Cu bendicion di Todo Poderoso Tata Dios pa nos tur cu bon salud, y sabiduria den nos alegria !.
Sperando, cu e siman aki lo tin un espacio pa nos relato nobo. Despues di nos ausencia den corant pa varios siman, simannan interesante y importante pa nos isla. Desaroyonan tumando lugar na bienestar di tur. Mientrastanto e covid-19 corona virus ta bahando cabes mas y mas, cosnan normalisando poco poco. Turistanan bishitando nos isla na boshi atrobe, cu trabao atrobe pa esnan den “horeca”, esta pa esnan trahando cu tur cos cu tin di haber cu turismo, poniendo pan ariba mesa atrobe pa hopi famia. Aunke tin cu ta den necesidad di ricibi e fase y of subsidio ainda
Naaaah, nos no kier papia cosnan politico, pueblo a papia, awor wardando cu pasenshi pa e formacion di nos gobierno nobo. Lady Ruth por a vota pa ken cu e kier, manera tawata e caso cu tur cu nan mesun derecho di voto, pero ta apoya tur esnan cu lo bay den gobierno pa traha pa pueblo. Difererncianan den color mester wordo poni un banda awor y pueblo por cuminsa reza na Dios pa tur cu a wordo escogi pa sirbi pueblo, pa nan tin e sano huicio, sabiduria y capacidad pa ehecuta puntonan positivo riba e programanan di e partidonan, na bienestar di tur. Pa motibonan fuera di nos alcanse, Lady Ruth no por a presencia y participa na e Anochi di Poesia cu a tuma lugar diabierna dia 2 di Juli ultimo den curason di San Nicolas, na Kulture Café. Nos ta spera cu e anochi tawata un bunita atrobe, yen di inspiracion y palabranan bibo cu ta toca e curason, mente y alma. Mientras nos ta type nos relato, nos por goza di e vuurwerk tumando lugar na Merca cu nan celebracion grandi di nan di 245 anja di independencia. Bunita programa riba tur canal di televishon cu cantamento etc. Lady Ruth a scoge pa bai Kerki Diadomingo mainta y a goza di un bunita sirbishi. Tambe nos a probecha den weekend pa bishita e baratillo grandi di “La Linda is back” y a probecha di cumpra cosnan cu no mester, hahahahahaha. Tur cos na 75 % di discuento no ta algo cu bo ta hanja tur dia ningun caminda riba nos isla. Naaaaah! No ta berdad ! Nos ta corda e mega sale di Guiselle Dept. Store cu cosnan na prijs di Afls. 1,- pa cada cos, panja, shimis etc. hopi anja pasa cu un di nan aniversarionan. Ta di comprende cu La Linda tawata bastante yen di cliente, tur cumprando cosnan na prijsnan di ganga. Ora nos a yega, tawatatin un fila largo pafor, wardando nan beurt pa drenta.(Nos a bay bolbe.) E team dinamico di Van dorp y De Wit Stores a yuda paden y a hasi un tremendo bon trabao asina tur cos a cana bon y ta claro cu , cu un baratillo di e magnitud aki, clientenan ta laga cosnan bruha un crenchi aki aya, ta pas panja riba nan panja cu nan tin bisti, y e clientenan tawata logra hanja nan zapatonan den nan caha. Por ripara cu e label cu prijsnan riba e productonan tawata hopi blikia, di tanto warda den e edificio.
Un di nos par di slofnan cu un hilchi un tiki diki halto, di e marca Hush Puppies, su paden ya a casca despues di un bisti Diadomingo atardi , pero e ta hente y e ta hopi confortabel. E banda casca ta bau di planchi pia. Kemen, ta mi teentjienan so sa e secreto aki pa tapele cu nan smile !
Tawatatin fila di cliente cumprando full un of mas rol di tela. Nan a bende hasta e stoelnan cu tawatatin eyden y rekinan di pone articulonan riba nan. Lady Ruth a goza cana keiro y tira bista tur caminda den tur skina y a logra hanja hasta algo pa e nietonan . Pero, esnan cu a goza di Lady Ruth su One Woman Shownan Alegria di Ruthy y Alegria di Ruthy 2, sa, cu un di su hobbienan ta bishita lugarnan cu tin sale grandi y pasa ratonan agradabel ta wak kiko asina e por cumpra na smak pa un bon prijs. E por regala famia y of amigonan algo. Nan a anuncia baratillo di La Linda is back pa unicamente dos dia y pueblo a responde. A topa varios caranan conosi, kendenan tambe a hasi uso di e oportunidad fabuloso aki, di cumpra cu 75 % discuento riba tur tur tur cos.
Danki pa lesa nos relato, pasa un dushi dia cu sabiduria den nos alegria ! Stay safe ! Cuida curpa, mente, alma y curason ! Y….un bon siman nobo productivo, positivo cu hopi amor !Love you too.
