Shonnan, com bay ? Awe nos tin un potpuri di 3. Un fruitpunch dushi ! Manera priminti, nos lo
touch up algun tema cu porfin a yega na beurt. ( Un crenchi tardanza pa motibo di e laptop cu a
strike pa algun siman, boso ta corda ?) Wel awe nos ta comparti tur tres. Three in one. Prome,
nos ta felicita e dos Mamanan di anja 2024 di e grupo The voice of Jesus di Modanza, den
persona di e simpatico y dushi hendenan Lima Brete y Anchie Wouter kendenan a accepta e
titulo aki cu hopi amor. Masha masha masha pabien !! Nan ta gradici e bunita Mama saliente
Benita Maduro cu a hasi un excelente papel durante su anja como Mama di The voice of Jesus.
Tawata un bunita anochi di celebracion bau shelo na strea cu biento fresco suplando cu un super
dushi ambiente. Na di dos luga nos ta felicita famia Diaz cu a accepta cu amor e bendicion pa
sigui cu e negoshi di drecha sapato y mas, di nos gran amigo Juan Carlos (dfm) cu a wordo
yama pa bay nos dilanti serca Tata Dios no mucho tempo atras. Nan ta situa awor den Ponton
Pitastraat 49, y nan servicio ta sigui ta excelente tremendo na satisfaccion di cliente. Pueblo a
pidi, y nan ta sigui. Lady Ruth a keda impresiona cu su short di cuero con bunita ela keda,
manera nobo, y su petchi di cuero tambe a keda perfecto. Nos tambe ta aporta na nos hendenan
local cu ta drenta e mundo di negoshi pa duna pueblo mihor servicio y mihor prijs. Exito na Diaz
Shoe Repair Aruba y danki na famia Diaz, especialmente na e talentoso, dinamico ,profesional
lieve Naomy y Jerry pa continua cu e negoshi di famia, danki lieve Ana, pa bo confianza y amor
den esaki.
Na di tres luga, nos potpuri di awe, ta pone luz ariba un di nos dushi hendenan, Sra. Magaly di
Wit Gele Kruis, pa su tremendo trabao cu nos grandinan. Un shon di hende muhe balente cu hopi
amor y carino pa su trabao di cuido y atende cu clientenan patient cu no por yuda nan mes asina
bon mas. Danki lieve mooie Magaly ! Cu nos bon Dios sigui drama su bendicion di salud,
alegria, harmonia y sabidiuria riba tur nos dushi hendenan menciona den nos relato di e siman
aki. Nos kier a felicita tambe e lider dinamico di e grupo The voice of Jesus, Sra. Valerie pa cu
su exitoso charlanan duna na diferente lugar, inspirando y empoderando nos hendenan muhe pa
ta nan mes y cu bon trabao ta duna fruta y cu nos tin cu cuida nos mes y yuda prohimo ora cu
por, ora cu nos mesun salud ta permiti esey. Dios ta bon. Dios semper ta bon. Shonnan, danki pa
lesa nos relato di e siman aki, bay trankil ariba caminda, no bebe ora bo ta stuur y no stuur ora bo
ta bebe. Corda bishita nos grandinan y corda duna Dios danki pa salud y pa tur otro cos den bida.
Tambe pa nos lesnan, nos experiencianan y tur nos momentonan di tristeza y di alegria. E so por
duna nos e consuelo y forsa cu nos tin mester pa sigui enfrenta bida dia pa dia cu tur su retonan.
Corda bay poco poco den trafico, scolnan ta habri atrobe. Pasa un dushi dia yen di sabiduria den
nos alegria ! Un “bearhug “ grandi diki gordo pa boso tur ! Cu Dios bendiciona nos isla Aruba.
Y cu su gran bendicion pa cada famia.
