Saludos cu un ‘Bearhug’ pa nos fiel lectornan . Drentando e luna di November cu hopi sabiduria den nos alegria. Drentando e penultimo luna di 2021 cu hopi color, amor y fantasia den un tremendo exposicion di arte crea pa nos ‘sister-friend’, nos colega artista multifacetico Laureen Eman. Laureen ta un hende muhe inspira cu no ta para keto ora e inspiracionnan ta bati na e porta di su mente, alma y curason. E ta un artista cu ta sigui su curason y su sonjonan. Laureen ta un persona cu a tene hopi exposicionnan solo como tambe den grupo durante anjanan, desde cu ela cuminsa explora y expresa su sintimentonan riba canvas den e colornan cu ta pon’e briya mas ainda, pasobra, e ta sigui sinja mas y mas tecnicanan regularmente y expande su horizonte den expresionnan artistico den tur forma y color. Nos conose Laureen Eman tambe como un Poeta, escritor ,cantante y pianista , aunque esaki e no sa hasi hopi mas, pero ora topa cu un piano, e por sinta y toca trankil algun bunita pieza pa bo. Su curason ta na e bon lugar. Su pasion pa pinta, hunga y bayla cu e colornan riba canvas ta mas grandi cu tur su otro talentonan. Un bunita hende muhe cu hopi fe. Un muhe cu su cosnan bon organisa.
Aunque e no a publica un buki di storia y of poema ainda, esaki no ta impossibel p’e, mirando su amor profundo pa expresa su mes, mayoria biaha na e idioma ingles, e idioma cu ela studia den exterior tempo e tawata mas hoben. Awe un bunita mama bendiciona di 3 yui hoben adulto y wela di dos precioso nieto. Lady Ruth y hopi di Laureen su amiganan y tambe personanan cu no tawata conose Laureen, a yega di sigui cursonan informativo y educativo serca dje den Marketing , Office skills y hopi mas y of a participa den varios di su tremendo workshopnan di pintamento y ‘pouring’ duna entre otro na ‘Cosecha’. Actualmente tur hende por bishita y admira Laureen su 90 obranan den su solo exposicion ‘ Emotions’ den e bunita salanan di Unoca , den Stadionweg. Obranan varia, cada un unico ariba su mes cu su mesun historia di emocion. Emocionnan cu a sali brota den e temporada di e pandemia, ora nos mester a keda paden. E colornan usa ta bibo, suave, alegre y vibrante, nada di depression of negativo. Un artista pintor mayoria biaha ta expresa su mes mihor den silencio of cu bunita musica den fondo. E exposicion aki lo ta habri te dia 20 di November 2021 henter dia y hasta atardi y anochi si bo yama Laureen mes pa mas informacion na su number : 7370000 pa cualquier informacion of cita. Durante e anochi di e apertura di su expo ‘Emotions’ cu a tuma lugar recientemente den e ultimo siman di luna di Oktober, por a goza di e dushi musica di guitarista profesional cu curason, Jerry Diaz, cu a toca, impacta, y caricia e curasonnan presente y na final di e anochi amiganan y famia di Laureen y Laureen mes a canta algun bunita cancion y hasta Laureen a baila un dushi wals cu su sua Francis Croes, ariba e tononan glorioso di guitarra di Jerry Diaz, un di e mihornan riba guitarra, pa hopi e ta ‘the best’.. Cu amor Laureen a invita varios klas di scolnan y tambe varios instancia di nos grandinan pa bishita su expo, bin relaha y goza di tur e obranan fantastico cu ela crea. Y ta danki na su sponsernan entre otro Unoca, Martijn Trading , Aruba Bank , DCA ( Dept. di cultura) y Aruba Trading, por a logra esakinan y e expo. Ta asina bunita pa apoya nos artistanan local. Laureen su prijsnan ta tremendo na alcanse di tur amante di arte, for di un ‘sun catcher’ of ‘coaster’ chikito of un riba canvas mediano y pa un crenchi mas grandi. Y…no ta pasobra mi ta e sra.esposa di su primo Johan Vrieswijk mi ta elogia Laureen , pero, pasobra como artista multifacetico mi tambe ta pinta etc. , mi tambe a tene exposicionnan y bende cuadra, mi sa cuanto trabao ela hinka den cada un di nan, mi tawata varios bes serca dje wak e pinta. Ta di wowo, alma y curason di artista pa artista ! Bunita colega ‘sista-friend’ Laureen Eman, sigui briya y sigui luci den tur bo arte ! Masha masha masha pabien cu bo expo ‘Emotions’.Shonnan, te un otro oportunidad. Stay safe ! Love you too !
