Awe mainta e caso di sindicato SADA a tuma luga den corte.Gobierno a dicidi di bini cu un Landsbesluit nobo cu ta haci cu e convenant cu SADA a firma cu Gobierno na 2017 ta cay na awa. Esey ta motibo cu e sindicato di Duana a bay Corte diahuebs mainta.
SADA a pidi Corte pa para ehecucion di e ley aki te ora cu nan keda cla cu cumplimento di e Convenant. Edward Maduro, presidente di SADA, na momento di Sali di Corte tabata hopi rabia pa e forma con huristanan di Gobierno y Departamento di Recurso Humano a trece cosnan dilanti.
E sindicato a keda sorprendi cu Gobierno di ripente, un luna pasa, director di Duana a informa nan di e ley nobo. Mesora nan a dicidi di bay Corte. E motibo ta cu si e ley drenta na vigor loke cu nan tin palabra den e Convenant pa loke ta structura di salario ta cay afo. Esaki a tuma luga mientras cu e caso di SADA contra Gobierno den bodemprocedure no a finalisa ainda.
Maduro a yama e proceso aki un falta di respet, trocemento di berdad, y no ta cumpli cu ningun regla di integridad. “Net Gobierno y su empleadonan mester para integridad. No ta tuma toch na malo pasobra nan tin cu sigui loke Gobierno ta bisa nan,” Maduro a bisa pafo di Corte.
SADA toch ta contento cu tratamento di e caso, preguntanan cu Hues a haci pa informa su mes miho di e situacion.
Dia 9 di december tin sentencia den e caso aki.
