Nos ta bay bek un crenchi den tempo awe, manera priminti algun siman pasa, dia nos a reanuda
nos skirbimento di relato, despues cu e laptop a cuminsa traha bon bek. Nos ta bay dal un keiro
na Hulanda, Tilburg, den e luna di Juni 2024, dia cu tawatatin e celebracion di “Dera Gai”y
prome cu e dushi fiesta ey a cuminsa, tawatatin un “Hersengymnastiek” cu participacion di 6 of
ta 7 grupo di 5 persona cada grupo. Mi casa y ami, tawata na Hulanda pa pasa vakantie cu nos
yuinan y nos nieta y nietonan y a wordo invita dor di nos yui pa join traha nos grupo pa participa
den e Hersengymnastiek. Y asina a sosode. Nos tawata tin dos grupo di 5 persona cada un , y nos
grupo consistiendo di Opa, Oma, Manuh, Edward y Rene a sali como ganador maximo y a
accepta nos bunita trofeonan cu hopi alegria. Nos grupo tawatatin e nomber :”Jolly Pirates”. Na
di dos lugar a sali ganador “Biba dushi” y na di tres lugar e grupo di mi otro yui homber bau di e
nomber “ Breindhoven”. Tawata un dushi atardi hopi gezellig mes, cu benta di dushi pastechi,
croket y sopi oester e.o. y refresco pa refresca e garganta. Lady Ruth tawata hopi contento di a
topa cu Sra.Lourdes Martis Bermudez “Uti”, cu tambe tawata cu vakantie na Hulanda cu su
famia, y kende a guia pa un tempo e museo “Cas Tantin” den curason di Noord na Aruba cu hopi
amor y carino. Nos por a goza di Sr. Luis Figaroa, cu a toca su accordeon trese hopi dushi
ambiente e atardi ey na Tilburg, despues cu Sr. Sidney Kock a hiba palabra den nomber di
ministro Ady Thijssen. Hopi tawata esnan cu a bayla cu e palo den nan man pa gara e gai. Sra.
Rasnaly Carti a dirigi full e programa di e Hersengymnastiek cla y raspa cu ayudo di su
asistentenan, y Lady Ruth a sinya hopi e atardi ey, di e preguntanan interesante cu a wordo lanza.
Tawata un atardi hopi pret cu hopi harimento y un ambiente dushi entre e arubianonan y otronan
cu tawata presente. Leu foi cas, pero cu curason pa un di nos tradishonnan cultural “Dera gai”.
Nos ta conclui nos relato mandando un pabien diki gordo grandi pa tur, pero tur e zuster y
broedernan di Wit Gele Kruis, Zorgwijk, Paradera y tur den e otro barionan, cu ta carga e
organiacion aki hasiendo nan trabao cu hopi amor y carino pa cu e cuido pa e.o.nos grandinan na
cas. Nan ta move di bario pa bario y ta hasi un excelente trabao ! E fundacion Wit Gele Kruis a
caba di celebra nan di 65 anivsersario ! Ora Lady Ruth a bay cumpli cu e parti financiero pa e
cuido di su dushi grandinan, ela bin topa cu e lugar tur na blaas y e number 65. Lady Ruth a
hanja un cupcake masha bunita dorna y masha dushi mes y a sinti nan alegria den nan
celebracion ! Esaki ta pa nan :”WIT GELE KRUIS 65 ANIVERSARIO 28 JULY 2024
W it Gele Kruis cu 65 anja di existencia
I n igualabel den nan bon trabao pa comunidad
T ur nan zuster y broedernan ta traha cu amor pa nan prohimo
G randi den nan pasenshi
E trabaonan ta keda cla
L eu of serca den bario nan ta
E atencion cu carino duna
K uido profeshonal pa nos grandinan
R ond Aruba den tur bario y districto
U n team magnifico di sernan precioso profeshonal
I cu curason ya den oranan di mainta tempran
S honnan, danki pa boso bon trabao, pa boso nos ta bati man !
Danki pa lesa nos relato di e siman aki. Pasa un dushi dia yen di sabiduria den nos alegria !
