Palabra di Dios ta bisa stima bo prohimo manera bo mes, y si bo enemigo tin hamber dune di come asina bo ta demostra cu bo ta un berdadero yiu di Dios.
Hende ta gusta desea otro malo, y hari ora nan ta mira cos ta bay malo cu otro hende especialmente , ora tin un of otro rivalidad , hende cu mente corumpi pa maldad , ta drumi wak e momento mas oportuno pa nan herida nan prohimo cu un ofensa.
Hende nan asina nan consenshi ta kima, pasobra nan gozo ta dolor di otro, nan no tin opinion faborable na ningun momento solamente cosnan negativo ta sali for di nan boca, contra otro hende, mal deseo, y nan ta lubida locual Proverbionan capitulo 24 vers 17+18 ta bisa: No gosa ora bo enemigo cay, y no laga bo curazon ta contento ora e trompica , pa Señor no mira esaki y keda malcontento, y E kita su rabia for di riba dje.
Awendia tin hopi mal influencia den aire y tambe den curazon di hende y ta pesey nos como mayor mester siña nos yuinan con warda nan curazon.
Tur asunto di uso di droga , alcohol y matamento, no ta algo nobo , tur hende sa cu esey ta malo, pero awor e influencia pa uso di droga ta contamina mente di hubentud, pasobra diabel sa cu esey ta destructivo y ta causa dolor tanto na yiu como mayor.
Ay di esnan cu ta promove uso di droga na hubentud, cual tin hopi cu ta bende y nan mes no ta uza, pero nan ta influencia e hubentud pa uza y bira catibo, adicto y nan ta pretende pa bira rico, Dios no ta drumi.( Galationan 6:7+8+9).
Dicon Dios kier pa nos warda nos curazon pasobra for di curazon ta sali: inmoralidad, adulterio,matamento, bobedad . rabia, discucion,(Marco 7 v 21-23).
Bo curazon ta extremadamente valioso, pasobra cu bo curazon bo ta conecta cu Dios y cu hende,y si bo curazon spiritualmente ta morto, tur bo coneccion cu Dios ta para.
E ora ey nos ta morto na bida por ehempel den 1 Juan capitulo 3 vers 14+15 ta bisa: Esun cu no ta stima ta permanece den morto .
Ken cu odia su ruman ta un matado, y boso sa cu ningun matado, no tin bida eterno ta permanece den dje.
Bo cuarazon ta fuente di tur locual bo ta haci si, bo curazon no ta salu, henter bo curpa lo demostra esey. Corda bon cu e diabel ta mik henter dia riba nos destruccion, y pesey e ta trata di tur manera di venena nos curazon , pa asina nos perde nos obedencia na Dios, y rechasa Dios su palabra.
E no ta solamente opone nos, pero e ta contra tur locual ta alinia, y ofrece alabansa na Dios. Pesey e kier pone nos curazon constantemente bao di atake.
Lucas capitulo 6 : 25 ta bisa: E bon hende for di e bon tesoro di su curazon, ta saca locual ta bon y e mal hende for di e mal tesoro, ta saca loke ta malo, pasobra for di e abundancia di curazon su boca ta papia .
Ta nos deber como mayor di dobla nos rudia dilanti di Dios, y sclama na Dios pa su misericordia alcansa nos yuinan pa nan hala mas serca Dios y yena nan curazon cu Palabra di Dios, y asina Dios warda nan mente y curazon..