Nos intencion di a cuminsa pinta den fin di siman, nos prome cuadra pa e prome luna di anja 2022 a keda posponi. Nos a pone e “ezel’ si den veranda caba, pero, atrobe e curason ta den su silencio di tristeza. Nos sa cu ainda e covid y otro virusnan ta ketobay bulando den laira y ta purba di sigui gara personanan cu no ta en espera di esey, pasobra nos niun ta invita e covid pa bin bishita nos, aunke hopi di nos ya a ricibi su bishita . Al contrario, nos ta purba di corre cu ne, cu nan, cuidando nos mes mihor posibel cu hopi likido, nos vitaminanan y nos remedinan necesario. Pero, poco poco mas di nos hendenan conosi ta bay nos dilanti den e mundo spiritual. Nos ta prefera di skirbi cosnan positivo y alegre, cosnan cu por inspira nos tur, pero e curason ta bolbe guia nos pa comparti cu awor un otro amiga a bay nos dilanti. Recientemente nos a tuma despedida di un gran caballero Michael Hoek cu a traha hopi anja na Driftwood Restaurant, un gentil caballero semper cu su smile y excelente bon servicio y awor ta prepara pa tuma despedida di Juffrouw Charlotte Wolff-Croes ,un hende muher inspira, cu tawata educando y trahando cu su alumnonan special na su cas. E semper a pone su alumnonan prome. Locual no ta bon tur ora, pasobra, bo mester stima y cuida bo mes promer. Y no ta tur hende ta gusta tuma remedi, pero ta kere den naturalesa su rumbo di recuperacion natural. Tin biaha e prijs pa paga ta hopi halto den esaki. Dios ta grandi, Dios ta bon semper, y ta un amiga di mi a yega di mustrami un versiculo den Bijbel cu Dios mes ta recomenda hendenan malo pa bay dokter y busca ayudo. Bo ta puntra bo mes, ta na unda tur e Predicadornan a keda, den e temporada aki di covid, pasobra, no a tende di ningun di nan ta reprende e covid den e nomber di Jesus, algo cu nan ta predica di dje tin biaha, cu , creyentenan cristiannan tin cu reprende e malo di satanas ora nan sinti nan mes ataka. Unda e predicadornan a keda cu nan sirbishinan di “pone man” ariba esnan enfermo anto ? Probablemente nan tur tawata cu stress den nan cas, cu nan mesun miedo pa e covid, pasobra, e por ta algo di e ultimo temponan, manera ta para den e Bijbel Nan tur ta hende mescos cu tur otro hende, pero cu talentonan di papia y predica bunita ora ta combini ? Den un manera mas spiritual cu otro ? Kiko nan tin anto, nan fe ta mas grandi of nan ta bisa regularmente cu, si bo tin fe, tur cos ta possibel ? Nos tur ta sirbidornan di Dios ora nos stima, pordona y yuda nos prohimo. Dios ta stima tur mescos. Y Dios mes ta scoge algun pa sirbiele mihor. Lady Ruth como Poeta Escritor tambe ta gusta skirbi y papia bunita, pero cu respet pa bida regala na dje, bibando segun e 10 mandamentonan. Cu su mesun fayonan y comportacion mas agradabel posibel dilanti Dios.
Wel, cada ken cu su yamada, cada ken cu su mission, cada ken cu su creencia y cada ken cu su mesun midi di fe. Nos no ta aki pa punta dede riba ningun hende pa tres dede mustra bek ariba nos, pero, como Poeta cosnan ta bin na curason bay pa e mente y pa e dedenan type e palabranan.
Sin insulta e testigonan di Jehova cu ta contra tuma sanger, si esaki por salba nan bida. Ach, semper tawatatin guera tambe pa motibo di religion. Ainda Lady Ruth no por kere cu Charlotte no tey mas den carni, pero awor mas serca di mente, alma y curason. Un dushi hende cu su bunita smile. Un bunita hende muhe cu hopi sabiduria, bon studia y un bon maestra. Papia y bisa cosnan manera nan ta. Cu amor profundo pa su esposo Erick , su yuinan Chanella y Charissa y cu tawata kier pa henter mundo sa con hopi ela stima su nieta Emma. Mescos cu nos tur, no perfecto, pero si cu su curason y alma na e bon lugar. Ela stima y duna di su mes, segun e mes a lanta, crese y madura. Un di su dianan mas bunita y favorito tawata “Thanksgiving Day” den luna di November. Awor nos cu ta aki ainda, lo recordele cu hopi gradicimento na nos curason pa tur locual Charlotte tawata den su mesun lus pa unicamaente 59 anja. Awor, lus eterno lusa pa bo, lieve Charlotte. Condolencia, consuelo y hopi amor pa bo bunita mama Angelica, bo esposo Erick, bo yuinan Chanella y Charissa, bo ruman Kathleen, bo Sua y bo bunita subrino y subrinanan den exterior y na tur bo alumnonan cu sigur lo sinti bo falta. Lieve Charlotte, sigui carga bo nieta prinses Emma den bo amor na abundancia den e amor di Dios rond di dje.
Aunke nos ta pensa cu por a bay otro, ta Dios tin e ultimo palabra. Sosega na paz dear beautiful friend Charlotte, sigui briya y luci den e mundo spiritual.
Na otro lectornan cu tambe a despedi di un of mas ser stima den e ultimo dianan aki, hopi forsa.
Sigui cuida curpa, mente y alma. Stay safe ! Danki pa lesa nos relato, love you too !
