Nos a habri e siman aki, Dialuna dia 26 di April, cu un oracion di danki y pabien pa nos tata di cultura Juan Chabaya “Padu” Lampe den feliz memoria, cu a cumpli 101 anja di edad. Awor mas serca di mente, alma y curason. Ya ta dos anja cu Padu a bay uni su mes cu esnan cu a bay su dilanti den e Reino Celestial cu angelnan wardador. Si tur cos a cana bon, por a disfruta di un otro programa “Padu Eterno” na un of mas canal di televishon Dialuna anochi, dia di Padu su fecha natal. Nos ta felicita su yui muhe Vivian y nieto Dr. Urwin Anaya y nieta Sonia Anaya cu ta sigui padilanti cu cosnan bunita di Padu, entre otro e cantamento y tocamento di piano. Diadomingo dia 25 di April ultimo, Lady Ruth a bishita un bunita exposicion na Atelier’s 89, di cuadranan pinta y obranan di arte “printed” ariba tur sorto di material. Di palo, pa papel, pa plastic selofan pa linolium entre otro. Obranan representando palo di mata, cara of curpa y mas.
Nos por a admira obranan bunita di entre otro e artista Lupita Bernabela y Estele Thode. Den e cuadranan di caranan gigantesco nos por a admira entre otro un cuadra di Ann Angela.
Nos pensamentonan a dual bay ariba Padu Lampe , su cuadranan, su bukinan y su dushi musica ariba piano. Tawata un anochi cu a cuminsa cu bahada di solo nan ey, den careda di 6.30 pm cu palabranan di bon bini pa e director di Atelier’s 89 e artista Elvis Lopez,Lupita Bernabela cu a yama tur e participantenan den e workshop di “Printing” padilanti, kendenan a sigui e workshop pa un luna mas o menos y tambe Rudy Lampe a hiba palabra. Tur e artistanan participante a briya cu nan obranan unico y diferente. Y esey tawata tambe den e palabranan di Sr. Rudy Lampe, kende a bisa cu creatividad ta algo importante den e temponan aki di covid pasobra hende ta hopi na cas, cu tempo pa crea arte tambe. Su bunita sra.esposa Sandra, tambe a sigui e workshop di “Printing” y Rudy Lampe a bin pa apoya su sra.esposa naturalmente.
No tawata falta snacks y algo dushi di bebe, cu musica di un dj den fondo.
E siguente actividad pa expresion, e biaha aki den arte di palabra, ta e Anochi di Poesia cu lo tuma lugar Diaranzon dia 28 di April den e Jazz Café net patras di Flor di Oriente den centro di Oranjestad, pa 6 or di atardi. Talves ela pasa caba, si e relato aki sali publica despues di dia 28 di April. E tema e biaha aki ta “The beat generation”.
(Awor aki tin 8.30 pm Diadomingo anochi, nos ta bek na cas, despues di nos bishita na Atelier’s 89.) Mayoria bes nos ta mail nos relato Diadomingo anochi laat y si nos tin suerte nan ta traha riba dje Dialuna den dia y publikele Diamars of un otro dia den siman. Diamars dia 27 di April ta Dia di Rey, un dia liber officialmente toch ? Shonnan, ban sigui cuida, ban sigui duna Dios danki pa cada dia regala na nos, pa salud, pa amor, pa paz, pa pordon, pa alegria y sabiduria.
Nos pabien na tur e artistanan pa cu nan bunita obranan den e arte di printing, nos palabranan di exito na tur poeta y escritor cu lo of cu a participa den e “Poetry Night” di e luna aki di April, posibel danki na e fantastico cooperacion y ayudo di Prins Bernhard Cultuur Fonds Caribisch Gebied. Danki na prensa pa publicacion di nos relato, y danki na lectornan pa lesa nos relato.
Pasa un dushi dia cu sabiduria den nos alegria ! Un bon siman. Te un otro oportunidad.
