Salubridat Públiko ta kontentu ku yegada di e bakuna di Pfizer pa Boneiru. E simannan akí nos ta traha duru tras di kortina pa hasi e bakunashon posibel.
Ku e kantidat di bakuna nos por pasa 2000 hende e di promé angua kontra e vírùs di corona. E bakuna di Pfizer ta duna mihó resultado despues di pasa dos angua. Djaluna e promé bakunanan ta bai Fundashon Mariadal pa kuminsá ku bakunashon di personal di kuido. E transporte ta tuma lugá den djùk spesial bou di vigilansia. Na e sitio tin siguridat tambe.
E bakunanan ta skars. Nos ta hopi kuidadoso ku entrega na e sitionan di pasa angua. A base di e kantidat di sita nos ta determiná kuantu bakuna nos ta bai kuné na e sitio di pasa angua. Ta importante ku tur hende ku tin un sita, bini na e ora palabrá i tambe na e lokalidat di pasa angua. Si bo no bini, e ora ei podisé nos por saka ménos bakuna for di un bòter. I esei lo ta hopi lástima. Si di bèrdat bo no por bini, yama e ora ei mas lihé posibel 0800 – 0800 pa mèldu esaki.
Den e siman binidero nos ta kuminsá prepará e dos sitionan di pasa angua pa hende di 60 aña bai ariba: For di 1 di mart ta pasa angua riba djaluna, djamars, djaweps i djabièrnè den Kompleho Deportivo Jorge Nicolaas na Playa. For di 3 di mart ta pasa angua riba djárason na Fundashon Cocari na Rincon.
Gustosamente mi ta konta awor kon for di djaluna 22 di febrüari boso por traha un sita via telefòn òf online pa pasa angua kontra corona.
Bo por yama grátis number 0800 – 0800 di e callcenter pa un sita. Ta hasi e chekeo di salú via telefòn. Un empleado ta bisa bo ki dia bo ta haña e promé i e di dos angua. Ta konfirmá e sitanan via telefòn òf email. Si bo no tin email e ora ei bo por duna adrès di mail di un miembro di famia òf un konosí. E callcenter ta habrí for di djaluna te ku djasabra for di 8 or di mainta te 8 or di anochi, i riba djadumingu for di 10 or di mainta te 4 or di atardi. Si bo no haña nos mesora na liña, purba un biaha mas na un momentu mas trankil.
Registrá online ta bai di e siguiente manera: riba e wèpsait https://www.bonairecrisis.com/pap/ ta bini un boton ku e teksto ‘registrá pa bakuná kontra COVID’. Klek riba e boton, e ora ei bo ta haña un formulario di registrashon ku un chekeo di salú. Ora ku bo kaba yena e formulario, bo registrashon ta kla. Nos empleadonan ta prosesá bo registrashon. Denter di dos dia di trabou bo ta haña e sita pa e promé i pa e di dos angua via email. E tempu entre e anguanan ta tres siman. Bo no por skohe riba kua dia bo ta preferá pasa angua. Riba e wèpsait tin informashon tambe kiko bo tin ku bini kuné pa e sita pa pasa angua. Bo mester bini ku un ID bálido. Uso di un tapaboka ta obligatorio. Lesa e informashon riba e wèpsait bon promé ku bo bini e lugá di pasa angua. E wèpsait ta alkansabel durante 24 ora pa dia, pues bo por registrá na un momentu ku ta kumbiní bo mas.
Bo por yama òf registrá online, si por nos ta preferá pa bo registrá onine.
