Sabiduria den nos alegria: Ruthy”Lady Ruth”Vrieswijk-Bergen

Nos relato di e siman aki a laga warda un crenchi riba dje, pasobra e curason tawata “on hold” cu un pauze chikito den tempo y espacio. Ora noticianan tristo drenta, bo ta para keto y reflexiona. Dios ta duna, Dios  ta tuma. Y nos tur tin cu bay “mas aya” tardi of tempran. Un ta prome biaha Lady Ruth ta toca e tema aki. E biaha aki Dakota y Aruba a tuma despedida di nan Anna stima, Anna Yearwood Broadbelt, Anna di Sonny dfm, Anna e kerida mama di agente policial Tony y demas rumannan, Anna ruman di e.o. mi amiga di tempo di Mon Plaisir College Winie Broadbelt, Anna di Ann’s Choir, Anna cu a duna les di piano. Anna conosi tambe pa “Vrouwtje” cu tawata bende e “vleesbroodjesnan” di mas dushi na studiantenan di Colegio Arubano y Avond Havo.  Entre otro, pasobra, ta un bida activo yen di musica y alegria den su sirbishi pa Dios a rondonele den su manera unico di ta . Cu su tocamento for di edad hoben den Iglesia Methodista. Y su presencia fielmente  riba Diabierna na Misa Santa Anna na Noord. Cu Anna a toca curason di chikito te grandi tawata notabel den e testimonionan duna pa e miembronan di famia, di koor y Pastornan durante e sirbishi cu canto sublime y glorioso di e koor den Misa Fatima y na e cantidad grandi di personanan cu a bin despedi di dje.  Anna su bida di musica a wordo corona tambe na su entierro cu dushi musica di su koor di Dakota.  E koor di Iglesia Methodista tambe a canta masha bunita den Misa Fatima, na e entierro di Anna .  

Mientrastanto  Montanja, Noord y Aruba ta tuma despedida di Eduardo Tromp, “Eddy” Tromp. Eddy di Eddy Tec., Eddy di Biblioteca Nacional y Bon Bini Festival anjanan atras. E homber di sonido cu oido skerpi  pa tur locual ta calidad den grabacion y presentacion profeshonal.  Eddy Tromp di e programa mas gusta y scucha tempo di su tempo na Radio Kelkboom :” Butishi di Alegria” presenta pa Eddy y Ito Tromp. Un programa dominical cu a dura 40 anja .  Eddy Tromp cu pa anjas a yuda nos den Scouting cu sistema di sonido unda cu a celebra e dia di Sint Joris, antes, mainta tempran prome cu e muchanan bay scol den nan uniform di scout. Dos baluarte di nos isla, awor mas serca di nos mente, alma y curason. Dos baluarte, awor den luz eterno serca nan Creador di Amor. Nos tambe a bay condoleer e famianan di Anna na Aurora Funeral Home Diaranzon ultimo den oranan di anochi y por a scucha e bunita tocamente di Max Hassell riba guitara y Pastor Jairo riba su trompet. Ki bunita e musica tawata sona y caricia nos alma, cu tawata bisa Anna ayo y te despues. Pa su Diahuebs nos a bay e sirbishi den Misa Fatima den curason di Dakota, cu hopi pero hopi hende atrobe, mescos cu tawata e caso na Aurora. Ki bunita sirbishi ! Ki bunita tur cu a papia di Anna stima. Ki bunita Pastor Jairo den su manera simpel y hopi bunita su palabranan. Nos Pastor original, humilde cu un bunita curason unico, cu a pone sonrisa riba e caranan presente cu su testimonio  con ela conose Anna hopi anja pasa. Dia ela cuminsa traha ya Anna tawata activo den Misa Fatima.  Tur a papia e berdad di e fe y bida rico na abundancia di amor di Anna  pa Dios y prohimo. Pa ora e relato aki sali publica, nos lo a tuma despedida tambe di Eddy Tromp ( Diamars 30 di Mei den oranan di mainta) Ta hopi a conose Eddy na Radio Kelkboom, na unda ela yuda como boluntario pa anjas den e dept. di grabacion di nos musica local y di folklore. Un shon di hende. Un profeshonal cu curason. Na bida, nos, como Lady Ruth y Bubbels a duna Eddy danki semper na bida pa tur locual ela hasi pa nos como artista cantante di musica ranchera, grabando nos cancionnan den e festivalnan di Ranchera den cual nos a yega di participa hopi biaha. Na famianan di Anna y di Eddy nos mas profundo condolencia, consuelo y amor. Dios ta duna, Dios ta tuma. Awor nan ta mas serca di nos mente, alma y curason. Sosega den e Reino Celestial serca boso Creador di Amor cu luz eterno y amor infinito. Shonnan, danki pa lesa nos relato, “Stay safe y Love you too “! Mientrastanto nos cu ta aki ainda, ta tuma nos regalo “Bida”, un dia a la ves, Si, One day at a time! Y cu hopi gradicimento na nos curason pa nos salud, alegria y sabiduria !