Un exitoso proyecto un biaha mas tabata diasabra ultimo di Aruba Doet. For di algun siman caba Departamento di Agricultura, Cria y Pesca Santa Rosa a wordo aserca pa studiantenan di Universidad di Aruba pa realisa un proyecto pa viviendanan di FCCA situa na Cunuco Abou. E proyecto ta ensera pa yuda e personanan di edad cultiva locual cu nan mes por difruta despues preparando nan plato. Algo cu nan por come practicamente tur dia. Claro sin pensa dos biaha nos di Santa Rosa semper tey pa realisa tio di proyectonan asina caminda e persona por cultivo su propio cuminda y come mas saludabel. Mesora a cuminsa mira kico lo ta e posiblidadnan pa cu e proyecto aki hunto cu e studiantenan di Universidad di Aruba cu ta Denise Rafaël,Veronica Perez, Marjory Bermudes, Shermaya Williams. For di aki a pensa cu matanan herbal cu por wordo uza den cuminda tur dia lo ta ideal pa planta na e proyecto di vivienda di FCCA. E studiantenan mes a percura pa traha tipo di bakinan di pallet pa asina por planta e matanan aden. E idea aki sra. Margareth Kelly kende tin na su encargo di e vivienda di parti FCCA a haye na su lugar pa realisa. Dibiaha nos colega sr. Ludwig Rasmijn a percura pa prepara un presentacion y guia prome na esnan cu ta biba den e casnan aki pa asina nan haya un idea y siña kico y con e matanan lo wordo planta. Esaki a tuma lugar un dia prome cu e dia official di Aruba Doet.
Riba diasabra mainta trempan sr. Ludwig Rasmijn y Randy Maduro di Santa Rosa hunto cu e studiantenan Denise Rafaël, Veronica Perez, Marjory Bermudes, Shermaya Williams di Universidad di Aruba y tambe sra. Margareth Kelly di FCCA tabata presente pa asina por efectua e plantamento di e matanan herbal na e 22 casnan di e proyecto di FCCA. Un total di 22 baki di palonan di Pallet pa cada cas a wordo traha. A planta matanan herbal manera, Toronhil, Oregano, Yerb’I Hole, mata di Mint” Spinash y Rooibiet. Simiyanan cu a wordo planta ta Lechuga, Celder Chives, Cilantro y tambe a uza gordura. Tur esakinan for di Santa Rosa pa e Proyecto aki.
E clientenan di FCCA cu ta haciendo uzo di e viviendanan aki ta masha interesa den cultiva nan propio producto pa nan propio consumo. Nan ta masha uni entre nan y sigur semper nan ta preocupa pa otro su salud.
Diferente boluntario di Aruba Doet Tabata tey presenta pa asina pone mananan hunto pa realisa e proyecto Riba e mainta ki di Aruba Doet aki hunto cu Santa Rosa, Universidad di Aruba y FCCA a conta cu bishita di minister encarga cu Sector Primario y tin cu tambe na su encargo e cartera di Adulto Mayor sr. Ursell Arends kende a hasi un bishita y pone su mes na altura y duna sosten na e studiantenan cu ta encarga cu e proyeto y pasa un rato ameno cu e grandinan cambersando y intercambia di idea. E minister a wordo ricibi pa sra Margareth Kelly di FCCA, srta. Veronica Perez studiante di Universidad di Aruba y a asina ricibi un splicacion con a bin na e idea di
e proyecto y con e mainta tabata bayendo cu cultivonan na e momento ey. Minister sr. Ursell Arends a keda masha contento di por mira e interes di e personanan y ta sigur cu tur cos lo sigui bon pa nan por tin nan propio cosecha mas pronto posibel y difruta din esaki Di parti di minister sr. Ursell Arends conhuntamente cu Departamento di Agricultura, Cria y Pesca ta bai un palabra di pabien y exito na nos grandinan cu nan esfuero pa nan por tin nan propio cultivo. Na FCCA cu a scohe e tipo di Proyecto aki cordando riba seguridad di cuminda pa nos grandinan.
