Den nos curason awe, e bunita recuerdonan di nos presentacion na Casnan di nos grandinan. Danki na Biblioteca Nacional Aruba y Quota Club Aruba, e proyecto aki, cu ya ta existi pa varios anjas, (aunke den temporada di Covid , e bishitanan aki no por a tuma lugar), desde luna di April ultimo a bira possibel atrobe. Artistanan Poeta Escritor ta hanja e bunita oportunidad di comparti di nan talentonan cu nos grandinan atrobe. E prome escritornan Poeta cu a cuminsa e proyecto aki (cu duracion di tres luna), tawata e pareha Kock Marchena. Ambos cu varios buki di poema y of storia riba nan nomber. Si, lieve Belen y Dolfi Kock a bishita 4 cas di nos grandinan den luna di April : Paviljoen na Playa, Cas Marie na Savaneta, Centro di Cuido na San Nicolas y Huize Maris Stella den curason di Savaneta . Den e luna di Mei tawata beurt di Ruthy Vrieswijk-Bergen (Lady Ruth) . Y e luna aki di Juni, yegando poco poco na su final y tambe final di e proyecto di Conta Cuenta aki, ta toca turno na nos bon amigo e simpatico cabayero Marco Christiaans. Nos tur tawata di bishita serca nos grandinan ariba e Diamarsnan di e luna cu a toca nos. Nos a conta cuenta, canta, recita poema y of bayla, segun e bunita inspiracion tawata toca nos curasonnan artistico. Bunita ta pa mira nos grandinan canta hunto cu nos e.o. e dushi y bunita cantica di Padu Lampe “Abo so”, bati man, cu sonrisanan bunita ariba e caranan. Cada Cas di nos grandinan cu un diferente dushi ambiente. Bo curason ta sinti cu y pa nan. Lady Ruth a hiba cu ne un cusinchi cora den forma di un curason y a invita nos grandinan pa brasa e cushinchi y pensa na algo dushi bunita den nan bida. Un of otro recuerdo. Y despues pasele pa su bisinja sinta banda di dje, cu ayudo di e personal di e Cas . Nos a pone atencion ariba nos hendenan muhe ya cu tawata nos beurt den luna di Mei. Nos a recita poemanan di e tema aki tambe. Na Paviljoen na Playa Lady Ruth a invita amiga Poeta escritor Ariana Koolman Chirino pa comparti dos di su bunita poemanan cu tema di antes, cu tambe a cay na agrado di tur cu tawata sinta ta scucha. Ariana ( Lady Ari) tambe a recita cu hopi amor pa nos grandinan.
Despues di nos presentacion di mei ora, e media team dinamico di BNA ta pasa algun video cortico varia den plantacion den cunuku y di nos casnan di torto cu artefactonan di antes usa pa nos hendenan cu a biba den e temponan ey. BNA por wak atras ariba un exitoso proyecto atrobe, danki na Quota club di Aruba y danki na e artistnan Poeta escritor cu tin tempo pa den oranan di mainta riba e Diamars durante 3 luna, comparti cu nos grandinan. Pa Lady Ruth esaki tawata un bendishon bunita sigur, pasobra e ta gusta brinda di su talentonan den alegria cu tur rond di dje.
Nos dushi grandinan tin mester di nos , tin mester di boso cu ta famia pa bishita nan regularmente. No laga nan so, den nan soledad. No laga nan bandona. No hibanan y despues no bishita nan , saca tempo foi bo schedule druk pa bishitanan, brasanan y combersa un crenchi cu nan. Hopi di nos ta yega na edadnan halto y bira grandi. Bida sa ta cortiko, pero tin biaha tin entre nos , grandinan cu ta yega e edad di 90 anja of mas y nan mester di cuido y atencion.
Danki na BNA y Quota cu a hasi posibel e proyecto di Conta Cuenta aki. Shonnan, danki pa lesa nos relato, pasa un dushi dia yen di alegria ! “Stay safe, love you too !
