DANKI ta e palabra bunita magico necesario cu nos ta habri nos relato di e siman aki. Danki, danki y mas danki ! Nos tur tin asina hopi bendicion pa duna danki pa nan. Pa cada un , chikito mediano of grandi. Nos a comprende cu tin mas historia tras di e Dia di duna danki, cu no ta un dia di alegria of cosecha sin mas, pero cu tawata ensera sufrimento y matamento tambe. Pero, e tradishon a coi curpa y ta ‘going on’ pa decadanan largo caba, cu ta yama e dia di duna danki ‘Thanksgiving Day’ cu a wordo celebra dia 25 di November, e ultimo Diahuebs den e luna di November. Nos ta manda otro carchi y of ta pone cosnasn bunita di ‘Danki’ ariba social media y tin parada grandi bunita na Merca (y hunto den famia ta come kalakuna horna), na unda e Dia di duna danki aki a cuminsa. Nos akibandanan tambe ta come hunto cu famia y of cu famia y amigonan y ta hasi un bunita oracion di gradicimento na Dios pa tur cos. Nos tur tin hopi motibo pa duna Dios danki . Pa salud, pa bida, pa cuminda, pa nos cas, nos trabau y asina nos por sigui menciona. Asina mes cu nos tur sa pasa den duro, den temponan un crenchi dificil y of complica, si bo tey awe, bo tin mas cos pa hasi duna y of sinja den bida akibao. E palabra magico ‘Danki’ lamentablemente no ta den boca y of curazon di tur. Bo ta sinja esaki na cas, ora cu Mama of Madushi ta cushina dushi cuminda pa bo come, bo bisele ‘danki mama’ of ‘danki madushi’ e cuminda ta hopi dushi ! Ta reflexiona riba e dia di duna danki, ta realisa con fragil nos bida ta, cu nos tin cu ta humilde y duna Dios danki tur dia. Y bisa nos hendenan danki pa e cosnan cu nan ta hasi pa nos. E cosnan cu nos ta ricibi. No ta costa nada pa gradici ! Mas danki bo duna, mas bunita bo mesun curazon ta bira. Mas dushi e ambiente rond di bo. Lady Ruth tambe ta gusta bisa danki tur dia den su oracionnan, regularmente na rudia. Nos ta gusta copia for di otro paisnan, pero esaki ta un di nan, cu den mi opinion ta algo bunita pa copia. Un dia pa duna danki. Nos como sernan humano ta gusta tuma tur cos pa normal cu ta sina mester ta y sa lubida di bisa danki pa nos salario, cu nos tin entrada, cu riba nos dushi isla nos grandinan ta hanja nan penshoen , placa cu nan mes a hinka den e pot tempo nan tawata hoben y dinamico trahadornan di bon boluntad.
Danki di curazon,mi kier duna awe na mi mayornan stima, Lucas y Mercedes Bergen Tromp pa a educa y forma nos como e bon hende cu nos ta awe, mi 3 ruman hombernan y ami, fruta di nan Felis Bida Matrimonial. Pabien Payo y Mayo cu 68 aniversario di boda dia 28 di November 2021. Danki pa inspira nos tur cu amor asina grandi.! Papa y Mama ta nos ehempelnan pa semper ! Danki na mi esposo stima Johan Vrieswijk cu nos dos por a bira mayornan bendishona nos mes di 2 yui homber balente, potente y hopi sabi y despues e bendicion di nan cu a permiti nos bira welo y wela di 5 precioso criatura. Danki na nos bon Dios cu a permiti nos tur e bendicionnan aki y mas. E amor cu ela pone den nos curazon pa medio di su yui Jesus. Lady Ruth lo sigui duna danki pa tur cos, tur dia, tur situacion, tur experiencia, tur les. Ora e no sa kiko mas pa bisa den su oracion e ta bisa ‘DANKI DIOS’, y cu e palabranan ey riba su lipnan y curazon e por pega sonjo y drumi dushi anochi cu paz y tranquilidad. Scolnan ta gusta trata tur sorto di tema, ohala nan a trata e tema aki tambe di duna danki, cu poemanan y of versjenan positivo y bunita. Laga e muchanan traha un lista di cosnan cu nan ta gradicido p’e. No ta importante kiko ta come hunto,( na Merca ta kalakuna), por ta un simpel pan cu hotdogg of pan cu croquet, basta tin trankilidad y paz den cas y na mesa. Sinti e presencia di e amor grandi y infinito di nos Creador di amor. Nos grandinan sa bisa ; Cu e saludo di Bon dia y danki no ta yena mi tanki’, pero e ta habri mas caminda di bondad y bendicion sigur ! Pesey, DANKI na tur persona, famia y amigonan, tur tur hende cu Lady Ruth conose, cu a inspir’e den su viahe den bida, specialmente meneernan di scol Mon Plaisir College den anjanan 70, awe tur tres den felis memoria, Meneer Cees van Vliet, Meneer Jan Auwerda y Meneer Frous.
Na YMCA tempo di su hubentud, Senor Jorge Guastavino y Sra. Suzana Bennett dfm.
Y na e maestra di Piano Sra. Stella Feliciano-Weller, kende a duna Lady Ruth su dos yui hombernan les di piano, cu a anjadi na e alegria den cas. Un bearhug pa Stella, still going strong ! Y last but not least, un Danki back in time na Sr. Carlos ‘Cayochi’ Kelkboom (dfm) di Radio Kelkboom na unda Ruthy Bergen a sinja e trabaonan di locutora y operadora den radiodifusion.
Boso tur tin un lugar special den su curazon ! Y na tur cu ta den su bida awe den 2021, DANKI, stay safe y Love you too !!! Corda treasure your loved ones, make new memories ! Crea y traha recuerdonan bunita nobo cu bo sernan keri !
