IBiSA durante ultimo lunanan a crea un ekipo cu ta consisti di docentenan di Movecion y Salud, Docentenan di scol avansa y e departamento di Deporte Escolar pa trece un plan concreto pa e espirito competitivo Inter Escolar. Despues di tur deliberacion a bin cu e plan piloto di actividad físico, deportivo y competitivo den e siguiente ehercicionan ‘Sit Ups’, ‘Squats’ y ‘Side to Side Hops’.
Tur scol a ricibi un video y un documento dia 13 di october, caminda ta demonstra con pa haci e actividadnan. Cada actividad di ‘Schoolsport Online’ ta bay ta 2 siman unda tur mucha por participa durante nan les di ‘Gym’ pa e docente tuma e momento aki pa califica e muchanan. Despues cu cada mucha a pasa door di e test e mihor tersnan di cada categoria cu ta (A) 2012 y mas hoben, Categoria (B) 2010 y 2011, Categoria (C) 2008 – 2009, Categoria (D) 2006 – 2007 y Categoria (E) 2005 y mas grandi ta pasa pa e ronda final.
Despues di graba e actividad solamente e tres mihor participantenan di cada categoria di e scol mester wordo ‘upload’ riba un ‘YouTube Channel’ of ‘Google drive’. Tambe lo ‘upload’ e score hunto cu un link pa e video riba e website di ‘Competition Corner’ caminda IBiSA lo haya acceso na e informacion.
Na momento di publica e material visual ta prohibi di pone nomber di atleta cu ta den e material visual, mester pone nomber di scol ehempel: IBiSA 1, IBiSA 2, IBiSA 3.
Na final di e tres actividadnan, IBiSA lo saca un scol campeon y sub campeon pa cada categoria.
Pa mas detaye di e fecha, disciplinanan, rekisito pa participa y con pa inscribi e scol subi e Facebook di IBiSA Aruba y ta haya tur informacion necesario.
