Saludos ! Y asina nos a drenta e luna di Mei, e luna di nos Mamanan. Pero prome cu nos felicita nos bunita y dushi Mamanan, nos ta remarca toch algo cu a pone nos pensa awe tardi, ora nos tawata core rond den auto keiro un crenchi y mira algun bandera ful hisa y no na half stok manera debe ser awe dia 4 di Mei, “Doden herdenking” , pa tur cu a fayece desde e Segundo Guerra mundial, locual a pasa rond di e anjanan y den e anjanan ey ,esnan cu a hasi sacrificio pa nos.
Lamentablemente tur di gobierno lo ta ocupa cu campanjanan politico y no a corda comunica cu e departamentonan cu tin palo di bandera y bandera, pa a laga hisa esakinan awe ariba e dia aki di “Doden herdenking” – half stok?. Jammer noh ? Un di nan cu a bini na nos mente y curazon ta Boy Ecury, nos heroe den felis memoria. Enfin, pa algo mas alegre, nos ta goza Radio Galactica FM cu su dushi cancionan pa cu Dia di Mama cu nos por a scucha awe tardi y esey a pone nos corda Radio Kelkboom y Watapana Recording Studio tempo di nan tempo cu grabacionnan bunita di artistanan local cu nan cancionnan nobo pa cu Dia di Mama. Famianan cu ya no tin nan mama stima mas cu nan den e bida aki bao, lo recorda nan bunita y dushi mama den nan mente, alma y curason. Of atraves di un of otro oracion . Consuelo y amor na bosonan tur ! Lady Ruth y su 3 ruman hombernan tin e bendicion grandi ainda di tin cu nan na bida ainda, nos Mama Y nos Tata. Nos dushi y bunita Mama of Mayo pa e nieto y bisanietonan, Sra. Petronilia Mercedes Bergen-Tromp na luna di April ultimo, dia 10, a cumpli su di 85 anja di edad y den bastante bon condicion di salud. Danki na Wit-Gele Kruis y na Tia Loly di Beauty salon Loly pa cuido di hunja y cabei regularmente. Danki na Tanta Gala pa e dushi komkomber stoba regularmente.
Mayo cocochando un crenchi cu su sucu y canando cu su looprek, pero e sa ken ta ken y ta tuma bida cu gradicimento Dia pa dia cu gracia di Dios. Nos ta bishitanan tur dia of yama na telefoon, hiba cos bon pa nan, combersa cu nan, hiba nan keiro cu nos den auto regularmente cu hopi amor y carino. Cu un danki diki gordo pa mi casa stima Johan como chaufeur.
Nan ta gusta wak y goza di e bon partidonan di futbol na televishon of scucha nan musica dushi di Mariachi y Gospel. Contento cu nos tin miembronan di famia cu ta duna un man den nan cuido y cuido di cas y algun cu ta percura pa cumindanan crioyo dushi saludabel. Nos ta hopi bendiciona.
Tur rond di nos por tende, pa cuida y duna bo Mayornan atencion si bo tin nan ainda na bida y esey ta nos conseho tambe pa esnan cu tambe tin nan ainda na bida. E luna di Mei, luna di Mama ta dobbel special pa Lady Ruth cu cumpleanos di su yui homber mayo Rene, cu tawata su prome regalo den e luna di Mei, cu a hasi Lady Ruth mama pa cu dia di mama 43 anja pasa. Despues ela hanja su di dos yui homber Jean den luna di Augustus, 40 anja pasa. Shonnan, ban demostra nos Mama, nos Mayo, nos Mamie, nos Machi, nos Madu, nos Madushi, nos Mamai of con bo ta yamele, cu extra amor y carino atrobe Diadomingo dia 9 di Mei, Dia di Mama, y tur otro dia cu ta sigui. Sea abo e regalo precioso p’e cu bo bon comportacion y bon ehempelnan, cu bo talentonan , como regalo bek na Dios tambe. Y si bo por, un carino chikito, un perfume, un bunita bata bistir pa bisti na cas of algo otro cu e lo keda contento cu ne. Algo p’e, no pa cas. Pasa e dia hunto, come hunto, combersa. Duna Mama un dushi dia yena cu momentonan pa nunca mas lubida. Bon Dios, sigui drama bendicion di alegria y sabiduria riba tur nos mamanan, grandi of hoben adulto, soltero of casa colma cu salud pa por sigui educa y forma nan yuinan chikito of grandi den bo amor y luz eterno. Amen. Pabien Mamanan ! Danki Mama, pa ta un bon Mama !
Cu amor di tur Mama su yuinan, nieto – y bisanietonan na Aruba y na Hulanda. Nos ta stima Mama ! Nos ta stima Mayo !
