Saludos ! Un “bearhug” pa tur cu a puntra pa nos, cu a hanya nos falta. Pa motibo di otro compromisonan, nos no a alcanza nos relato e ultimo par di simannan, pero, awe nos tey cu hopi amor y carino den bo corant favorito . Nos lo comparti un crenchi cu boso, encuanto un dushi actividad di Poesia cu a tuma lugar virtualmente na nos ruman isla Bonaire, recientemente. Hopi bunita mes !Linda Coffie, Ubaldo Bubu Anthony, y Dokter Blauw entre otro. Hopi great !
Nan anochi di Poesia ta hiba e nomber “Luna Yen”, pa motibo cu ta riba e anochinan cu tin luna yen, e Poetanan y Escritornan na Bonaire ta bini hunto na un lugar den kunuku, den aire fresco cu luna yen. Nan ta varia di cas pa cas tur biaha, segun e curason ta dirigi. Tawata un dushi sorpresa pa Lady Ruth, pa por a participa den nan di 17 aniversario 2021 cu Luna Yen, pa prome biaha, ya cu esaki tawata virtual. Nos a graba nos dos poemanan y a “forward” e pa Sra. Magasu Lady Bratz. Nos bunita amiga colega Poeta Escritor Munye Oduber Winklaar, naci na Bonaire, pero biba aki na Aruba ya pa hopi anja cu su dushi y bunita famia, tambe a participa, y un colega Poeta mas di Aruba ( No ta corda nomber) y na final di e anochi Munye a duna splicacion con Luna Yen a cuminsa 17 anja pasa. Nos pabien na comishon organisador di Luna Yen cu nan prome fabuloso y fantastico anochi di poesia virtual, cada poema tawata unico y impactante, cada storia a laga nos cu smak pa mas ! Danki cu nos por a sigui boso na Aruba tambe. Na Aruba nos tin anochinan di Poesia bau di e nomber “Poetry Night”, tambe habri pa tur cu ta gusta poesia, tur cu ta gusta comparti di nan talentonan di skirbi, cu temanan hopi varia. Pa locual falta na Poetry Night aki na Aruba, como 6 anochi si mi no ta kiboka, tur ta posibel danki na e fantastico cooperacion financiero di Prins Bernhard Cultuur fonds Caribisch Gebied. Nan ta wak e importancia den specialmente e hobennan cu nan expresionnan di temanan cu ta na nan curason. Segun nos a comprende di sra. Maria Silva Hart, e curason di Poetry Night aki na Aruba, tin tambe oportunidad pa riba e ultimo Diaranzon di luna, durante un asina yama “Open Mic” cu Poetanan por bini hunto pa expresa nan mes y comparti palabranan den e arte di skirbi na localidadnan varia cada biaha, pues cada biaha na un otro lugar, cu cada ves mas inspiracion !
(Por inscribi na Basha Foundation facebook page,cu ta e fundacion aki na Aruba cu ta organisa e anochinan di Poesia aki ) ( Por sigui Basha Foundation riba face book page ) y mayoria biaha e simpatico y gentil caballero Leo Phillips ta fungi como Maestro di Ceremonia. Ta interesante pa wak, cu mas y mas hobennan ta bini pa comparti e arte di palabra den e idioma mas serca di nan curason, pues un anochi varia di idioma cu poemanan impactante y comparti esakinan cu henter comunidad.gruponan di tur edad, y tur background social, pasobra ta comparti nan preocupacion y nan emocionnan libremente cu tur. Manera e dicho ta bisa :”Communication is the key”.
Specialmente awor den e temporada di Covid-19 cu e problemanan cu esaki por trese cu ne y afecta hende mentalmente cu affliccionnan cu por wordo comprendi y scucha. Pesey ta asina importante y essencial cu a logra hanja e yudanza financiero di Prins Bernhard Cultuur Fonds Caribish Gebied pa cubri e gastonan, pa asina por sigui reuni y expresa, inspira otro, ta un apoyo pa otro den e arte di palabra cu ta bira bibo ora bo papia di dje. Basha Foundation y e comishon organisador y tambe tur Poeta y Escritornan ta masha masha gradicido na Prins Bernhard Cultuur Fonds Caribisch Gebied, danki na nan “ Kids starter program cu ta yuda presenta arte cu a wordo afecta durante e Covid-19 , nos lo por trese tur 6 anochi di Poesia pa e publico pueblo di Aruba “
Den nos relato e siman aki, algun pic bunita di e Poetry Night di luna pasa den e bunita hardin di famia Mansur , e artista Fernando Mansur, den curason di Eagle . Tawata un anochi bau strea y rondona pa streanan ilumina den nan alma cu a papia di sintimentonan bunita cu ta inspira.
Shonnan, ban sigui cuida y yuda otro . Ban sigui stima y pordona otro. Dios ta bon. Dios semper ta bon. Ban sigui duna Dios danki pa e regalo Dia, cu mas oportunidad di briya p’E.
