Cu un cordial saludo pa un feliz dia yen di sabiduria den nos alegria ! Awe nos lo conta boso un crenchi di e dushi anochi di Poema cu a tuma luga recientemente na Maggys situa den Caya Betico Croes, den nan sala parti patras conoci como “Cunucu Cafe”, banda di CMB bo banco amigo.
Hopi hende, entre nan, artista, poeta y escritornan, amante di poema. Hopi a recita nan poema cu algo di e tema “Wall flower”, un persona verlegen of shy, cu ta den background sin haya su debido atencion di esunnan rond di dje. Algo asina. Lady Ruth tambe mester a busca den diccionario pa haya sa un crenchi mas di e tema aki bou di e titulo “Wall flower”.
Nos grupo di amiga a yega mas tempran pa por a gosa di un Tour priva duna pa Sheelah di Maggys di e asina yama :”Pop op”di Frida Kahlo, un artista y poeta mexicano cu un bida impactante y impresionante. Un bunita expo den nan sala na banda , Maggys ta un di e luganan di mas bieu ariba nos isla cu ta bende e perfumenan di mas dushi di tur parti di mundo.
Asina tambe nan tabata tin e perfume cu ta carga e nomber Frida Kahlo. Nos por a gosa di e “warm up song”di Ryan Maduro ariba guitara cu canto di Angela Croes. Angela, como artista tabatin tambe obranan masha bunita di botternan pinta tur color cu cara di Frida Kahlo ariba nan.
Nos por a admira otro obranan di arte traha na man di varios otro artista, e.o. Cuadranan pinta pa .Belinda de Veer. E anochi di Poesia a cana hopi bunita atrobe y tabatin musica jazz masha bunita atrobe di Carlos Bislip y amigos.
Y e hoben guitarista fantastico Jayden Richardson. Na nos mesa cu Milly, Yvette, Verna y Ruthy nos a goza di dushi johnny cake y cheezeballs di Kulture Kitchen y nos a goza di un par di wijntjes cu a baha hopi bon mes. Manera ta e tradicion cu Lady Ruth, nos a inspira un bunita poema prosa relaciona cu e tema di e anochi ey y e biaha aki un bes mas nos bon amigo tremendo MC Leo a tene e paraplu colorido di Lady Ruth, como su toke artistico di reparti blessings cu por baha for di ariba, pa e spat tur rond y inspira tur cu un crenchi amor y alegria. E ambiente den Cunucu Cafe di Maggys tawata tremendo ! Hopi great pa a topa tambe cu Audrey, den bon salud , hunto cu su pareha, goza tambe di tur e presentacionnan di e varios poetanan presente.
Ki bunita tawata e poema di lieve mooie Yakari, despues di basta tempo sin tendele recita. Yakari tin , segun mi a lesa, un buki nobo on line titula :”Bread and butter”” causando exito. E ultimo Poetry Night lo tuma luga dia 20 September na Alfies patras na banda di Aruba Laundry den curason di Oranjestad, cu Open Mic henter anochi. E tema ta encuanto posibilidad nan. Algo positivo y bunita sigur ! “”People, let’s shine again with our spoken words in love and positivism” ban sigui briya den nos Arte di Palabranan poeticamente inspira y expresa!
Danki pa lesa nos relato cu atencion, pasa un dushi dia yen di sabiduria den nos alegria ! Un bearhug pa boso di Lady Ruth. Ban sigui sembra cosnan positivo, bon y bunita pa nos cosecha tambe tambe ta positivo, bon y bunita ! Dios ta bon, Dios semper ta bon ! Skirbi pa Ruthy “Lady Ruth”Vrieswijk-Bergen
