Bon Anja ! Shonnan tur, un bon 2022 colma di salud, amor y hopi sabiduria den nos alegria.
Nos tambe a subi e vuelo 2022 cu destino mas salud, mas amor, mas felicidad y mas sabiduria den nos alegria dia pa dia di nobo atrobe. Mas lesnan pa sinja y mas experiencia pa pasa aden. Ta manera tempo no a para keto pa largo, pero, a drenta nos mente, alma y curason pa nos sigui stima, sigui pordona y sigui padilanti cu nos fe y speransa. Scuchando e pagarranan y klapchi cu a resona mei anochi di 31 December pa 1 di Januari nos lagrimanan a bolbe bira prioridad enves di mi wak e vuurwerk colorando shelo cu su bunita colornan den formanan alegre di strea y mas. Den e paar di minuutnan cu e cambio a tuma lugar, nos curason tawata cu tur cu mi ta stima. Leu of serca di cas. Esnan cu a bay nos dilanti hopi anja pasa y esnan cu a bay nos dilanti recientemente, hasi poco tempo, ainda fresco den nos memoria, un mixto di tristeza den e alegria.
Y tempo a para keto un rato. Tempo balioso pa nos por a reflexiona cu nos tawata drentando un otro anja, sin sa kico tur e tin warda pa nos . Lady Ruth y su kerido esposo , e anja aki, ta subiendo nos trapi di nos di 45 aniversario di boda den e ultimo luna di 2022, pa ser exacto dia 21 di December 2022. E anja aki, Dios mediante, Lady Ruth lo cumpli 65 anja di edad den e luna di Juni, un cifra bunita den un curpa bastante bon den condishon y cu un mente hopi biaha di 20 anja di edad, pasobra, p’e, ta manera ta “ayera” tur cos bunita a cuminsa den su bida. Ta manera ta “ayera” ela habri su curason pa Jesus su lus divino. Ta manera ta “ayera” ela drenta e barco matrimonial cu Johan, ta manera ta “ayera” Ruthy a bira mama di su dos yui hombernan. Asiiina hopi bunita memoria pa inspira di nan tur dia. Claro, cu su “ups and downs” pero, e alegria ta inmenso y grandi ! Manera milagernan inexplicabel cu logronan bunita.
Cu hopi gradicimento nos lo sigui e pasonan lento y firme den 2022, cu su mesun bailenan suave, poco poco manera un dushi wals, of manera un tumba cayente yen di zjeito y alegria. Manera mi siguiente poema ta expresa :
UN BISTA
Ora mi tira un bista den mi diccionario di bida
Hopi bes mi ta lesa pa suerte e palabra “stima”
Mi ta sigui keiro y dwaal den e paginanan di e buki
Mi ta subi e trein of avion pa tira un miho bista
Riba mi alma flotando den mi propio man
Ta manera ta ami mes ta e capitan
Mi barco ta baila hunto cu e olanan di lama
Mi ta realisa cu ta asina dushi ta pa tin ruman
Mi ta realisa cu cualkier palabra cu bin
E momentonan ey na mi mente
Tin e comprobacion di mi curason…..
Atraves di nos oracionnan diario, Bon Dios lo sigui tira un bista riba su yuinan, su pueblo, su isla.Nos por sigui duna un man na nos prohimonan ruman y asina bira un mihor hende cada dia.
Lady Ruth no ta cansa di bisa esey, pasobra, ta asina so nos tur por sa di ta mas felis. Felicidad ta depende di cada un di nos mes. Danki na tur cu ta lesa nos relato, danki na amigonan miembro di prensa pa otro bunita cooperacion di curason den publicacion di nos relato den 2022.
Bon anja pa boso tur y boso famianan ! Bon anja ARUBA !!! Un felis 2022 !
