Dag Sinterklaasje, daag daag daag daag Zwarte Piet !
Dag Sinterklaasje, daag daag daag, daag vergeet mij niet !
Nos muchanan a goza e fin di siman trai lomba cu e bishita di Sinterklaas, hunto cu su Pieter baasnan. Tin cu a yora, tin cu a pone sapato cu yerba of wortel pa e cabay blanco di Sinterklaas, tin cu a hanja regalo y tin cu mester a tende di nan mayornan cu Sinterklaas a bira mucho bieeuw y no por a bishita tur cas e anja aki. Y tin cu mester a tende cu nan no a comporta bon e anja aki na scol y na cas y ta pesey no tin regalo e anja aki. E tradicion ta existi ketobay, asina mes cu su criticanan y of comentarionan pa cu e fiesta aki di Sinsterklaas y su ayudantenan , e Zwarte Pietnan, cu ta wordo mira pa varios hende como un discriminacion. Lady Ruth no a saca su som ainda encuanto e asunto aki. Foi tempo di mucha ela celebra e fiesta aki di Sinterklaas y Zwarte Piet. Awendia tin witte Piet tambe.
Y awor ta celebre cu su nietonan di mas chikito, cu ainda ta tende na nan scol, cu Sinterklaas y su Pietnan ta bin bishita nan scol. Awendia nan ta trek ‘lotje’ saca nomber di un mucha den nan klas y mester a traha un ‘surprise’ pa e mucha aki. Y hunto den e surprise aki a pone un letter di chuculati of algo otro, como un regalito duna cu carino. Berdad tin mucha cu tin miedo di Zwarte Piet. Lady Ruth a wordo spanta pa di prome biaha tempo e tawata den derde klas lagere school di Mon Plaisir College, ora cu un mucha homber color scur den su klas, un mucha homber di Surnam color ‘blue-black’ a cuminsa tentele y core su tras den klas, ora cu e juffrouw a sali un rato bay busca krijt of algo otro. Ela spanta di berdad y a keda cu miedo te cu su zesde klas. Danki Dios e tawata conose un caballero color scur cu tawata traha bolo pa su cumpleanos, un ruman di Iglesia di nos famia, un amigo di cas cu un bon curason. Di dje e no tawata tin miedo at all. Despues dia ela conose e sra.ayudante den trabao di cas di su futuro suegra, un dushi hende muhe, tambe color scur, un sra.di Grenada cu tambe a conquista su curason cu su dushi caracter y bon y humilde curason. Ta si bo wordo spanta foi chikito, tin chens cu bo ta lanta cu un sorto di miedo pa hendenan color scur. No cu bo ta corre bay sconde mas, pero bo ta cuminsa pensa puntra bo mes, kiko e hende ey ta pensa of si e ta bay hasi algo stranjo. Ach, bo ta realisa despues den bida, cu experiencianan y lesnan, creciendo den e bario di Dakota tur dia, manera ‘united nations’ , cu Dios a traha e ser humano na su semejanza, y cu tin hopi cultura cu tur sorto di hende di tur sorto di color. Ok, no hende berde of binja, eseynan bo ta hanja den peliculanan di Avatar. Y cu si ( no importa bo color) bo ta firme den bo sapatonan para, sa ken bo ta y kiko bo por, bo no hoef di sinti’bo discrimina. Nos tur ta prohimo ruman. Nos tur ta yiunan di Dios, igual den bista di Dios cu nos fayonan y debilidadnan.
Cada un di nos tin nos mesun mision den bida, sea un professional of un ama di cas. Cu hopi dolor na nos curason nos a wak un pelicula di tempo cu na Merca tawatatin hopi discriminacion cu hendenan color scur no por a drenta sinta come den restaurant di e asina jama ‘blanconan’ (vice versa), pero nan por a traha si como waiter. Hopi di nos conose e storia di e heroe Martin Luther King den e anjanan ey, cu a lucha pa derechonan igual pa tur hende, sin importa bo raza, color, religion of profeshon. A cuminsa bira ‘normal’ pa wak parehanan forma pa preto y blanco. Lady Ruth ta admira e bida, trabaonan y poemanan di e gran Poeta Maya Angelou. Un curason bunita ilumina cu hopi sabiduria. Ela laga hopi bunita herencia social cultural y spiritual atras pa nos tur ! Cu fe y positivismo nos tin cu sigui wak padilanti, no lubida historia, pero no keda pega den dje tampoco. Traha riba bo mesun storia den bo viahe di bida cu amor. Just sea un bon ehempel, just sea un mihor version di bo mes tur dia. Den tur cultura tin un of mas appel putri cu ta gusta danja pa su hendenan, duna e mal impression cu tur di su raza ta asina problematico, mientras esey no ta asina. Nos niun ta perfecto, aunke tin di nos ta cana nanishi na laira como sifuera ta mihor cu otro pa via di un of otro titulo of profeshon. Manera e dicho ta bisa ;’ Bo educacion no ta bisa nada, ta bo bon manera y comportacion ta defeni e bon hende cu bo ta ‘.
Ban sea un mihor hende awe, bisa otro ‘bon dia’ y ‘danki’ caba ta dos cos clave y hopi importante pa hasi bo un mihor hende. Ta nos tur ta trahando riba nos balans mental, emocional y spiritual den nos curpa fisico. Corda cu Dios ta amor y e ta stima nos tur mescos. Ta nos sa faya nos bon Dios cu nos orguyo y arrogancia. Ban habri nos curason pa un otro Pascu cu ta na caminda. Ban trata otro cu respet. Stima bo prohimo y yuda unda cu por. Stay safe people ! Love you too !
