Nos ta den siman di nos celebrashon y refleccion di nos Dia Nacional, Dia di nos Hymno y Bandera 18 di Maart. Tawatatin e Festival di Canto y tawatatin e competencianan Poeta di Patria 2021. Ambos actividad a conose nan ganadornan cu lectornan por a admira den nos prestigioso corantnan local siman pasa. Lady Ruth, cu dos anja pasa a sali como tercer ganador den Poeta di Patria, a sigui su curazon inspira y a participa atrobe e anja aki, ya cu no tin limite den e participantenan. E ta un competencia habri tur anja pa tur poeta, sin importa cu ba gana caba un of dos biaha, pasobra e inspiracion di amor pa nos patria nunca ta caba. Kemen, bo por participa cuanto biaha cu bo kier y si bo tin suerte gana atrobe. E ta keda un reto pa tur poeta cada anja atrobe. Nos pabien na tur e ganadornan di e Festival di Canto y di Poeta di Patria 2021. Nos ta felicita pueblo di Aruba cu nos Dia Nacional y ta laga e siguiente poema resona den boso mente, alma y curazon, pasobra nos tur ta stima nos dushi isla Aruba, nos hogar, nos cas.
E ta e poema cu cual Lady Ruth a participa den Poeta di Patria 2021, den Cas di Cultura hunto cu 13 otro participante. Pabien na e comishon organisador pa nan bon trabao. Pabien na Suzy Maduro cu a fungi como e Maestra di ceremonia y Pabien na nos ministro di cultura Sra. Xiomara Maduro pa su bunita palabranan e anochi ey. Ata aki e poema :
* * * * *
TUR CU TIN PA ARUBA !.
Nos pasado, Awe, nos futuro, nos tur ta stima nos dushi, elegante y bunita Aruba
Tur cu tin Aruba na pechu, awe nochi cu tapaboca bisti akinan presente
Nos tur ta sigui cuida nos mes y yuda nos prohimo ruman cu nos bon Dios na nos mente
Na Aruba tin hopi hende cu a ricibi un ‘lintje’ pa nan bon trabaonan di duna y yuda
Tur cu tin nos dushi isla firme y potente, na curason y na mente
Ta biba e.o. di turismo , su progreso interesante den projectonan y bon desaroyo
Tin cu ya a lubida su warawara, rembak, driguidek y panboyo
Mientras hopi keto bay ta stim’e cu un amor y pasion fuerte creciente
Aruba , mi dushi perla Aruba, mi no kier bo hoga of bay perdi nunca!
Bo pueblo cu gradicimento y su cordialidad ta e mihor fruta
Ohala cu nunca, nunca influencianan multicultural surpas’e
Tur cu tin, tur cu ta, tur cu sa ,cu di nos tur, amor y respet e merece
Den nos oracion tur dia pa Creador sigui proteh’e y bendicion’e
No laga olanan di odio, rabia of envidia caba cu’ne ni machic’e
Bientonan dushi di tur 4 skina, sigui refresca Aruba, nos humilde cas
Y tur cu tin, cu ta, cu sa…..cu aki nos ta biba bendiciona, den luz y na paz
Ya ta 35 anja di Status Aparte , resultado di trabao politico duro logra !
45 anja cantando nos Hymno y Bandera, cu orguyo nos ta recorda y celebra !
Den anja 2021, marca y impacta pa e Corona virus cu a cuminsa anja pasa
Nos gobernantenan y pueblo, cu fe y bon comportacion, ta sigui combati y enfrenta.
