Departamento di Salubridat Públiko a pidi RIVM konseho tokante konsekuensia di e vírùs di corona kambiá pa Boneiru. Esei dòkter Marian Luinstra-Passchier a deklará. Siman pasá a deskubrí e vírùs di corona kambiá na Inglatera. “Tin poko hende ku ta bini Boneiru for di Inglatera. Normalmente nan ta bula via Schiphol, pero esei no ta bai awor komo ku for di djadumingu Hulanda a sera espasio aéreo pa buelo for di Inglatera.”
Mester investigá e vírùs kambiá hopi bon ainda. ,,Loke nos sa te ainda ta ku bo ta pega mas fásil ku e vírus akí. Ta investigá awor kua ta konsekuensianan di e vershon akí di e vírùs. I si e bakuna ku nos ta haña despues ta sirbi pa kombatí e vírùs kambiá.”
Departamento di Salubridat Públiko ta monitoriá biahero ku ta bini di inglatera i ta sigui notisia tokante e vírùs kambiá di aserka. ,,Huntu ku RIVM nos ta sigui e notisia tokante e vírùs kambiá. Pa nos esei ta hopi importante. Nos ke sa kua ta e posibilidatnan pa e vírùs nobo bini Boneiru. Si esei ta e kaso, kisas nos tin ku tuma medida. Pero nos no ta asina leu ainda.”
