Un “bearhug” pa tur nos lectornan awe, satisfecho y gradicido cu un otro bunita Dia regala na nos. Nos tin varios tema pa cubri ketobay y nos ta relata awe esun di 30 anja di existencia di Radio Hit 94.1 FM situa den Caya Petronia, den Oranjestad. Despues nos ta spera di por bin cu algo di curason encuanto otro topiconan manera Dia di Hende Muhe y nos Dia Nacional na CBPP. Y si, claro algo mas di nos Poetanan Patria tambe. Mi ke sa nos falta algo di Poetry Night tambe ainda. Y tambe algo bunita di Radio Galactica 99.9 FM encuanto nan bunita top 100 di canticanan na nos dushi Papiamento. Ya, ta un bes pa siman nos ta inspira riba nos relato y cu bunita cooperacion di coleganan den media ta wordo publica na maneranan profeshonal cu curason. Sperando cu nan tur a goza tambe di nos Dia Nacional y relax un crenchi tambe.
Nos ta sigui nos curason awe, y ta dedica e siguiente poema na colega den media y den prensa Sr. Johnny Habibe y su dinamico team di Hit 94 FM y di Hit 94 su ruman Mega 88 FM.
HIT’94.1 FM CU 30 ANJA
Bon programacion henter dia
Bon curason di gerente yen di sabiduria
Bon musica
Bon noticiero
Manera bendicion di awasero
Un Radio FM potente
Un Radio FM excelente
Ta un motor profeshonal y dynamico tin su tras
Un gentil cabayero locutor guapo cu ta e baas
Manera Johnny Habibe no tin su igual
E ta locuta na un manera unico y super special
No tin un stem cu por iguala e stem di Johnny
E stem aki conosi y scucha desde anjanan setenta
Na otro radio emisoranan, prome cu ela cuminsa cu esun di dje mes
Un stem unico, cla, raspa y caluroso
Pa scuchele ta un alegria y un goso
E stem aki no ta na benta
Pabien na Johnny Habibe y su team dinamico
Pa tur trabao den radio eherce na maneranan fantastico
Julisa Anthony cu tey ya pa mas di 20 anja cu Hit’94
Ela cuminsa cu locucion y programa pa un rato
Y despues a cuminsa asisti tambe den trabaonan administrativo
Lady Ruth conose tambe lieve Avis Winklaar cu su dushi musica y su bunita bos
Dos di e hendenan muhe bunita na Hit 94, bendicion di Dios
Su team cu tambe cu nan bon trabao , semper cu curason
Aruba a, ta y lo sigui gosa di nan bon programacion
Nan bon y dushi musica, nan noticiero hopi scucha
Comerciantenan cu nan confiansa den Hit 94 deposita
Pabien “The Anchor Man Johnny Habibe” cu boso 30 anja di Hit 94 FM
Cu despues a hanja un ruman den Mega 88
Danki pa brinda Aruba, calidad y excelencia den Radio Difusion
Sigui cu e bon trabaonan yen di pasion y dedicacion
Awe ta Johnny Habibe ta canta su mesun dushi cancion !!!
Su cancion di honor y gradicimento na su bon Dios
Cu un danki grandi pa su donnan y talentonan y pa tur otro cos !
Autor : Ruthy”Lady Ruth” Vrieswijk-Bergen
Nos no tin pura, nos nos ta ansha pa skirbi, nos sa cu lectornan tambe tin hopi pasenshi y den e dianan aki sigur nos corantnan local lo dorna nan paginanan cu bunita potretnan di nos Dia Nacional. Nos ta contento cu nan ta dedica tempo y atencion tambe na nos relato semanal di curason. Danki pa lesa nos relato di awe cu amor y atencion di curason. Nos deseo pa un bon y felis siman colma di salud, alegria y sabiduria. “Stay safe y Love you too !
