Bon dia yen di alegria ! Ya nos tambe ta den celebracion pa cu nos Dia Nacional, Nos Dia di Hymno y Bandera. Bunita pa a cuminsa mira nos bandera wapa aki aya den nos dushi biento fresco. Y….manera ta un parti di nos tradishon di expresa amor, nos lo bolbe participa na e competencianan Poeta di Patria cu un poema cu nos a inspira di curason. No tin poni ningun caminda den e reglanan cu no por publika e poema un par di dia prome cu e competencia (16 maart), pues Lady Ruth ta comparti su poema den nos relato di awe cu tur bon intencion di nos humilde curason, pasobra, e palabra “competencia” no ta zona positivo tur ora den orea. Cada autor, cada Poeta ta unico ariba su mes den su mesun estilo, otro cu palabranan di antanjo, otronan cu historia di nos dushi flora y fauna, nos indjannan of nos beachnan bunita etc. Tur cu nan mesun obra precioso, un joya balioso. Nos ta desea tur cu lo competi pa e premionan di placa hopi exito ! Nos lo have fun atrobe, duna na Aruba, un di nos poemanan atrobe. Nos ta un ex lider scout cu semper a gusta nos trabao como boluntario, y ta asina nos ta wak nos mes den e competencianan di Poeta Patria,( cu nos di tercer lugar algun anja atras). Nos ta desea pa otronan cu ta inspira y expresa nan mes, cu ainda no a yega di gana un premio, pa nan por bin na remarke y gana un biaha. Sino aki algun anja, publico lo fada di wak e mesun caranan ganador cu ta bin competi pa e premionan di placa. Nos sa cu e ta un competencia habri tur anja pa tur tur hende y nos no ta criticando, nos ta simplemente duna nos humilde opinion. Nos ta gusta skirbi poema y recita nan ora e oportunidad presenta y esey nos ta desea di sigui hasi di curason. Exito na comishon Arte di palabra, exito na e juradonan y exito na tur colega poeta participante e anja aki 2023. Cu amor pa ARUBA !!!!
Titulo di Poema: SABIDURIA DEN NOS ALEGRIA
Laga’mi hasi bon uso di skirbi mi poema den 9 strofa cu ta rima
Mi estilo faborito, esun dushi mas gusta desde mi 16 anja di edad
Mi ta wak mi mes den short, cabey largo, riba mi bicicleta den Dakota na skina
Tempo di mi dushi hubentud, asina inocente den mi mesun mundo di felicidad ///
Nos no por trese nos Machi cu Pachi bek den nos tempo
Nos no por trese cosnan cultural bek manera cu nan a pasa hopi anja pasa
Nos no por lubida nan, pero acepta cu nan ta inspira nos y hasi nos contento
Nos no por hasi tur tur cos exactamente manera nan tawata hasi, punto.///
Nos ta purba di mantene nan bibo si den nos curason y memoria
Nan manera crioyo di bisti, nan manera humilde di ta, nan manera di baila y papia
Tempo di nan tempo cu dificilmente por ta ultra moderno awor den nos tempo
Ta parce cu holoshi kier ansha cana mas liher awor cu den tempo di nan tempo.///
Nos tin cu purba di gara tur sabiduria den nos alegria cu ta bin di ariba
Nos tin cu acepta cu awendia tin otro maneranan di expresa, biba y stima
Parehanan di e mesun sexo, cansa di bringa pa nan aceptacion
Tecnologia moderno pa nos cu ya ta welo y wela, un gran preocupacion.///
Nos no tawata sa ki “outfit” pa bisti awe nochi , e anja aki
Y a dicidi di ripiti nos bistir di amor, esun di angel , largo cora
Pasobra, cu prijsnan subiendo, nos tambe ta cuida y recicla
Y tin cu rek e cosnan tin biaha manera cakinja pa keda balansa.///
Competencia no ta pa nos mas, nos cu a pasa e edad di sesenta
Lady Ruth ta gusta skirbi y recita, pesey e tey presente djis pa tenta
Pa mas oro, nan papia tambe di tempo di su dushi tempo
Tempo cu ela skirbi, comparti ,competi, yuda, inspira y hasi hopi hende contento.///
Ruthy a gana su premio mayor caba hopi anja pasa
Y cu e gentil cabayero aki, Johan Vrieswijk ta celebrando ketobay nos 45 anja casa
Nos dos yiu hombernan y un nieta y 4 nieto ta nos tesoronan inpagabel
Ruthy su dushi bida, yen di aventura – y momentonan excitante, agradabel y inolvidabel.///
Dios mediante nos lo sigui skirbi, recita, canta y baila cu DJ of Mariachi
Y dedica nos talentonan cultural hereda un crenchi tambe na Machi cu Pachi
Y manera semper, sincero, directo y simpel den nos vocabulario
Pasobra tur poeta aki ta, a of lo bisa tur cos den hopi palabra bunita caba.///
Danki na tur cu a bin apoya, mira y scucha nos Poetanan local atrobe
Pabien di awor na esnan cu lo sali ganador como Poeta di Patria 2023
Bisa’bo berdad, e biaha aki mi curason no a inspira mi cabes
Mi a chupa for di mi dede, pa a laga e awa di palabranan poetico yobe !/////
Autor : Ruthy”Lady Ruth” Vrieswijk-Bergen
Danki pa lesa nos relato y nos poema cu amor y atencion di curason! Stay safe y Love you too ! Ban celebra nos Dia Nacional den y cu famia, den y cu comunidad. Y….pabien na tur e Poetanan cu ta participa tur anja na e competencianan Poeta di Patria. Please, no stop, ni maske boso no gana of no gana atrobe, sigui boso curason cu amor pa Aruba. Ohala Lady Ruth por a duna boso tur un dushi “Week-end stay” den un di nos hotelnan luhoso y hunto nos tur sigui hanja mas bunita inspiracion di curason pa nos dushi y bunita isla, nos perla den Mar Caribe.
