Nos a yega di adverti diferente biaha , cu tin un nubia scur ta pasando, y cu tur hende mester busca Dios, pasobra forsa di maldad ta aumenta, y si nos no tene cuenta cune nos lo experiencia cos nan fastioso . Pasobra e malbado ta move rond wak ken e por devora, destruyendo asina hogar y Famia.
Ta mescos cu ora bo sa cu mal tempo ta na caminda, bo ta drecha bo dak, wak bo bentana si e ta sera bon asina tambe bo mester ta interesa den bienestar di bo prohimo mescos cu bo mes pasobra esey ta mandato di Dios.
Na prome lugar e palabra di Dios ta bisa den e buki di Romanos capitulo 8 vers 14 lo siguiente :Pasobra tur esnan cu ta wordo guia door di e Spirito di Dios esakinan ta yiunan di Dios.
Pesey ora bo mira cierto practica di maldad, falsedad, capricho, negligencia, dureza di curazon ta wordo practica , bo ta puntra bo mes, ta cual spirito ta domina y dirigi e bida ey. Pasobra caminda e Spirito di Dios ta, tin husticia ,paz ,gozo,libertad, alegria y bondad.
Mayornan splica boso yuinan, cu hende cu tin e Spirito di Dios , no ta cana arma te ,pa nan ta uza e arma contra otro, sea pa herida of lamentablemente pa mata otro.
Caminda e Spirito di Dios ta no tin bullymento di ningun forma, cana den gang ( geng) comete atraco,ladronicia , tampoco tin abuso sexual di menor. Asina hubentud ta sa cu e cosnan ey no ta di Dios.
Ora cualkier persona hala for di Dios , ken cu e por ta, e ta habri porta pa spiritonan malo ocupa su mente.
Ora hende ta bao di efecto di droga of alcohol, spirito nan malo ta tuma dominio den su curazon.
Ora hende no conoce Dios, tampoco kier entrega nan bida na Hesus Cristo, y ta chercha y ta haci bofon, of ta haci manera nan ta cu Dios y nan curazon ta leu for di Dios, nan ta bira un campo fertil pa e diabel manifesta .( 2 Timoteo 3 vers 1-9)
Tur berdad nos mester wordo splika na e pueblo, pasobra berdad ta haci hende liber, y berdad ta bini di Dios.
1 Juan Capitulo 3 vers 7 ta bisa : Yiu chikito nan no laga ningun hende gaña boso , esun cu ta practica husticia ta husto, manera E ta husto, esun cu ta practica pica ta di e diabel, pasobra diabel a haci pica for di principio. Y e Yiu di Dios a parece pa e proposito aki, pa e distrui e obranan di e diabel.
1 Juan Capitulo 3 vers 9+10 ta bisa:Ningun hende cu a nace di Dios no ta practica pica, pasobra e simia di Dios ta permanece den dje. Na esaki e yiunan di Dios y e yuinan di diabel ta conoci: esun cu no ta practica husticia no ta di Dios, ni esun cu no ta stima su ruman.(1 Juan 3;15)
Awor bo ta compronde e yamada pa entrega bo bida na Cristo Hesus no ta un asunto di religion , pero e ta pa bo relacion cu Dios y asina ricibi salbacion y bida eterna.
Mirando tanto maldad, a yega tempo pa hende compromde Juan capitulo 3 vers 16-21 y entrega nan bida na Cristo Hesus y sali for di scuridad bini na luz.
Si awe bo lesa e palabra di Dios no haci bo curazon duro.