Ahaaaaaaa! Drentando otro siman, mas serca di e Dia di Amor, Dia di San Valentino dia 14 di February. Nos a ricibi varios bon comentario riba nos relato di siman pasa, algun a hanjele hasta un crenchi pica, den e sentido cu hopi ta pensa asina, hasta algun cu a pasa den un of otro situacion amoroso describi den e relato. Nos a primimti a peticion maske ta un poema di amor pa e siman aki. Mi a pone dushi musica suave y romantico, pa e inspiracion expresa su mes .
Un lector a bisami, e ta spera e no hanja un boeket di flor riba su laptop, hahahahah, e kier e rozanan di berdad pa tene serca na su curazon. Ah wel, esnan distancia for di otro si lo manda beertjes, chuculati y flornan bunita via e screen di nan computer. Tin cu ta bay “the extra mile” y ta manda pidi flor on line pa ser entrega aki na Aruba. Manera mi yuinan a hasi cu Lady Ruth ora di su One woman shownan, nan a manda pidi flor on line y e floresteria a entreganan na Cas di Cultura. Lady Ruth a bin topa un “napkin” cu ta bisa :” Celebrate special moments with people you love “. Na nos dushi idioma papiamento “ Celebra e momentonan special cu e sernan cu bo ta stima “. Tin cu sa puntra , dicon tin hende cu ta tribi expresa nan amor na un otro den palabranan bunita amoroso tambe y no solamente cu e ponemente di cuminda riba mesa tur dia, laba auto, strika panja, cushina etec. ? Pasobra tur esakinan ta muestra y hechonan,actonan di amor. Podise, pasobra ela hanja hopi amor den su bida for di su infancia te na grandi ? Y toch, no ta asina tur ora, ta keda na kada ken cuanto amor e mes kier duna, pasobra, mas bo duna, mas bo ta ricibi. Tin cu no a hanja hopi atencion y amor na mucha, pero ta scoge pa si hasi esaki cu nan pareha y despues cu nan yuinan. Siiiii, Lady Ruth y su esposo pa 43 anja caba tambe a yega di participa na un di e Encuentronan Conyugal, hopi anja pasa, pa a fortifica mas nos relacion di amor di pareha. Laga nos purba hinka un poema di amor den otro un rato, mi tin e crenchi inspiracion, scuchando dushi musica romantico, mientras panja ta laba den wasmachien.
*YEN DI DULZURA BO TA MIRA MI
Mi ta yamabo mi bida, mi dushi, mi amor
Bo ta yamami bo tesoro ,bo corona y mas
Mi ta basha un glas di awa pabo, ora bo pidimi
Bo ta stuur pa mi atardi, ora nos bai keiro y disfruta
Antes, amor expresa den cartanan cu nos a skirbi
Awe, den 2021, nos union di amor ketobay na Dios entrega.
Pa e ta mas fuerte, mas dushi, mas inspira y bendiciona.*
Un algo chikito simpel, cu tur pareha cu ta stima otro di berdad por hasi , bisa, expresa y trese den practica tur dia. Bo ta sintibo trankil y na paz ! Cu amor tur dia rond di bo y den bo cas.
Amor cu tin tur su blaadjienan yen di harmonia, alegria y sabiduria. Mientras e roza mes, e flor meymey di tur e sumpinanan,den nos curazon ta sigui luci y briya, dia pa dia. “One day at a time”. No warda pa ta cumpleanos, pascu, anja nobo, aniversario etec.pa bisa otro cu boso ta stima otro, hasiele awe, awe na bida cu salud ! No laga ni e Corona Virus stroba boso amor, cuida boso mes y cuida otro. Hasi cosnan dushi hunto ! Ta pesey boso a bira un pareha y no pa un so sali bai trip su so. Atrobe, sefta pa bo mes. Un felis Dia di San Valentino na tur cu ta scoge pa stima ! Corda ! E “naranja” por corta den dos mitar, pero e ta rondo sin fin den amor !!!!
