Diabierna dia 8 di Maart 2024 nos a lanta mainta tempran. Por bisa hunto cu e salida di solo. Pa Lady Ruth no ta algo comun, pasobra, normalmente ta lanta hopi mas laat. Nos ta gusta wak e serie di “Blue bloods” cu ta caba 1 or di marduga, kemen, drumi laat lanta laat. Pero nos a lanta tempran pa nos tawata cla pa bay e conferencia di Hende Muhe 8.00 am na Renaissance Conference Center. Bayendo den banyo, e cantica di Los Angeles Negros a cuminsa toca den su curason “Manyana me ire” sin comprende pakico e cantica ey, pasobra, normalmente ta lanta cu otro canticanan hopi biaha gospel na curason. Despues di tawata cla bisti, a wak nos mes den spiel, mi a comprende pakico e cantica ey. Nos niun sa di e dia di manyan. Nos a traha un kopie koffie cappuccino y pone dos mandarin den nos tas blauw grandi y a pidi mi casa Johan hibami na e conference center , pasobra, nos sa cu lo tin mas auto cu normal, e parking lot lo ta catan catan. Nan ta spera algo mas di 750 persona, mayoria hende muhe di tur raza, religion y cultura, di hoben te grandi di edad, pasobra esaki tawata habri pa tur muhe cu inscribi na tempo. Awor, 1 or di marduga, lagami comparti un chispa asina, awor cu e ta na mi curason. Tawata un conferencia di kita sombre, cu charlanan inspira y impactante. Lady Ruth a goza e charla di Ministro di Cultura Xiomara Maduro , e “motivational speaker” sra. Croes y esun di Prome Ministro Evelyn Wever Croes . Oh ki bunita Rachel Kraaijvanger a canta e cantica gospel “Give thanks” acompanja pa un guitarista na cuminsamento. E publico gigantesco a goza un mundo tambe di e fantastico presentacion di Jeon cu su cantica Miss Dior. Lady Ruth a ricibi algun bon comentario pa cu su poema prosa cu a sali publica den Diario encuanto Inclusion Inspira. Berdad tin inclusion, pero ainda falta. Palabranan cu a resalta y impacta na e conferencia ta : “Mi ta nabega” y “Na mesa”. Ach, mi no por ta “precies” pasobra mi a regala un amiga di mi e tas cu nan a parti como regalo, y eyden tin e foldersnan cu e info y algo di lipstick y wimpers falso ofzo cu nos no ta gusta ni usa. Un bunita gesto di nan parti, pero, nos tin nos mesun smak, y nos no ta gusta nada artificial pa pone na wowo. Anochi Lady Ruth a celebra cu hendenan muhe bunita” paden y pafor”,(beauty inside out) e.o. Maria Andrade y Bea Croes Quilotte na Centro di Bario Playa Pabao na un manera hopi alegre, e capitulo 2 di Sra. Hilde Rodriguez Taekema, notario , cu a duna hopi informacion clave y contesta hopi pregunta. Lady Ari a recita poemanan cu a causa furor den su entrevista na radio mainta y a regala como premionan pa rifa entre e muhenan presente dos dozijn di su bunita “Mug” di Poet Author Artist Lady Ari dorna e.o. cu e pen di pluma. E reina den musica Mariachi “Sol” Soledad Rijna, Oslin Trimon y Quincy Hasham a percura pa un excelente dushi ambiente cu nan tremendo bos , e.o. Volver y e hymno “Muhe” cu publico participando den canto. E Poeta Omaira Britten a conta un storia di un muhe inteligente y un cu tawata kier solamente placa placa placa cu a toca e curasonnan. Lady Ruth a recita un poema di Philomena Wong ( dfm),( e muhe balente inspira cu a skirbi e poema encuanto placa placa placa). Sra. Fransia a hanja un reconocemento bunita pa su hopi anjanan di bon trabao na CBPP,ora cu Lady Ari a recita otro bunita poema dedica specialmente na sra. Fransia y na tur presente, un publico grandi dorna cu algun vip hende homber guapo, nechi, entre nan Ronald Antersijn y Michael Koolman, e guapo esposo di Lady Ari. Lady Ruth a regala Fransia un t shirt cu su haiku ariba dje cu ta bisa :” E hende muhe, Amor ta brota di dje, Ta pesey cuide”. E prome 50 damanan a ricibi e tegel cu palabranan di inspiracion di Lady Ari y e dushi publico presente, ( sala sold out atrobe), por a disfruta di un dushi snack box y refresco despues den cura pafor, pasobra paden tawata yena di hende . Pabien na e grupo talentoso di bayle di CBPP cu nan bunita presentacion . Danki na e dinamico presidente di CBPP Dennis Burke y e comishon cu a organisa e bunita anochi aki. Y danki na e bunita juffrouwnan cu a yuda parti e “raffle tickets” y e snackboxnan, awa y refresco. Danki di curason na VNO pa a hasi e evento aki posibel y danki na tur e comerciantenan cu a regala bunita premionan cu a wordo rifa. Danki na tur cu a bin atende y participa na e bunita anochi aki. Despues di a wak “Blue bloods” na canal 8 USA, mas laat anochi Diabierna 8 di Maart, crenchi cansa di a atende e dos actividadnan ey, Lady Ruth a traha y bebe su mug di ginger thee, scuchando su “Alexa” cu musica dushi manera “Stand by your man” di Tammy Wynette y “You”re still the one, relaha e mente pa bay drumi. Bendiciona cu e tin e cabayero Johan como su esposo cu ta malcrie y sali disfruta di bida cu ami, su Lady Ruth, su reina muhe !
Corda shonnan, no huzga e hende muhe, ni e hende homber pa su manera di bisti. E tambe tin un alma y curason. E tambe por tin un of mas talento of un of mas don cu ta pone su luz tambe briya. Boso por ta bon studia y diploma cu titulonan grandi, pero ta bo comportacion, trato y respet pa bo mes y pa otro ta laga sa ki clase hende bo ta. Danki pa lesa nos relato. Pasa un dushi dia yen di sabiduria den nos alegria !! P,S. Nos ta hende muhe inspira tur dia !!!!
Y danki Dios, cu mas y mas toch nos ta wordo inclui den cosnan nechi den bida riba hopi tereno. Un bearhug !
