Despues cu hopi comerciante y miles di hende a yuda, con a para cu fondo recauda pa baby Lunah?

Tabata na october 2017 cu ami y henter mi famia a contribui na un causa cu nos a kere cu tabata un causa masha bunita mes. Un concierto organisa pa recauda fondo pa Lunah, e famoso criatura tierno y masha stima na nos isla cu tin congenital heart disease (Trisomy), por a sigui haya tratamento pa su salud.

Cu hopi amor y gana masha hopi di nos a yuda, pensando cu nos aporte lo haci un diferencia grandi den bida di Lunah y su famia.
Mi ta compronde cu famia mes di baby Lunah nunca kier a sali den publicidad cu esaki, considerando cu nan ta famia hopi serca di e cantante Nydia “Dhaddy” Brokke cu a organisa e evento aki.
Pero no por ta asina cu e cantante aki cu al mismo tiempo tabata esun cu a organisa full e proyecto aki ta dal miles di hende un cara abao den e asunto aki y na final ta dicidi di keda cu tur e fondo recauda y ta somenta bay biba na Hulanda sin comunica mas cu ningun hende, ni cu su mesun famia.
Mi por a te hasta mira via e Facebook page “the light of Lunah” con 6 luna despues di e concierto aki di october 2017, ainda tabata puntra tocante e fondo aki y con e pagina tabata comparti e informacion cu nan mes no sa nada ainda di e fondonan. Algun familiar e tempo ey a te hasta expresa cu diripiente a perde tur contacto cu e cantante y organisadora aki.
E ta desapunta ami, mi famia y mi amigonan masha hopi mes y tambe ta yena nos di hopi duele pa e famia di Lunah, pasobra e ta bon conoci con duro nan ta pasa y con hopi tempo e famia aki mester lidia, buscando e salud y mihor cuido pa nan criatura Lunah.

Te awe, for di informacion di e propio famia mi ta na altura cu ni 1 Florin a wordo entrega na e mayornan di Lunah pa asina por sigui percura un cuido optimal pa baby Lunah. Esta un berguenza esaki ta!

Asuntonan asina ta importante pa expone na luz di dia, pasobra no por ta asina cu nos no ta pone personanan asina responsabiliza nan mes pa nan actonan di sinberguenza y sin escrupulo.

Y ta net personanan asina manera Dhaddy Brokke ta sigui den bida manera cu nada a pasa. Crea yen di fantasia y espectativa serca un famia honesto, humilde y vulnerable, uza nan dolor y abusa di e situacion, busca y ricibi un cantidad grandi di ayudo financiero, pero al mismo tiempo estafa nos tur y tambe desapunta miles di hende y centenares di compania local cu a kere cu nan lo tabata yudando na un bon causa, pa awe resulta cu nos contribucion financiero no a ni yega su destino.
Ta pone nos realiza cu for di un principio, e cantante aki tabata tin totalmente un otro intencion cu e fondonan recauda. No ta straña mi si pasobra lastimamente esaki ta e estilo di traha di e señora aki.
Mi ta duda cu tur e cantantenan, artistanan y musiconan cu a contribui na e concierto aki lo a presta nan mes pa participa na e estafa grandi aki.
Nos sa tambe cu varios persona cu a yuda organisa e evento aki, incluyendo varios artista cu a participa ta bon na altura di e asunto aki pero nan ta scohe concientemente pa keda keto y no sali contra inhusticia.

Prensa mester haci su trabao mihor riba nos isla. No ta solamente politica mester domina nos isla. Casonan manera esaki tambe ta importante pa pone den luz di dia. Kizas asina ainda e famia di Lunah por haya algo di e miles y miles di Florin cu pueblo di Aruba a contribui cune na october 2017? Aunke despues di tanto tempo, mi ta duda. Mi ta hopi desapunta.

Danki pa boso espacio.

Te aki e teksto.

Pasa un bon dia.

Esaki ta un opnion publico , informacion adicional ta na nos mesa di redaccion. Nomber i adres conoci na mes di redaccion.