Un dushi dia yen di sabiduria den nos alegria ! Danki pa tur e bon comentarionan ricibi pa cu nos relato di biaha pasa. Nos fiel lectornan cu ta gusta cosnan bunita y positivo , cosnan cu por inspira pone un sonrisa riba nos cara, cu gradicimento na nos humilde curason. Y papiando di sonrisa, nos ta hopi contento cu nos por a wak y sinti e dushi y bunita sonrisa di Lider Politico Ricardo Croes di RED durante e prome debate electoral cu a tuma lugar recientemente, nos no ta sigur si e tawata hari di un “binnen pretje” pa un of mas lider presente, of simplemente e tawata goza su mes y sinti happy y bon. Por ta tambe e tawata hari un of mas lider pa nan actuacion ? E ta e unico lider cu a smile cu smak, ela “steal” the show sigur, e otronan hopi serio y hasta algun cu cara strak rabia, podise a prepara nan mes pa bin “guerra den debate”, locual no a resulta di ta e caso. Lady Ruth ta un di e poconan cu a felicita Kamer van Koophandel riba face book cu nan debate suave cu respet y bon trabao di e moderador Sra. Yolanda . Bunita tawata e comienzo cu un homenahe bek den tempo na e moderador di biaha pasa, Ruben Trapenberg den felis memoria. E cara di mas guapo di Tele Aruba, cu a wordo yama pa bay mas aya, den e mundo spiritual varios anja pasa. Ser moderador no ta algo facil ni con cu ta tampoco. Por a ripara e paar di foutnan cu a ser cometi e anochi aki, pero despues e anochi a sigui cana mihor. Lady Ruth kier wak algo positivo den cada cos, den cada un di nos tur y ser positivo pa no huzga asina pisa, mirando e hopi comentario – cu criticanan constructivo riba face book. E tawata puntra su mes, si ta pleita nan kier a wak e lidernan pleita cu palabranan mahos, caranan mahos cu curazon yen di gana pa traha pa nos isla. Pasobra, por a nota cu tur tin e fe y bon boluntad pa “traha” y of “hasi algo” pa yuda nan isla. Ta tende den pueblo cu mester un mihor gobierno cu por traha y demonstra di berdad e trabaonan realisa y hasi. Pueblo no kier mas promesa falso.( Nan a faya nos tambe di Dadelstraat pa no a laga pone sleeping police, pa seguridad di muchanan di scol cu tin cu cruza bai nan cas den Tarabana Pabao ) Cu tur gobierno ta traha na nan manera, ta berdad y tur ta hasi fout tin biaha intecionalmente of consientemente. Ningun di nan ta perfecto, nos niun ta perfecto. Laga nos felicita Tele Aruba 23 pa nan bon trabao, por bisa : Roeien met de riemen die ze hebben, pa por a acomoda tur e 12 lidernan den un di e studionan di Tele Aruba. Cosnan a cana vlot, pero pueblo a keda disapunta , pasobra no tawatatin debate di berdad. Ora por ehempel un di e lidernan ta menciona algo di e “welga di hamber” cu no ta al caso den ningun di e preguntanan di e anochi aki, e lider cu e tawata cherche di dje, mester por a reacciona y debati hunto cu e otronan riba esaki, of no ? Duna tur un bunita chens di opina y expresa e pakiko si of pakiko no. Hopi a keda disapunta den e expresion di e lider cu a cherche di su colega lider. Ach, ta politikeria. Pakiko no por keda netjes, riba nivel y al caso ? Televidentenan y pueblo kier a tende kiko tur lo wordo hasi pa saca Aruba di e crisis cu hopi ta papia di dje cu Aruba ta aden awor aki, cu tur respet pa prome minister Wever Croes y e team di DVG y HOH cu a y ta maneha e temporada di e pandemia corona virus Covid-19 hopi bon. Cu fe nos por bisa cu Dios su mannan todo poderoso a salba nos isla di cosnan mas mahos y mas peor. Pueblo a sinti e necesidad di reza y cuida y ta sigui cuida. E lidernan cu mas a destaca den e prome debate electoral aki, segun Lady Ruth y mas hende cu a sigui e debate aki, ta Sr. Mansur, Sra. Lopez Tromp, Sr. Eman y Sr. R.Croes. E lider hoben di HTC a sorprende tur, cu e tambe sa un tiki di kiko ta kiko , pero por a scoge un lider pa ken vota, ora e pregunta a wordo hasi na tur, pasobra bo tin cu demonstra tambe cu bo ta willing pa sinta hunto cu otro den un coalition. Nos pregunta telefonico cu no a wordo lanza, pasobra e juffrouw talbez no a comprende nos pregunta : Pa tur lider bisa si of no si nan lo ta dispuesto di traha den un coalition si yega asina leu, y probablemente esaki lo ta e caso, pa bisa pakiko si of pakiko no, talves pa demonstra nan poder y despues toch lo mester baha cabez pa bienestar di pueblo, pasobra ta pesey boso a subi lista, pa traha y representa pueblo cu e ehempel di un union y cooperacion y no pa boso mes personalmente. Pueblo kier lidernan madura, profeshonal capacita den un combinacion di biew cu experiencia y jongnan cu kier sirbi y traha cu seriedad y honestidad. Niun ta perfecto, pero mester por traha hunto pa Aruba, tira awa den binja y combina algun di e programanan. Ban spera cu e siguiente debate electoral lo ta mihor, cu e respet necesario pa no perde nan strea di nort, pasobra tin di nan cu no por yuda di sigui ataca otro personalmente. Shonnan, un relato diferente, di Lady Ruth, como un cuidadano cu a vota desde cu ela yega na e edad pa vota te awor. No comprende nos malo, nos semper a apoya tur cu a hanja e oportunidad pa goberna y lo sigui hasi esaki tambe . Danki pa lesa nos relato cu hopi atencion y cu curason. Love you too !
