Shonan tur, un felis dia cu hopi sabiduria den nos alegria ! Ta parse cu nos alegria nunca ta caba, pero tin biaha nos sa ‘tuma for granted’ nos sabiduria cu tin den dje. Awor nos ta lesa riba face book algo cu kier introduci reglanan nobo den hospitaal pa un of mas cirujano y of cierto dokternan. Ta logico cu bo donjo di trabao por pone su reglanan, si esakinan ta cuadra cu e bon trabao di e cirujano y dokternan trahando na bienestar di pueblo, pa mehora salud di nan patientnan. Pero semper por yega na un bon acuerdo cu otro, toch ? Aruba ta bendiciona di tin hopi bon cirujano y dokternan den servicio cu nan excelente trabao. Nos no a ‘verdiep’ nos mes den e asunto aki, pasobra, cada ken sa ken nan ta y kiko nan por accepta of no. Nos amigo, e tremendo dokter Ike Posner , cu a skirbi e relato riba facebook ta un professional su mes cu a bira mas humilde despues di su dos operacionnan, un di corazon y un di heup. E ta sinti awor hunto cu pueblo y ta balora bida en su totalidad. Aunque semper e tawata un bon dokter y un bon hende, awor e ta mihor. E ta sinti pa su coleganan dokter den tur sintido di palabra. Kiko ta kiko ? Patientnan tin cu tene un demonstracion pacifico pa pidi nan pa keda traha na Aruba ? Kiko ta tur e medidanan anto tuma contra nan ? Ta algo otro ? Mi a lesa dos nomber Dr. Randy Tromp y Dr. Tim Peterson. Gobierno tin algo di bisa den esaki of no ?
Ach, pa ora cu e relato aki di Lady Ruth sali den corant, ohala tin un bon solucion caba entre e direktiva di hospitaal y e dokternan aki. Hasimi corda, cu pa motibo politico un yui di tera, tremendo dokter, dokter Sprock, no por a bin traha y sirbi su mesun pueblo como tal.
Anjanan atras, nos a yega di combersa un crenchi cu Dr. Sprock na Bon Bini Festival na Fort Zoutman, pero e shon di hende y tremendo profesional aki, no kier a bay den ningun detayes, pero , nos a deduci cu tawata, ‘atrobe’ algo politico di algun di e gobernantenan cu ta hanja nan ‘ja knikkers nan tras’. Kiko e asunto di e dos dokternan actual ta, asunto di placa ? Asunto di orario ? Asunto di schedule ? Ach, ta tristo si pa algo asina sali for di man. . Si, nos tambe ketobay disgusta cu nunca ni un contesta of splicación pakiko no por pone un ‘sleeping police’ den Dadelstraat, Dakota, caminda muchanan di scol di Dakota cu ta biba den Tarabana Pabao tin cu crusa e caminda pa bay nan cas cu autonan corriendo manera ‘speedy gonzales’. Manera mi a bisa un amigo, colega den medionan di comunicacion, pasobra mi tambe ta aporta cu cosnan bunita y positivo den medionan skirbi, cu, su perseverancia den corant y riba face book si a duna bon resultado cu e trapi nobo pa Rogers beach na caminda. Algo lujo ? Algo necesario ? Mas cu un ‘sleeping police’ como un sorto di proteccion y seguridad pa nos muchanan di scol ? No ta interesami cu tin 10 of 20 ‘sleeping police’ dilanti tur scol, ta nan deber ! Pero tin cayanan te den lomba di fierno den mondi leu cu tin ‘sleeping police’ pasobra ta un caya di un politico ? Pica locual a sosode cu Paul Croes cu su 80 dianan den isolacion . Hopi ta hanja esey mucho exagera, nada di mas no ta bon . E no a mata niun hende . Hopi tristo ! Tin hende cu a puntra, cu, si ta algo asina por a sosode cu un otro minister of parlamentario di e partido geel, si lo a castigele mescos ? Por por si acaso algo similar a pasa cu un di esnan den gobierno actual ? Ach shonan, tur sa cu, core campanja ta un cos y goberna ta un otro. Nos a comprende cu tin hopi presion riba esnan trahando den salubridad publico ? Hopi ta lubida cu tin un Dios riba nos cabes, riba cada un di nos, kere of no kere, atheista of creyente, tin algo mas grandi inexplicable den poder cu tin e ultimo palabra. Sea fisicamente, spiritualmente of mentalmente. Ban sigui cuida shonan , cu fe gradici y eherce bo sabiduria ‘wisely’ dia pa dia. No carga rencor ! Pordona pa bo tambe wordo pordona ! Yuda otro pa bo tambe wordo yuda y stima otro pa bo tambe wordo stima ! Danki pa lesa nos relato y pasa un dushi dia yen di sabiduria den nos alegria ! Stay safe ! Love you too !
