Shonnan tur, con ta ? Nos ta spera ta sigui cuida, tuma vitamina, come saludabel y bebe cosnan cayente y hopi awa. Nos tambe ta gusta come “fast-food” de vez en cuando, principalmente ora e inspiracion pa cushina no tey. Hopi ta e amanan di cas cu ta cushina cumindanan criyoyo y dushi. Varios tal bes ta usa recetanan cu nan ta hanja riba facebook of for di un amiga. Na cuminsamento di e temporada di e pandemia di covid-19 aki, cu tawatatin” toke de keda y shelter in place,” nos tambe a purba cushina algo dushi y diferente for di receta ricibi telefonicamente di Laureen Eman, un amiga cu sa cushina dushi. Nos a traha balchi di salmao. Machika e batata herbi hunto cu e salmao den su specerijnan y lora e balchinan dop nan den webo bati un crenchi y despues hasa nan. Nan a sali masha masha dushi mes, y mi so a hanjami ta come nan tur e merdia ey y e anochi ey, pasobra, mi a pone di mas celery den dje cu mi casa Johan no ta gusta. Prome mi a keda disapunta cu e no kier a ni purba un, pero despues mi a realisa cu mi apetite tawata bon cu a ponemi come tur sin sinti mi mes culpabel. En total Lady Ruth a la Chef a come tur su 10 balchinan di salmao su so ! Mi conose varios hende cu ta cushina bon y dushi y of cu ta traha cos dushi , e.o. bolo of bolo di glas. Mi bon y bunita amiga Indra Balijn ta master den traha un dushi bolo di glas, cu ta e lechi” condensed”, jello y knox . Simpel, liher y facil kizas, pero cu nos, cu no ta un Keukenprinses pa baila oranan largo den cushina nunca a purba di traha. Mi bunita Tia Elda Tromp-Croes ta traha e croquetnan di mas dushi cu su crenchi pica! Mi bunita Tia Chichi’Joy ( awe dfm) ta campeon den traha bolo, specialmente su dushi bolo di frigidair, hopi, pero hopi dushi mes ! Awor ta su di dos yui muhe cu ta biba na Hulanda, Sabrina, ta sigui den su pasonan y tambe ta traha dushi bolo di pruim, djies pa menciona uno. Nos poema den nos relato di awe ta un tributo na mi Tia Chichi’Joy,(awe dfm) cu tawatatin como hobby traha su dushi bolonan.
“QUEEN OF HEARTS”
SELVIA MONICA BERGEN -PONSON
“CHICHI “
02 -09-1940 * 30-07-2021
Nos kebrante di salud no a permiti nos bay despedi
Di “Tia Chichi”un bunita elegante dushi hende, hopi keri
Pero, awe mainta, a lanta cu ne na mente, alma y curason
Dirigiendo mi, pa manda palabranan di forza y consolacion
Na su 4 yuinan, adultonan responsabel, cu respet, bon studia y bon capacita
Na tur su nieto- y bisa nietonan sabi, inspira y hopi stima
Tia Chichi tawata un hende muhe fuerte cu hopi amor
Su di dos yui muhe bunita Sabrina, ta traha su dushi bolonan awor
Manera e bolo di frigidair di Chichi, cu no tin dos mescos
Tia Chichi su deseo pa bay keiro regularmente y pasa tempo cu su famia na Hulanda
Sin lubida y sin pone e resto di su bunita y dushi famia na Aruba un banda
Su “Curason di Reina”, of e como “Reina di Curason” tawata manda
E tawata biba cu hopi confianza, dedicacion y fe den Dios
Cu mi mama Mercedes “Tia Chede”,nos tawata bishitele na su cas na San Nicolas
Tempo cu ainda su casa Omo Joy tawata na bida
Sinta hari y combersa cu un dushi kopie thee cu bolo of koekie
Awe, Tia Chichi , reuni cu Omo Joy, cu tanto ela stima
Nan yuinan talentoso y bendiciona lo no keda sinta keto den un hoeki
Nan ta riba nan pianan stabiel y fuerte, aunke e bashi nunca lo muri
Den nan humilde y bunita curason ta biba nan “Queen of hearts”
Hunto cu nan kerido tata Mario Jose “Joy”, nan bon ehempelnan den tur cos
Awor lo custuma di sinti y tende den e dushi biento of awasero nan vos
Uni hunto cu e amor di naturalesa universal, den nan bunita luz
Cu Tata Dios sigui rondona, cuida y guia nan yuinan, nieto y bisanietonan
Cu nan sigui tey pa otro den tempo duro y suave cu amor, forza y energia positivo di ruman
Cu nos “Queen of hearts” Beautiful Lady Chichi’ Joy, sosega na paz.
Den reino celestial cu nan otro sernan keri cu a bay nan dilanti
Sigui luci y briya den tur buniteza cu ta rondona nos tur, dia pa dia
Y pa hunto cu e solo cayente radiante, nos sigui sinti nan presencia den silencio y den alegria !
Cu un “bearhug” pa Guido, Luigi, Debra y Sabrina.
Boso prima Ruthy”Lady Ruth” Vrieswijk-Bergen
Aruba, 5 September 2021