Nos ta den e luna di Maart, e luna dedica na nos hendenan muhe y tambe na nos Dia Nacional. Nos ta para keto un rato, pa recorda tur nos muhenan bunita balente y inspira cu no tey mas cu nos den e mundo fisico aki, pero, cu ta mas serca di nos mente, alma y curason, Nos ta pensa e.o. riba nos bunita welanan y bisawelanan, nos ta pensa riba nos “tante Gerrie”, na Chichi di Joy y nos tia Irena, nos amiganan grandi Juana , Maria y manera mamanan sin dolor di Ruthy TanTina y Estrellita dfm. Nos ta pensa riba nos colega Poeta Filomena Wong, e artista Poeta Gwendy Sneek y nos ta pensa riba nos amiga Juffrouw Rita Williams tur dfm, kendenan a hasi un diferencia den bida di hopi rond di nan. Y riba varios di esnan cu si tey ainda cu nos den e mundo material aki. Lady Ruth ta manda un “bearhug” diki grandi pa amiganan “sister friend” e.o. Milly, Miriam, Indra, Eda, Myrna, Marcia y Veny, Mary, Laureen, Ann, Mena, Valerie, Marline, Vivian, Blondine, Mirlanda, Ariana, Bea, Farrah, Magaly, Regene, Tante Gietie, Verna, Nilka, Jeanette, Tia Loly, Joyce, Munye, Desiree, Sharlyn y primanan Naomi, Vencher y na Hulanda Sabrina y Ruthy su “amiga desde scol Mavo su “correspondentie vriendin” Maria. Na su bunita cunya, un hende muhe fuerte y directo, Mirla, y sobrina Queeny , na su iha Rhojeanne, na Ruthy su yui muhenan “daughters in law” beautiful Joanne y Manuh y na su unico nieta prinses, casi sweet sixteen, lieve talentvolle Lexie cu ta toca piano asina bunita . Y principalmente, hopi amor y gradicimento pa su bunita y dushi Mama P. Mercedes Bergen-Tromp “Mayo”, cu na luna di April venidero Dios mediante lo cumpli 88 anja di edad. Y aunke nos Mama ta lubida un crenchi, nos sa ken nos mama ta y nos ta stime tur dia cu Dios ta regala nos. Ruthy su mama ta su “role model” di mas grandi y di mas importante den su bida. For di su bunita y balente mama Ruthy a sinya kiko ta ser humilde y honesto y kico ta comparti. “Caring and sharing” y pa semper ta bo mes natural sin nada artificial. Mi dushi mama a sinyami con mas pa stima mi casa Johan den ups and downs.
Lady Ruth ta manda palabranan di pabien na su amiga grandi di Sero Lopez Mona de Mey cu a caba di cumpli 80 anja di edad. Un dushi y bunita celebracion cu su famianan, amiganan y bisinjanan anima alegremente pa e gran musico Francis Jacobs cu su dushi musica cu a lanta nos pa bayla y los e cinturanan un crenchi. Mona tambe ta manera un mama sin dolor di Ruthy. Danki lieve Suzy, pa tawata e curason di e fiesta dushi aki ! Ainda nos ta smak e dushi sopi di batata y e drink “Sneeuw witje” Pabien ta bay tambe pa un hende muhe balente y hopi carinoso y amabel, Corientje, cu hunto cu Kitty ta e caranan y curason di Coffee House den La Sallestraat. Corien a caba di cumpli 15 anja den servicio di Coffee House. Un dushi hende semper cu su bunita sonrisa y servicio excelente ! Lady Ruth ta desea di manda un dushi “bearhug” tambe pa tur su lectornan hende muhe cu ta gusta lesa nos relato y cu regularmente ta duna nos palabranan di elogio y complimenta nos, specialmente nos dushi y bunita Amanan di Cas cu ta e curason di nan famia. “Last but not least” un pabien caluroso tambe pa nos Prome Minister Evelyn Wever Croes y nos Minister di Cultura Xiomara Maduro, kendenan ta traha incansablemente pa yuda hiba nos pais Aruba padilanti. Nan tambe ta hendenan muhe ehemplar den nos comunidad.
Danki Aruba, pa lesa nos relato . Danki y pasa un dushi dia yen di sabiduria den nos alegria !
Ruthy”Lady”Ruth, lo sigui hasi su best pa tambe ta un bon role model pa tur rond di dje, algo cu ela hasi anjanan pasa den scouting cu hopi amor. “This little light of mine, I’m gonna let it shine”. Nos lo sigui inspira tur rond di nos cu nos alegria y positivismo tur dia !
Danki Bon Dios pa bo amor infinito cu asina hopi bendicion ariba nos tur, hende muhe !
Lady Ruth ta conclui cu su haiku :” Un hende muhe – Amor ta brota di dje – Ta pesey cuide !
