Den un desaroyo un tiki confuso y hasta controversial, diaranson mainta Ministerio Publico a emiti un comunicado di prensa, informando cu e caso di corupcion contra director di DIP, Haime Croes y lider di MAS, Marisol Lopez Tromp, a wordo ‘geseponeerd’. Sinembargo e dossier tin varios pregunta con ta posibel.
Sinembargo mester respeta decision di OM y esey ta nifica cu e dos sospechosonan aki relaciona cu fraude den otorgamento di tereno di gobierno den erfpacht, ta liber di tur acusacion y cu Ministerio Publico no a encontra ningun indicacion concreto y legal supuestamente den e caso aki, cu ta conduci cu mester sigui persigui e dos sospechosonan aki.
Sinembargo e decision di Ministerio Publico tambe a ser cuestiona no pa e hecho cu no a haya ningun indicacion di un of otro acto ilegal haci pa sea Haime of Marisol pero awor ta cuestiona e forma di proceder di Ministerio Publico cu no ta husto den su maneho, mirando cu no a informa nan doño di trabao riba nan posicion como sospechoso di Pais Aruba den caso Kukwisa.
Tanto e director di DIP como parlamentario di Partido MAS Marisol Tromp debidamente tabata sospechosonan den un investigacion penal y nan a ser interoga pa oranan largo pa Landsrecherche pero ningun momento a bay na detene un di nan dos of informa nan doño di trabao.
Den otro casonan conoci manera esun di Ibis di Paul Croes, caso Avestruz di Benny Sevinger y recientemente caso Flamingo di Otmar Oduber, autoridadnan a bay over na detene tanto Croes como Sevinger pa varios luna, a pone Croes den isolacion den KIA pa cantidad di siman y cu Sevinger, el a keda deteni pa casi dos luna largo. Esaki ta cende un luz cora si berdaderamente PG ta na altura cu den su propio departamento tin famia di e politico aki ta traha y tambe bij hoge pieten modelo hudicial tin hasta entregamento di curpa pa scapa cara den comunidad.
Otmar Oduber tambe a wordo hinca den prizon pa varios siman pa no stroba e investigacion andando pero den e caso di Kukwisa aki, ni Haime Croes y tampoco lider di MAS, Marisol Tromp, a wordo encarcela pa ni un dia. Ta conoci tambe cu e dos amigonan nan aki di infancia no ta for di awo ta traha hunto , pero ta tres muskitero nan tabata desde cu Marisol a cuminsa den politica di MEP e tempo ey cu fiesta a cuminsa. E tres mosketerosnan Marisol e cabes, Erol e curpa y Haime e rabo.
Un otro luz cora cu ta cende ta dicon no a tuma e kehonan di Benny Sevinger cu tur su pruebanan contra Marisol Tromp ?
Marisol a wordo interoga pa Landsrecherche pa mas cu 7 ora largo pero semper el a wordo ‘invita’ pa pasa na oficina pa contesta pregunta pero ningun momento Ministerio Publico a trata e dos sospechosonan aki mescos cu e otro investigacionnan. Banda di esaki marisol ta conoci pa ta un gañado y na varios ocasion a entrega denuncia falso.
Marisol Tromp den pasado a insisti cu e no ta un sospechoso den e caso aki pero e comunicado di prensa di diaranson merdia di Ministerio Publico, debidamente ta ser mustra cu tanto Croes como Tromp a ser trata manera sospechosonan den e caso di Kukwisa pero cu no a haya algo concreto cu por demostra nan culpabilidad supuestamente.
Tambe ta algo serio cu parlamentario di partido MAS Marisol durante cu e tabata un sospechoso pa corupcion, el a ser permiti pa sigui atende reunionnan den exterior tanto na Hulanda como Sint Maarten y otro, esta reunionnan di IPKO mustrando un biaha mas cu den e otro casonan a midi cu dos midi. Un parlamentario cu no tin respet pa su mes y tampoco e organo mas halto di Aruba cu ta parlamento y tin su hefe y no ta avisa cu e ta un sospechoso den e caso Kukwisa.
Marisol cu su cara di palo mane semper ta tribi di representa Aruba den delegacion sinta cu hende nan importante y tabata den un caso basta serio como sospecho na Aruba, esaki ta un falta di respet pa Pueblo di Aruba y Reino Hulandes.
Personanan den exterior no por imagina nan mes kende kisas lo a confia y kere cu lo ta sinta banda di un persona digno cu ta representa Aruba den exterior, esaki ta un berguensa pa Aruba pero alabes ta mustra cu ministerio publico no a percura pa informa debidamente cu e situacion den tipo di casonan asina por causa hopi daño na LandAruba.
E situacion aki ta mustra bon cla e tipo di e mentalidad maquiavelico cu e lider di MAS tin. Na varios ocasion den parlamento e la ser bisa di su berdad unda cu Prome Minister Evelyn Wever Croes a rete den varios ocasion. Sinembargo tanto prome minister y presidente di parlamento no a actua y no a coregi e situacionnan aki caminda un parlamentario ta atende reunionnan cu otro parlamentonan di Reino Hulandes, representando Aruba, mientras cu e tabata sospechoso den un investigacion penal.
Prome Minister kende tabata e minister responsabel pa DIP, tampoco a actua contra di su director Haime Croes, kende tambe tabata sospechoso den e caso serio aki, caminda su maneho tabata wordo investiga y no a tuma accion pa hale un banda mirando e caso ta andando.
Prome Minister sabiendo cu e director ta wordo sospecha di corupcion a permiti e director keda riba su puesto y no a tuma medida disciplinario temporal contra di dje tampoco y esaki ta conta mes un cos pa presidente di parlamento cu tampoco no a duna e mes un trato cu a ser duna na Benny Sevinger.
Desaroyonan cu sigur ta trece insiguridad, pero alabes ta mira bon cla e tipo di persona y mentalidad satanico cu maldad y sin dignidad ta sigui pusha pa poder causando daño y pone un mancha preto riba Aruba y Reino Hulandes.
