Nos ta gradici nos bon Dios pa un otro dia mas di bida cu salud y amor. Sin bon salud nos no
por goza di bida. Manera e otro dianan di tata, di mama, y tur e otronan celebra un bes pa anja,
un dia proclama pa sea Nacionnan Uni of un otro instancia, tin un Dia tambe dedica na
Enfermeria. Y e dia aki tawata den luna di Mei cu ya ta trai lomba. Nos relato semanal lo trata e
tema aki di Enfermeria. Di salud e biaha aki. Di e bon trabao cu tur e broedernan y zusternan ta
hasi como Verpleegkundigen. Un trabao cu ta rekeri hopi amor y dedicacion na prohimo. No ta
tur hende por hasi e trabao aki. Nos dushi hendenan special cu curason yen di amor por hasi e
trabao aki. Nan tin pasenshi, nan ta sinya con anda y yuda y cuida nos grandinan den Casnan
pa nos grandinan of den hospital of tambe esnan di Wit Gele Kruis cu ta bay yuda nos
grandinan na nan cas. Nos tin cu applaudi nan, y ta gradicido pa tin nan. Nos ta stima nan y ta
orguyoso di nan. Elogio so nos tin pa nan tur. Lady Ruth a wordo invita pa a bay celebra cu e
grupo di SABA Paviljoen Oranjestad e biaha aki, como hurado pa skirbimento di poesia cu e
tema : “ A cup of coffee”. Aunke no ta tur a tribi expresa nan talentonan den e tema aki cu
palabra, e tawata un dushi atardi cu un dushi ambiente. Un di nos grandinan, como huesped
special sra. Chichi Croes den e Cas tambe a recita su bunita poema titula :”Tesoro di mas
balioso” dedica na tur e enfermeronan y of cuidadornan di nos grandinan. Lady Ruth tambe a
recita algun poema, pa inspira nan un crenchi mas den nan bon trabao. E ganador maximo
tawata e simpatico lider Ivy Daisy Goeloe cu a skirbi y recita su bunita poema “ Cup and a
small cup “ tocante e kopie di koffie di nos tur cu ta wordo yena di nobo cu mas amor, mas
pasenshi y mas alegria, pasobra nunca e lo ta bashi si nos sigui sembra cosnan bon y bunita. E
gentil cabayero Dario a sali na di dos lugar cu e poema “Koffie” y Jane na di 3 lugar, Jane a
recita un bunita poema for di e buki Poemanan di Ruthy, “Simplicidad”. E tawata un bunita
atardi, un grupo no hopi grandi, pero si cu a intercambia di pensamento un crenchi relaciona cu
nan trabao duro. Lady Ruth, awor un crenchi grandi su mes, na caminda pa su di 67 primavera
a recorda hopi actividad bunita di conta storia, canta y baila pa nos grandinan cu e proyecto di
BNA no mucho tempo atras. BNA tin e proyecto ey bibo ketobay cu cooperacion di Quota club
Aruba. Aruba y nos grandinan activo “ alive and kicking” ta wordo invita pa e Golden Age Expo
dia 6 di juli venidero na Alhambra Ballroom for di 9 or di mainta te 6 or di atardi . Afls 10,- so pa
entrada y ticket por hanja na Kibrahacha y na JR Motors. Lo tin standnan interesante y bunita
cu tur sorto di informacion y mas pa bo tambe ta mihor prepara pa bo “Golden Age” ora e
cuminsa toca na bo porta. Nos pabien di curason na e ganadornan cu nan bunita poema y nos
pabien y danki ainda na tur cu ta traha den e departamento di enfermeria cu ta un trabao duro
tur dia. Cu Bon Dios sigui drama su bendicion di salud, forsa, energia, alegria y sabiduria riba
boso cada un. Danki pa lesa nos relato di e siman aki cu atencion .Lady Ruth lo sigui colabora
como bonluntario cu su relatonan semanal, tanten cu su salud ta permitie. “Un bearhug” pa
boso tur ! Cu un danki di curason na miembronan di prensa, pa tur bunita cooperacion !
