cu ta serca di muri.
Oracion na Dios nunca por wordo haci cu flohera, oracion mester wordo haci cu Fe, gradiciendo Dios pa su misericordia y gracia riba nos bida y nos famia. Ora nos ta haci un peticion na Dios nos mester hacie cu interes y humildad di nos curazon.
Hopi hende den nan momento di necesidad of malesa, nan ta pidi tur hende haci oracion pa nan, nan ta hacie tur tipo di peticion tur camnda, pero nan mes personalmente no ta ocupa den oracion.
Wak bon cu tur hende cu a ricibi un milager a acudi personalmente serca Dios y Dios mirando nan curazon y nan humildad a haci e milager den nan bida.
Den juan capitulo 16 vers 23-24 Hesus ta bisa: Di berdat di berdat mi ta bisa boso, kico cu boso pidi e Tata E lo duna boso den Mi nomber . Te ainda boso no a pidi nada den Mi nomber, pidi y boso lo ricibi, pa boso goso por ta completo.
Aki nan nos ta mira cu nos mester ta mas dependiente di Dios , cu nos ta depende di hende, pasobra Hesus mes ta manda nos pidi na djE pa nos goso por ta completo. Pero nos tin corda cu hende cu ta duda lo no ricibi nada di Dios.
Awor mas cu nunca nos ta pasa den necesidad y enfermedad y ta tempo pa nos bira bek na Dios , pasobra solamente Dios por yuda nos, den tur locual cu nos tin mester.
Laga humildad ta e yabi cu ta hiba nos dilanti di Dios cu un curazon sincero pa Dios mira nos necesidad y yuda nos, pasobra nos tur ta depende di Dios.
Ora nos yega serca Dios nos mester pone orguyo un banda, pa asina Dios por yuda nos.
Sinceramente