Manera nos a informa anteriormente, nos ta un crenchi druk cu hopi tema pa relata di nan, y
awe ta turno di relata un crenchi tocante e dushi anochi den Cas di Cultura dia di e celebracion
di e dia internacional di baile cu tawata fin di April, y cu a wordo celebra tambe dia 3 di Mei
ultimo cu “Celebration of Dance” cu e talentoso maestra di baile Pierangely Wever y team di
maestra y alumnonan di Scol di baile Diana Antonette. Tawatatin dos anochi di bayle pa
celebra Dia Internacional di bayle, esun di Dept. di Cultura y esun organisa pa e simpatico y
dinamico Young Woman Lady Pierangely Wever. Ta noticia cu no ta muri, pasobra ta tur anja
tin e celebracion di bayle internacional, pa e.o accentua ariba e importancia di movecion pa
keda den bon salud, expresando alegria den movecionnan alegre cu passion. Manera nos
baluarte den baile Diana Antonette a expresa na cuminsamento di e show fabuloso y unico ey,
cu, : “Baile ta un idioma bibo, un deseo entre e ser humano pa comunica cu otro atraves di
movecion. E ta universal, den henter mundo hende ta bayla y tur hende por bayla. Semper tin
un motibo of un nificacion ora hente ta bayla. No ta importa si bo ta bayla bo so, como pareha,
den grupo of como un forma di arte, e ta un aspecto cultural cu ta duna nos bida alegria y
libertad pa por expresa nos mes, y ta bo curpa ta e instrumento. Den tur cultura e prome forma
di bayle tawata baylenan ritual, magico y religioso y for di e rais primitivo a nace baylenan
folklorico. Atraves di siglonan bayle a desaroya den baylenan di corte y asina balet clasico a
nace como un forma di arte na Francia den siglo 16.” Y por a wak y disfruta di tur sorto di bayle
e anochi ey den :”Celebration of Dance”. Tawata tin bayle solo, den duo of den grupo.
Kostuumnan elegante y nechi y cu a impacta sigur. Ta e expresionnan den e baylenan mester a
resalta y impacta ! Locual a causa hopi furor tambe tawata e asina yama “street dance” di e
hobennan cu a duna un presentacion masha masha bunita mes. Y e bayle folklorico cu e
bailador di tur tempo den Scol di Bayle Diana Antonette, Nico Luydens y Mary Hsing. Nos tin cu
menciona tambe e bayle flamenco bayla pa Diana mes. Y, e colminacion cu e bayle di
Pierangely Wever, un di e yiunan prinses di Diana Antonette, ruman di Alydia Wever, di kende
por a admira e grabacion di algo sumamente artistico y bunita, di e proyecto di tela den un
hamaca grandi asina, ay, Lady Ruth mester a bay banyo net e ora ey y no a wak esey , pero
ora a drenta sala bek a wak net un paar di minuut di e magnifico presentacion ey, cu a tuma
lugar na Hulanda. E biaha aki e luz bunita tawata riba e maestra hoben adulto di bayle
Pierangely Wever, cu a hinca e tremendo show aki den otro. E ta un hende muhe bunita cu su
movecionnan super elegante cu hopi pasion. Nos por bisa, “Zo moeder zo dochter”, pero toch
unico den su mesun estilo naturalmente. Di un generacion mas moderno, pero cu amor y
respet pa nos baylenan crioyo tambe. Un bendicion bunita sigur, pa wak Pierangely Wever
bayla, baylenan moderno riba bunita coreografianan y musica cu ta kishiki bo pa bo tambe lanta
bayla. Impactante tawata tambe e “fondo” riba pantaya grandi cu lusnan briyante of suave,
dependiendo di cua bayle tawata wordo bayla . Cas di Cultura tawata “sold out” y publico a
goza di un tremendo anochi unico, varia, alegre cu a inspira nos tur. Ta un secreto publico cu
Lady Ruth tambe ta gusta bayla, specialmente riba musica moderno alegre, cancionnan na
ingles mas tanto, aunke e ta na drempel di su di 67 primavera e luna aki. Ademas di e musica
dushi na ingles e ta gusta bayla un dushi wals tambe den e brasanan firme y tierno di su casa.
Pabien Pierangely y tur cu a participa cu nan alegria den e exitoso “ Celebration of Dance”. Un
bearhug pa nos lectornan y danki pa lesa nos relato.
Ban sigui celebra bida cu nos mesun baylenan, nos mesun expresionnan di alegria !