Laga nos habri e dia bunita y bendiciona aki, cu gradicimento na nos curazon. Nos ta duna Bon Dios Danki pa salud, cuminda riba mesa, un dak riba nos cabez , y claro, pa nos famianan cu tey ketobay cu nos. Despues di basta tempo Lady Ruth a bai Kerki, anto riba Diadomingo dia 14 di February, dia di amor y amistad. E domi a duna un bunita predicashi, aunke e cantamento por a bay mihor. Nan tin cu scoge canticanan cu hende conose, pero ya, ta Lady Ruth tin hopi tempo sin bay kerki. E ultimo biaha cu nos a bay, tawata bispo di Pascu, dia 24 di December anochi.
Ta bunita pa ta rondona di hendenan di fe, hendenan cu tin amor pa Dios. Ta hopi cos ta drai den bo cabez tin biaha, ora cu bo ta wak cosnan pasando rond di bo y cu bo no tin control ariba nan.
Y ainda nos caya di Dadelstraat no a hanja un of mas sleeping police. Atardi ora nos keiro den auto den e diferente barionan por mira hopi sleeping police, tin biaha tres of mas den e mesun caya. Ora Lady Ruth tawata comenta esaki den un grupo di hende, un di e contestanan tawata, cu den e caya nan ey tin politiconan ta biba. Pakico Dadelstraat no por hanja ni un sleeping police ?
Pakico no ta scucha y respeta pueblo, pasobra, nos di Dakota, tambe ta parti di e pueblo di Aruba toch? Siiiiii, nos sa, Rondweg ta pata pata di sleeping police, oh, Lady Ruth mester a vota pa Marlon Sneek anto ? Ta nos representante di nos bario a percura pa eseynan ? Nos a colecta firma di hopi habitante di e caya, pero, net net nada ! Ta hopi laaf si, ta hopi laaf ! Ach, anto djies aki tin eleccion . Antes tawata priminti y duna famianan frigidair y of un of otro aparato ora nan a vota pa tal y tal politico , segun nos por a tende di nos grandinan di nos grandinan cu ya no tey mas cu nos akibao. Ach, ta tur caminda rond mundo casi tin corrupcion ? Lady Ruth no tin gana mes di bay vota, pero elo hasi esaki toch, pa por sigui expresa su mes di cosnan pasando riba nos isla. Un persona for di e grupo cu tawata discuti cu nos, a laga sa, pa bisa esnan responsabel pa pone sleeping police, pa bay pone esaki den nan………….uffff ! Hendenan cu a rabia mas cu nos !
Naaaah, nos ta respeta nos prohimonan ruman, politico of no politico, ta hende nan ta, cu tur nan debilidadnan, pasobra , perfecto ningun ta. Politica ta un wega, un wega di kako scondi ? Pero nos a tende tambe, cu esnan den e gobierno aki mes no kier bay den gobierno mas pa motibo di e Covid-19 Corona Virus ? Un otro a bisa, cu , ta net e ora nan kier ta den gobierno atrobe, pasobra nan tin e pueblo ta come for di nan man cu tur e medidanan tuma ? Naaaaah, awor nos no tin mester di e sleeping police mas, bay sigi pone nan den e cayanan anto na unda tin politico ta biba.
Nos ta sigui desea esnan cu tin cu representa nos pueblo, hasi esaki cu respet, honestidad y dignidad. STOP di ganja pueblo, STOP di tuma hende hasi. Pa colmo ta lesa, cu pueblo di pariba di brug y Aruba henter ta bay perde nan Baby beach ? Oh wat jammer !!! Esey por asina sin mas ? Pueblo no tin nada net net nada di bisa mas ? Un persona a bisa, cu Lady Ruth ta parse e meneer cu tawata yama radio tur dia encuanto un stadion den bario di Noord, si mi no tin hera, e compleho deportivo Frans Figaroa ofzo, mi a hanja e cos aki pret ! Naaaaah, ta ora di topa cu hende nan trese e tema ariba di sleeping police den Dadelstraat nos sa reacciona. Noooo, pls NO bin pone sleeping police mas, pasobra ta dushi pa wak muchanan baha riba nan bicicleta cu speed bin abao den carreda pustando . Alegria den nos bario ! Antes ta riba caya ta hunga jul y pele.
Shonnan, ban wak kiko e dia aki ta trese pa nos, keda cuida boso mes y tuma boso vitaminanan.
Ban sigui soporta y tolera otro cu e amor cu Dios ta sinja nos. Na famianan Croes, condolencia ainda cu e perdida di boso bunita Tia Sofia. Y tambe na nos bisinja Dony den Patiastraat, hopi forza, consuelo y amor cu e fayecimento di bo yui homber. Love you too !
