Y asina un siman nobo, un dia nobo ta habri lagando bunita recuerdonan atras pa nos
miembronan trahando den Prensa, cu a celebra nan weekend cu hopi alegria. E dia mes mes 1 di
September a pone tur reflexiona ariba nan trabao importante y impactante den informa pueblo
oyente, televidente y of lector cu e noticianan di dia, e noticianan local y of internacional cu ta
laga nos di akibandanan di mundo tambe sa kico tur ta pasando eyfonan. Lady Ruth a traha den
Prensa pa hopi anja den anjanan setenta, ochenta, nobenta, te cu anja 2010. Aunke ta basta anja
pasa, e tin hopi bunita recuerdo di tur e trabaonan cu e la hasi na Radio Kelkboom, Radio Carina,
Radio Galactica y despues bek na Radio Kelkboom cu e.o. e programa “Dushi Awasero
Musical” pa 30 anja y pico. Su base y formacion den radio difusion Ruthy Bergen a hanja for di
e maestro Don Carlos, carinosamente yama Cayochi. Na Radio Kelkboom ela traha cu Eta Thiel,
Dina Ras, Diana Antonette, Louis, Eddy Tromp (awe dfm) , Alex Arends, Ruben Garcia ( dfm),
Ito Tromp, Sergio Tjie a loi, djies pa menciona algun. Na Radio Carina nos a traha cu Angel
Kirchner (dfm), Jane Gomez (dfm), Melva Peterson y Marie Bowen, djies pa menciona algun y
na Galactica FM a traha cu e.o. Nilka Franka, Chando Colina , Freda Maduro y DJ Alah. E
mundo di prensa ta un mundo hopi varia y excitante. Un dia tin noticia bon, otro dia tin noticia
malo etc. Tin noticia cu ta muri mes ora, y tin noticia cu ta keda bibo mas largo. E parti pret na
Radio Kelkboom, ora cu Lady Ruth a lesa noticia y pone e accento robes ariba e palabra
economico y a bisa economieko cu e accento riba “mie” enves di ariba “no” di economico. E
pastor hulandes di e tempo nan ey a hala Ruthy su atencion e siguiente dia ora ela bin graba su
predicashi pe siman ey. Un harimento ! Nos a goza y hari tambe cu Rincon Boyz nan dushi
presentacion den fin di siman tray lomba na Plaza Café, y a zoya wapa un crenchi cu amiga
Stella Toppenberg, un di nos dushi hendenan cu gusta alegria . Despues cu Corma, Stella y ami a
wak e bunita pelicula “It ends with us” tocante pone fin na e circulo vicioso di abuso fisico den
famia, nos a bay goza un crenchi di e dushi musica alegre y contagioso di e banda musical
Rincon Boyz. Great pa wak amigo comediante musico artista cantante Bashaka den accion cu su
banda. Hopi hende para ta move baila ariba nan dushi ritmo y asina tambe Lady Ruth y Stella a
cuminsa zoya wapa cu mas hende den e publico, mientras amigo den prensa Rexx tawata saca
potret y graba cu su cellular. Hopi nice despues ora a topa tambe cu Luciano y e propietarionan
di Kaninis Restaurant na It’s 5 oclock somewhere na Reinassance Market Place, den dushi
ambiente. Parkinglot tawata tjokvol di auto, di tanto hende cu a bay presencia e “Gospel concert”
di e partido politico AVP cu segun nos por a wak ariba fb tawata un exito total, cu cantamento di
mariachi tambe pa Sr. Mike Eman, nan lider, kende ta cumpli anja dia 1 di September. Nos
pabien pa tur di Centro di bario Brazil pa cu nan bunita celebracion cu nan actividadnan
folklorico, nan parada di lanterna y tur otro actividad cu nan a tene, e.o. e dushi songfestivalnan.
Teniendo asina nos cultura bibo bibo ! Pabien y danki Fundacion Chico Harms y na tur cu a
participa den e dushi y bunita actividadnan ey. Hopi inspiracion y creatividad den tur e trahenan
folklorico . Una beyeza ! Hey, nos espacio a yena caba, danki pa lesa nos relato di e siman aki y
pasa un bon y dushi dia yen di sabiduria den nos alegria ! “Un bearhug pa boso tur “ Dios ta bon,
Dios semper ta bon ! Corda duna Dios danki pa salud, pa bida, pa cuminda, pa trabao, pa famia y
pa su proteccion y guia !
