Ta dushi pa tende cu tin hende cu ta anticipa lesa e relatonan di Lady Ruth . E ta suavisa e
noticianan di polis of otro temanan un crenchi fastioso, pero cu ta importante pa pueblo wordo
informa di nan. Danki pa e bon comentarionan di curason! Ta conosi cu nos ta gusta relata e.o.
actividadnan social cultural of musical, cosnan positivo y alegre. Awe nos ta comparti di nos
curason 2 actividad social cu a tuma lugar recientemente. Laga nos cuminsa cu e dushi fiesta na
Modanza , cas di Mama Hortencia, mama di Vidente Valerie. Nos bon amiga y ruman Beautiful
Lady Valerie a celebra su di 50 primavera cu su famia, bisinya, amigo-, y rumannan fiel di su
grupo di Oracion durante un anochi bunita yen di strea y biento fresco na Modanza. Un shon di
hende muhe, inspira semper cu un bunita curason. Cu mannan y curason bendiciona, den su
bunita Sirbishi pa Hesus y Mama Maria cu atencion y amor pa su prohimonan. “Sly Foxx
Disco” a percura pa e dushi ambiente musical y hopi a subi e pista di baile los e pianan y
heupnan un crenchi, e.o. e bunita pareha Christa y Lourens, bon amigonan di Lucas y Valerie,
disfrutando di bida. Un tiki mas laat e gran artista cantante Victor Samuel El Duque a duna
Valerie un dushi serenata cu canticanan bunita alegre cu ta sigui inspira nos tur pa sigui goza di
bida, el a canta cu e publico presente y crea mas dushi ambiente ainda cu e dushi wals di Padu
“Abo so” . Valerie den su bistir largo elegante color blauw cu su bunita smile y su pareha e
guapo Lucas a habri e pista di baile cu hopi amor y alegria , cu hopi gradicimento na nan
curason pa cada bendicion . E tema bunita “Under the seas” cu decoracion di blaas y center
piecenan di cocolishi den santo blanco a luci y tambe e bolo elegante cu number 50 ariba dje.
Henter anochi tur presente a saborea dushi snacknan cayente y friuw, salada den pan y dushi
punch, sangria, un cerbes bon friuw, un glas di binya of un refresco y hopi mas, sirbi pa un team
excelente di waitressnan. Lady Ruth a recita e poema cu ela inspira pa Valerie cu Valerie a
gusta masha hopi mes . Un poema acrostico cu e nombernan Valerie y Lucas. Dave, ruman
homber di Valerie a sinya Lady Ruth e pasonan di e baile bachata y despues di e “crash course”
ey, nos tambe por baila bachata awor cu hopi alegria . E di dos actividad social, tawata e atardi
cu nos a duna extra hopi atencion, amor y carino na nos mama, P. Mercedes Bergen-Tromp,
nos Mayo, nos Mama, Swegra, Wela y Bisawela cu a cumpli e bunita edad di dobbel ocho. Lady
Ruth su unico nieta , nos prinses Lexie ( na Hulanda) ta cumpli anja riba e mesun dia cu Mayo.
Kemen,nos a celebra e Sweet Sixteen di Lexie y 88 di Mayo. E crenchi alzheimer no a stroba
nos dushi y bunita Mayo su bon beis , ela come su pida bolo, bebe su juice, sinta den su rolstoel
den veranda goza di e biento y solo, bista riba su hardin y wak autonan pasa. Mayo a hasta bisa
algo hopi pret cu a pone tur hende hari na smak. Danki Tante Poppy y Orlando Jr. pa a comparti
e dushi y bunita atardi aki cu nos. Danki Ronald y Mirla pa boso bishita di curason. Danki Papa
y Roy pa boso amor y atencion. Danki na Orlando Jr., cu a mobilisa mama di cama pa rolstoel.
(Despues di un stroke varios luna pasa, un di e pianan a keda afecta). Su beisnan por varia, e por
zundra un crenchi , pero e ta suave y tierno tambe cu combersacionnan cortico ainda di algun
palabra. Nos ta stima nos Mama Mayo masha hopi mes y ta sigui duna Dios danki pa cada dia.
“One day at a time”. E por lubida ken nos ta, pero nos nunca ta lubida ken nos bunita y dushi
Mama ta. Ela gusta su kamber dorna cu potretnan di dje y di Papa di antes, y a goza tambe di a
wak su arreglo di blaas cu e number 88. Nos a laga e kamber dorna pa full un siman y despues
ruim op pa e no keda mucho druk. Den nomber di nos Mama Mercedes,( Chedy of Chely ) nos a
hiba un dushi bolo y botter di refresco pa su bunita amiga- y amigonan ayudante di Wit Gele
Kruis cu na cabes lieve Sharlene y Liesbeth y nos a hiba tambe cheezecake pa su bunita Dr.di
cas, e simpatico y profeshonal Dr. Sneek y su dos bunita asistentenan Liliana y Bea, kendenan
semper ta cla pa atende cu receta of asistencia medico, conseho, bishita na cas, etc. cu amor y
carino di nan curason profeshonal. Mama tin un bon team cu ta atendele na cas tambe. Nos ta
bendiciona. Dios ta bon. Dios semper ta bon. No ta facil pa atende y cuida un famia cu no por
corda hopi cos mas y cu sa lubida ken e mes ta. Ta mas famia aki na Aruba ta pasa aden. Tur cos
ta den man di Dios. Nos por duna di nos parti, pero ta Creador di Amor tin e ultimo palabra.
Danki pa lesa nos relato. Un “bearhug” pa boso tur di Lady Ruth. Hiep hiep hiep hoerraaa pa
Vidente Valerie, Mercedes y Lexie !!! Cu bendicion di salud, forsa mental, emocional, spiritual,
fisico y hopi mas sabiduria den nan alegria !
