Ken no gusta fiesta ? Esun cu no ta gusta fiesta hisa dede ! Hahahahaha, tin biaha tin e pensamento rond cu tur e hobennan ta gusta fiesta. Cu mayornan y of adultonan un crenchi grandi di edad no ta gusta fiesta mas asina hopi. Ta ser bisa :”Dia mi tawata jong, mi kier a keda fiesta te ora e caba “ y “awor cu mi ta grandi di edad mi ta sali for di fiesta tempran scondi sin hende ripara cu mi a bay “.
Tur cos tin su tempo. Pesey ta bisa tambe cu Alegria ta cana man den man cu Tristeza. Hopi ta esnan cu ainda ta tene e custumber na halto di, bay laba man, despues di un entierro. Pa “shake off”e tristeza, pa por tin balans atrobe pa sigui cu e bida normal, e bida cu a wordo interumpi un rato cu e tristeza y lagrima di a perde un ser keri. Alcohol ta hunga un rol importante den bida social di esnan cu ta traha duro, cu ariba Diabierna ta bay un Happy Hour bay dal un par di cerbes of un par di glas di binya pa baha stress. Pero, hopi no ta bebe alcohol y ta disfruta di bida cu alegria sin e alcohol. Lady Ruth ta gusta dal su par di glas di binya cora mas tanto, y despues di a bay un entierro ta dal dos tapa cora of dos balashi chill bon friuw. Pero cu su glasnan di coca cola e ta mes happy durante cualkier fiesta.
No tin mester di alcohol tur ora. Regularmente tin fiesta baylable ariba dushi musica di e banda “Back on track” di e mihor drummer y cantante still going strong no matter su edad un crenchi halto, Ito Stamper y amigonan musico profeshonal, cu nan cancionnan di anjanan sesenta, setenta y ochenta den Aruba Nautical Club. Sa hinka un merengue of bachata aden. Mas o menos un bes pa luna of cada pasa un luna, ta bini hunto pa goza y bayla cu e dushi musica aki y ta pasa super dushi den un super dushi ambiente. Bo ta bay bek den tempo cu nan y ta hanyabo ta bayla sin stop ! Nos ta gusta bay eynan, enves di bay na unda tin salsa y bachata so henter anochi, nos ta fada, nos ta gusta variacion den e musica y nos ta gusta musica beat. Musica di The Beatles, OO7 y otronan cu letranan bunita y no e boem boem boem henter anochi.
Pesey Lady Ruth ta kere cu ta hopi ta gusta DJ Randy di Metropolis pasobra e sa kico e bayladornan ta gusta. E ta toca varia cu dushi ritmo e cancionnan di mas bunita cu bo no por lubida facilmente. DJ Randy tin e amor y pasion den dje y ta sinti hunto cu esnan ariba e pista di bayle. E ta complacebo cu un dushi merengue, un cushi calypso y ta hinka un flower power song aden na ingles cu ta ponebo lanta foi stoel pa subi e pista di bayle. E conose kico ta bon musica pa alegra e curason of hibabo riba un nubia romantico cu un dushi wals of bolero.
Ki dushi ta, ora Lady Ruth ta hanya e oportunidad di canta su “Jambalayah” cu e dushi acompanyamento musical di su banda faborito “Back on track”den Aruba Nautical Club.
Y siiiiii, Lady Ruth cu su dobbel seis ainda ta gusta bayla riba ritmo di cancionnan alegre cu ta inspira ! Pero tambe un dushi wals den brasanan fuerte y tierno di su kerido esposo Johan, di un banda di e pista pa e otro banda, manera un pluma cu ta bula paki paya.Esta bunita y dushi ta e Diabiernanan anochi na Djiespies, na unda pueblo por acudi gratis, sin paga entrada, mescos cu na Nautical club, tambe entrada ta por nada. Y pa “have a good time”expresa den bo mesun bayle artistico. Esnan cu ta tuma lesnan di bayle, pa nan, ta bida ! Pa nan ta Alegria ! Pa nan ta Movecion ta bida ! Danki pa lesa nos relato cu atencion atrobe, y ban sigui fiesta y celebra bida cu alegria ! Un fiesta cu Mariachi tambe ta super pero super dushi mes ! Bo ta canta hunto cu nan ! Un dushi dia yen di sabiduria den nos alegria ! Un bearhug di Ruthy.
