“bon anja 2021″ !!!!!! Ta nos grito di alegria den nos prome relato di 2021, cu cooperacion atrobe di nos prestigioso corantnan local, cu espacio pa nos pensamentonan y sintimentonan cu por inspira nos lectornan. A peticion, nos ta bolbe manda nos relato na tur e 4 corantnan local, spera cu lo tin espacio atrobe pa nos relato cu nos ta skirbi cu curazon y amor pa nos dushi aruba. Nos temanan sa varia riba tereno local, social y cultural mas tanto. Nos kier a gradici tur cu a yega di traha y of corregi nos ortografia den nos dushi idioma papiamento. Varios lector cu a ripara cu tin bes tin algun palabra skirbi diferente of un crenchi cambia, a pidi lady ruth, pa asina mes toch , sigui mandele pa tur nos corantnan local cu ta skirbi papiamento y hasta a drenta e peticion pa manda nos relato pa corant cu ta sali na corsouw y boneiro, pero nos no sa si esey lo bira posibel.
Nos lo informa aki aya si esaki ta posibel, nos no tin nan email pa hasi nos peticion di curazon y nos manera di skirbi papiamento ta un crenchi diferente, nos no sa si nan lo tin tempo pa ponele den nan papiamentu, pasobra mayoria biaha ta un pagina a-4 ta e grandura y of largura di nos relato plus potretnan pa dorna e relato. Pero di curazon, masha masha danki pa e apoyo pa cu nos relato , cu nos ta purba di logra un ves pa siman, y si tin espacio nan lo publikele di curazon. Laga nos tur accepta 2021 yen di gradicimento na nos curazon cu fe den bon dios cu semper ta bon. Nos tur tin nos mesun experiencianan y lesnan di bida pa sinja y pasa den nan, nos tur sin excepcion ta pasa den nos “ups and downs”, pero asina mes cu tristeza ta bay man den man cu alegria, nos ta sigui baila y briya den e solo cu ta sali tur dia di nobo pa nos tur. Dios ta stima nos tur, asina mes cu nos no ta comprende cosnan pasando tin biaha. Nos tur ta sufri, nos tur ta yora, nos tur ta hari y nos tur ta hala rosea ora nos lanta mainta cu gradicimento na dios. Ban sigui tuma bida manera un bunita regalo y bib’e dia pa dia. No preocupa mucho di cosnan cu a pasa ayera cu ta den pasado, y no anticipa mucho cos mayan, bo por keda decepciona y of desapunta ora cosnan no bay manera bo a spera. No perde fe y speranza, sigui stima, sigui pordona y sigui cuida curpa, nos salud ta e rikeza di mas grandi cu nos cada un tin, asina mes cu nos cada un su beurt lo yega pa bay bek serca nos creador. Pesey y pa mas motibo, sigui duna dios danki pa bida y pa tur otro cos. Manera e cantica ta bisa :”One day at a time”.
Como e poeta artista escritor lady ruth, nos lo sigui hasi nos best pa sigui skirbi nos relatonan cu hopi amor y carino, sigui inspira tur rond di nos cu cosnan bon y bunita, y tin biaha cu criticanan constructivo. Danki di curazon pa publicacion di nos prome relato pa anja 2021.
Cu e anja 2021 trese paz, trankilidad, amor, pasenshi, alegria y sabiduria pa nos tur !
Cu nos por sigui yuda nos prohimonan, sigui stima nos pida baranca aruba y sigui ta un inspiracion y bendicion di luz pa tur cu cruza nos caminda den 2021. Love you too !!
