Dr. Horacio E. Oduber Hospital a ricibi riba diahuebs bishita di un delegacion di Ministerio di VWS Hulanda. Durante e bishita e delegacion a ricibi un bista di Hospital durante un recorido cortico compaña pa un presentacion di algun punto relevante. A trata e crisis di Covid-19 na Aruba y e retonan, cuido regional, e parti financiero y e importancia pa mantene cuido na Aruba mes. Un bishita y presentacion yena di informacion importante cu tabata bou di guia di Hunta di directiva conhuntamente cu team di specialista, team di maneho di Hospital y tambe representantenan di cuido na Aruba.
E bishita a start cu un recorido cortico riba Cuido Intensivo, sigui pa B3, esta e departamento cu actualmente ta brinda cuido na e pashentnan cu Covid-19 y alabes a sirbi como e localidad na momento cu mester a expande Cuido Intensivo. A hiba e delegacion tambe riba B5 cual lo bira e Cuido Intensivo nobo cu lo ser inaugura pronto.
A comparti data sumamente interesante cu HOH a adkiri tocante pashentnan cu a ser admiti cu Covid-19 compara cu Hulanda y Merca cu ta hiba na conclusion cu mester inverti ams den prevencion. No por a keda sin toca e tema di finansas y tambe personal den cuido mirando cu actualmente nos ta ricibi ayudo di Hulanda pero cu enfoke con ta bay hasi den futuro. HOH mes su vision ta inverti hopi mas den educacion pa personal den cuido pa nos tin nos mesun hendenan di Aruba pa traha na HOH. “Cu e vision aki ta spera cu por haya trankilidad riba e parti di personal paso como Hospital nos por ofrece hopi mas pero tin biaha door di e escases no ta logra,” asina sr. Jacco Vroegop a splica.
Pa conclui e mainta aki a papia tocante cooperacion den region na unda diferente specialista a duna presentacion kico nan ta haci pa Hospital di Aruba pero tambe den pe region. Cu esaki Hospital kier a demonstra e importancia di traha hunto y manda pashent di region pa Aruba cu meta final pa por sigui inverti den nos Hospital. Sigur mester a toca e tema un rato tocante e consecuencianan cu lo por tin a largo plaso si sigui corta den cuido medico na Aruba.
Hospital a gradici di curason VWS HUlanda pa tur loke nan a hasi pa nos mirando cu aña pasa nan manda aparato di Cuido Intensivo,material y tambe personal pa asisti nos durante e crisis cual sin nan nos no lo por a pasa door di e situacion di Covid-19. Y tambe danki pa un tremendo bishita y aunke cortico sigur sumememente fructifero.
