Nos tur sa topa bon hende riba nos camindanan den bida. Tin hopi bon hende rond di nos diariamente. Hopi di nos tin suerte di cuminsa un dushi y bunita amistad cu hendenan cu kier nos bon y cu nos tambe ta respeta y aprecia. Un di nan ta nos bon y gran amigo Steve Bowen, propietario y donjo di Optica Moderna. Un gentil caballero cu a bin nos isla hopi anja pasa, ora cu ela contesta un advertencia den un corant of ta revista den su pais natal, Inglatera. E tempo ey Spritzer & Fuhrman tawata tin mester di un Opticien den nan departamento di bril. Steve Bowen a wordo escogi pa su bon cualificacionnan y experticio profeshonal, y hunto cu su pareha, su bunita sra. esposa hoben Marie Barnes a subi avion y hasi nan entrada riba nos isla. Despues nan a yuda pa un corto tempo na Corsouw pero Aruba tawata yamanan bek cu braza habri. Lady Ruth a hasi conosi prome cu Marie Bowen Barnes na Radio Carina, na unda e tawata presenta noticia na ingles y Lady Ruth noticia na Papiamento. Y asina nos a cuminsa cu nos dushi y bunita amistad, te dia di awe, cu hopi amor y carino. Johan y ami tawata casa caba cu nos prome yui homber Rene, mientras Steve cu Marie como pareha feliz tawata enamora mas y mas di Aruba. Despues nan tambe a hanja nan prome yui, Samantha, y despues Alex . Nos tawatatin Rene y Jean. Despues di casi 40 anja di amistad, nos ta tuma despedida di Steve Bowen, cu tambe mester a baha cabez pa Covid-19, despues di un lucha intenso y duro dia pa dia. Hopi speranza ora e tawata mehorando, pero diripiente e situacion a cambia y Steve a wordo yama pa bay sosega den braza di su Creador di amor. Un persona digno, carismatico, responsabel y hopi chistoso, gusta conta jokes pone hende hari te hanja dolor di tanto harimento. Nos curazon ta tristo , pero yena y culmina cu hopi bunita recuerdos di e dushi hende aki, cu den un corto tempo a sinja papia nos idioma Papiamento y Hulandes y hasta Spanjo, domina esakinan den su trabao di atende cu tur su clientenan den su Optica Moderna den La Sallestraat , pasobra, despues di varios anja trahando pa e Optica di Spritzer & Fuhrman, ela hanja e oportunidad di a tuma esaki over, cual e la hasi tambe cu fe, pasion y cu hopi exito. Dushi Steve, esaki ta pabo cu nos amor y carino :” STEVE BOWEN, UNICO Y BENDICIONA” RIP
“Dios a guiabo y a inspirabo pa a bin biba riba nos isla chikito rondona pa lama
Bo a forma bo dushi hogar cu bo pareha esposa Marie y Alex y Samantha stima
Boso tesoronan sabi, inteligente y talentoso, awor ta Alex lo sigui cu bo Optica
Bo a trata tur bo clientenan cu respet y carino den nan idioma pa bo conosi
Bo tawata mas arubiano cu hopi di nos, bo a traha duro, duna, yuda, scucha y sirbi
Bo a keda un hende humilde, cu hopi buniteza, forza y sabiduria ricibi
Bo amigonan prohimo hulandes y arubiano cu ba conose a bira bo famia
Bo amor y passion pa hunga e wega di golf y biaha cu bo sra.esposa cu hopi alegria
Bo amor y passion pa bo propio gusto den estilo di musica unico y hopi moderno
Bo tempo di calidad comparti cu nos un bon binja of cerves cu nos,boso bisinja,
Awe, di curazon, Lady Ruth por tribi bisa, cu como un bon brother mason di mi casa
Lady Ruth ta pensa riba nan ceremonia masonico cu tres rosa, geel, blanco y cora
Pero, bo a scoge pa un despedida humilde, cu gracia, amor y gradicimento
Semper bo a stima e baranca aki, bo di dos cas, cu a bira bo hogar cu calor, semper contento
Goza awor den e hardinnan celestial di bo Creador den luz cu hopi paz y amor
Sigui bo caminda spiritual cu fe y nos akibao lo recordabo semper cu ternura
Locual abo a hasi, planta y sembra , pa semper den nos lo dura”
Sosega na paz Steve, den e luz eterno cu ta cubri tur scuridad
Condolencia, consuelo y amor pa Marie, Samantha,Alex, bo clientenan, bo amigonan di golf y tur bo brothernan di lodge y tur otro cu a conosebo.
“You did it your way, dearest friend “ . Love you too !
